សម្ដេច​តេ​ជោ​ អះអាង​ដាច់ខាត​មិន​ឱ្យ​មានការ​រំលោភ​អធិបតេយ្យ​កម្ពុជា​

ភ្នំពេញ ៖ នៅក្នុង​សេចក្ដីថ្លែងការណ៍ កាលពី​ថ្ងៃទី​២៣ ខែកុម្ភៈ​ ឆ្នាំ​២០១៥ សម្ដេច​អគ្គមហាសេនាប​តី​តេ​ជោ ហ៊ុន សែន បាន​រិះគន់​យ៉ាង​ខ្លាំង​ក្លា​ទៅដល់​ការ​ធ្វើ​អត្ថាធិប្បាយ​របស់​អង្គការ​ក្រៅ​រដ្ឋាភិបាល (NGO) មួយចំនួន​ទាំង​ក្នុង និង​ក្រៅប្រទេស ដែល​បាន​និយាយ​ពាក់ព័ន្ធ​ជាមួយ​បញ្ហា​របស់​លោក ALEJANDRO GONZA LEX DAVIDSON ជនជាតិ​អេស្ប៉ាញ ជា​អនុ​ប្រធាន​អង្គការ​មាតា​ធម្មជាតិ​នោះ។ សម្ដេច​នាយករដ្ឋមន្ត្រី​មានប្រសាសន៍​ក្នុង​ពិធី​ប្រគល់​សញ្ញាបត្រ​ដល់​និស្សិត​សកល វិទ្យាល័យ​ជាតិ​គ្រប់គ្រង​នៅ​កោះ​ពេជ្រ​ថា សូម្បីតែ​ទិដ្ឋាការ​នៃ​រដ្ឋ​អធិបតេយ្យ​មួយ​ត្រូវ​បាន​បំពាន​ដោយ​អត្ថាធិប្បាយ​មិនដឹង​មកពីណា​។ អ្នក​ដែល​ធ្វើ​អត្ថាធិប្បាយ​មាន​តួនាទី​អី​។ សូមកុំ​អាង​ខ្លួន​ជា NGO មក​អង្គុយ​លើ​ក្បាល​នីតិប្រតិបត្តិ​ឱ្យ​សោះ​។ សម្ដេច​តេ​ជោ​បាន​ចោទ​ជា​សំណួរ​ថា អ្វី​ដែល​ហៅ​ថា​ខ្លួន​ជា​អង្គការក្រៅរដ្ឋាភិបាល​។ នៅ​ស្រុក​ខ្មែរ​អង្គការក្រៅរដ្ឋាភិបាល​ខ្លះ​ដើរ​តួនាទី​ធំ​ជាង​សភា ធំ​ជាង​រដ្ឋាភិបាល ធំ​ជាង​តុលាការ​ទៅទៀត​។ សូម​ពិនិត្យមើល​អំពី​ទំនាក់ទំនង​រវាង​អង្គ​ទាំង​៣ អង្គ​នីតិប្បញ្ញត្តិ អង្គ​នីតិប្រតិបត្តិ និង​អង្គ​តុលាការ វា​មិនអាច​ទៅ​ដាច់​ពី​គ្នា​បានទេ​។

នៅក្នុង​លិខិត​ផ្ញើ​ជូន​ឯកឧត្តម សម រង្ស៊ី ប្រធាន​ក្រុម​ភាគតិច​នៃ​រដ្ឋសភា កាលពី​ថ្ងៃទី​១៨ ​ខែ​កុម្ភៈ ឆ្នាំ​២០១៥ ឯកឧត្តម​នាយ​ឧត្តមសេនីយ៍ ឯម សំអាន រដ្ឋ មន្ត្រី​ស្តីទី​ក្រសួងមហាផ្ទៃ បាន​មាន​ប្រសាសន៍​ថា លោក ALEJANDRO GONZA LEX DAVIDSON ដែល​កាន់​លិខិត​ឆ្លងដែន​អេ​ស្ប៉ា​ញ​ចាស់​លេខ​XDA198043 ផុត​សុពលភាព​ត្រឹម​ថ្ងៃទី​១៤ ​ខែកក្កដា ឆ្នាំ​២០១៥ និង មាន​ទិដ្ឋាការ​ស្នាក់នៅ​បណ្ដោះអាសន្ន​ក្នុង​ព្រះរាជាណាចក្រ​កម្ពុជា មាន​សុពលភាព​ត្រឹម​ថ្ងៃទី​២០​ ខែកុម្ភៈ​ ឆ្នាំ​២០១៥​។ នៅ​ថ្ងៃទី​២២​ ខែមករា ឆ្នាំ​២០១៥ លោក ALEJANDRO បាន​ទទួល​លិខិតឆ្លងដែន​ថ្មី​លេខ XDC006070 មាន​សុពលភាព​ដល់​ថ្ងៃទី​២២ ​ខែមករា ឆ្នាំ​២០២៥​។​

ឯកឧត្តម ឯម សំអាន មានប្រសាសន៍ថា លោក ALEJANDRO បាន​ប្រព្រឹត្ត​ខុស​ទៅ​នឹង​លក្ខន្តិកៈ​របស់​អង្គការ​មាតា​ធម្មជាតិ ដែល​តម្កល់ទុក​នៅ​ក្រសួងមហាផ្ទៃ ដោយ​បាន​ធ្វើ​សកម្មភាព​រារាំង​ការគ្រប់គ្រង​រដ្ឋបាល​សាធារណៈ​របស់​អាជ្ញាធរ​ខេត្តកោះកុង តាមរយៈ​ការ​ញុះញង់​ប្រជាជន​ឱ្យ​ចូលរួម​បិទផ្លូវ​សាធារណៈ​មិន​ឱ្យ​ក្រុមការងារ​ចុះទៅ​ជួប​ប្រជាពលរដ្ឋ​នៅ​ឃុំ​ថ្ម​ដូន​ពៅ ឃុំ​ប្រឡាយ និង​ឃុំ​ជំនាប់ ក្នុង​ស្រុក​ថ្មបាំង ដែល​សកម្មភាព​នេះ ត្រូវ​បាន​លោក ALEJANDRO ទទួល​សារភាព​តាម​រយៈ​លិខិត​សុំ​អភ័យទោស​សរសេរ​ផ្ទាល់ដៃ​ជា​ភាសា​ខ្មែរ ចុះ​ថ្ងៃទី​១៥​ ខែកញ្ញា ឆ្នាំ​២០១៤​។ ក្រសួងមហាផ្ទៃ​តម្រូវ​ឱ្យ​លោក ALEJANDRO ចាក​ចេញពី​ព្រះរាជាណាចក្រ​កម្ពុ​ជាមួយ​រយៈ​ពេល​ខ្លី ដែល​លោក ALEJANDRO យល់ថា​សមស្រប​នៅ​មុន​ពេល​ផុត​ទិដ្ឋាការ​ស្នាក់នៅ​។ ក្រសួងមហាផ្ទៃ​ពុំ​មាន​គោលការណ៍​ហាមឃាត់​លោក ALEJANDRO ក្នុង​ការ​ចូល​មក​ព្រះរាជាណាចក្រ​កម្ពុជា​វិញ​នោះ​ទេ ប្រសិនបើ​គាត់​បំពេញ​បែប បទ និង​មាន​លក្ខណៈ​សម្បត្តិ​គ្រប់​គ្រាន់​ដូច​ជនអន្តោប្រវេសន៍​ដទៃទៀត ស្របតាម​គោលការណ៍​ច្បាប់​នៃ​ព្រះរាជាណាចក្រ​កម្ពុជា​នោះ​។ សម្ដេច ហ៊ុន សែន មាន​ប្រសាសន៍​ថា កម្ពុជា​មិនមែន​រដ្ឋ​រណប​ទេ ប៉ុន្តែ​ជា​រដ្ឋ​អធិបតេយ្យ មិន​ត្រឹមតែ​ជនបរទេស​បំពាន​ទេ សូម្បីតែ​ខ្មែរ​បំពាន​ក៏​ត្រូវ​តែ​មាន​ទោស​ដែរ​។ វា​ច្បាស់​ណាស់​រដ្ឋ​មួយ​គេ​មិនដែល​ឱ្យ​អ្នកឯង​បំពាន​ទេ ហើយ​សង្ឃឹមថា​អ្នកនយោបាយ​នានា​អាច​យល់ នេះ​ជា​រដ្ឋ​អធិបតេយ្យ មិន​ថា​អ្នកនោះ​ជា​អ្នកណា​ទេ​។ សម្ដេច​បាន​ពន្យល់​ថា បើ​យើង​ចូល​ប្រទេស​គេ​អត់​ទិដ្ឋាការ​ក៏​គេ​មិន​ឱ្យ​ចូល​។ អត់​ទិដ្ឋាការ​ចាប់​គេ​បណ្ដេញ​ចេញ​អញ្ចឹង​ទេ​បើ​ធ្វើ​រដ្ឋ​អធិបតេយ្យ​មួយ​គ្រាន់តែ​គេ​បំពាន​ដែរ ចាំបាច់​ធ្វើ​រដ្ឋ​ធ្វើ​អី​។ សម្ដេច​តេ​ជោ​ថ្លែង​ថា ខ្ញុំ​ក៏​សូម សុំ​ផ្កាំ​ទៅ​អ្នកនយោបាយ​មួយចំនួន​ថា​គ្មាន​បរទេស​ណា​ស្រឡាញ់​ខ្មែរ​ជាង​ខ្មែរ​ទេ​។​

សម្ដេច​នាយក​រដ្ឋមន្ត្រី​បាន​លើក​ឧទាហរណ៍​ថា ជាក់ស្តែង​អាម៉េរិក​បាន​ធ្វើ​ជា​ស្រឡាញ់ ខ្មែរៗ ដើម្បី​ទម្លាក់​សម្ដេចព្រះ​នរោត្តម សីហនុ ដែល​នៅ​សល់​តែ​ប៉ុន្មាន​ថ្ងៃ​ទៀត​ដល់​ខួប​៤៥​ឆ្នាំ នៃ​ថ្ងៃ​ធ្វើ​រដ្ឋ​ប្រហារ​ហើយ​នៅ​ទី​ចុង​បំផុត​សួរ​ថា​ តើ​ង​អាម៉េរិក​រត់​ទេ​? អាម៉េរិក​រត់ៗ​ទៅ​បាត់​។ ដូច្នេះហើយ​បានជា​ព្រះអង្គម្ចាស់ ស៊ីសុវត្ថិ សិរី​មតៈ សរសេរ​អត្ថបទ​មួយ​ថា កំហុស​តែមួយគត់ គឺ​ជឿ​អាម៉េរិក​។ ឥឡូវនេះ​សួរ​ថា អាម៉េរិក និង​ប្រទេស​មួយចំនួន​រត់ចោល​យើង​មែន​ទេ ។ រត់​បាត់​ទៅ​ហើយៗ អ្នក​ដែល​ស្លាប់​គឺ​ប្រជាជន​យើង​មែន​ទេ វា​ដូចជា​ខ្មែរ​យើង​នៅ​ឆ្នាំ​១៩៧៥​។ សម្ដេច ហ៊ុន សែន ថ្លែង​ថា រឿង​អស់​ទាំង​នេះ​ត្រឹមតែ​រដ្ឋមន្ត្រី​ក្រសួងមហាផ្ទៃ​ដោះស្រាយ​បាន​ហើយ​។ ព្រោះ​បញ្ហា​អន្តោប្រវេសន៍​ជា​សមត្ថកិច្ច​របស់​ក្រសួងមហាផ្ទៃ​ចាត់ចែង​ទៅ​វា​ចប់​ហើយ​។ ប៉ុន្តែ​ជន​ជាតិ​ខ្មែរ​យើង​ខ្លះ​ស្គាល់​មិន​គ្រប់​អំពី​អធិបតេយ្យ​ទេ​៕

​ស្នាយ​ពល​

​ ​

​