ក្រចេះ ៖ ក្រុមត្រួតពិនិត្យចល័តខេត្តក្រចេះបានសម្រេចធ្វើការចាប់ឃាត់ថ្លឹងរថយន្តធុនធំ ដែលមានផ្ទុកឈើលើសទម្ងន់កំណត់ និងធ្វើការផាកពិន័យអន្តរកាល ដោយតម្រូវឲ្យថៅកែចូលខ្លួនបង់ពិន័យចាប់ពី១០ទី២០ភាគរយតាមច្បាប់កំណត់ និងកំណត់លើកផ្ទេរឈើដែលផ្ទុកលើសឲ្យសមស្របទៅតាមទម្ងន់ដែលច្បាប់បានកំណត់។
ការចុះអនុវត្តច្បាប់របស់មន្ត្រីជំនាញធ្វើឡើងចាប់យប់ថ្ងៃទី២១ ដល់ថ្ងៃទី២៣ ខែកុម្ភៈ ហើយការចុះបង្ក្រាបរថយន្តធុនធំដឹកឈើលើសទម្ងន់កំណត់ មន្ត្រីជំនាញគឺបានចាប់ឃាត់រថយន្តថ្លឹងបាន ចំនួន៧គ្រឿង ហើយរថយន្តទាំងនេះត្រូវបានមន្ត្រីជំនាញធ្វើការថ្លឹងទម្ងន់ដោយរកឃើញថាសុទ្ធតែ មានផ្ទុកលើសទម្ងន់ដូចគ្នា និងសម្រេចឲ្យម្ចាស់ចូលខ្លួនមកបង់ពិន័យ។
បើតាមមន្ត្រីនៃមន្ទីរសាធារណៈការបានឲ្យដឹងថា រថយន្តទាំងនេះបានផ្ទុកលើសទម្ងន់កំណត់ក្នុងចន្លោះពី៨តោនទៅដល់ជាង៣០តោន ក្នុងមួយរថយន្ត ហើយការបង់ពិន័យអន្តរកាលក៏នឹងអាចធ្វើការផាកពិន័យទៅតាមច្បាប់ និងផែនការកំណត់របស់ក្រសួងផងដែរ។
បើតាមមន្ត្រីនៃមន្ទីរសាធារណការ និងដឹកជញ្ជូនខេត្តដែលមាននាទីលើការដឹកនាំក្រុមត្រួតពិនិត្យចល័តពិសេសខេត្តក្នុងការចុះបង្ក្រាបរថយន្តលើសទម្ងន់ទាំងនេះបានបញ្ជាក់ថា ផ្អែកតាមផែនការរបស់ក្រសួង និងគណៈបញ្ជាការឯកភាពខេត្ត រថយន្តទាំងនេះ ត្រូវក្រុមការងារចុះបង្ក្រាបបាននៅកន្លែងផ្សេងគ្នា។
ប្រភពបន្តឲ្យដឹងទៀតថា នេះជាប្រតិបត្តិការជាទ្រង់ទ្រាយធំហើយជាលើកទី១របស់ខេត្តក្រចេះ ក្រោយពីក្រុមត្រួតពិនិត្យចល័តពិសេសខេត្តទទួលបានផែនការអនុវត្តពីក្រសួងដែលតម្រូវឲ្យចុះអនុវត្តទប់ស្កាត់ការដឹកលើសទម្ងន់តាំងពីចុងខែមករា ឆ្នាំ២០១៥កន្លងទៅនេះ។
ជាមួយនឹងកាចុះបង្ក្រាបខាងលើនេះ ឈ្មួញជាថៅកែស្រីម្នាក់ដឹកឈើជំនៀរ ដែលគាត់ទិញម៉ៅពីក្រុមហ៊ុនក្នុងតម្លៃថោកបាននិយាយថា ចំពោះចំណាត់ការរបស់មន្ត្រីជំនាញ គឺហាក់បីដូចជា មិនស្មើភាពសោះ ដោយគេអនុវត្តតែទៅលើក្រុមឈ្មួញតូចតាចដែលគ្មានលទ្ធភាពប៉ុណ្ណោះ រថយន្តរបស់គាត់ ដឹកឈើជំនៀរមិនពេញផង ហើយបានបង់លុយឲ្យក្រុមជញ្ជីងស្នួលរាល់ជើង ត្រង់គាត់ដាក់បន្តិចសោះ ចាប់ថ្លឹងដែរ រីឯរថយន្តដឹកដំឡូងមីធំៗ និងរថយន្តដឹកឈើរបស់ក្រុមហ៊ុនធំៗ ដឹកចង់ស្រុតផ្លូវអត់ឃើញចាប់ថ្លឹងផង។
ថៅកែស្រីបានបន្តថា ទោះជាណាគាត់មិនខឹងទេ តែសូមឲ្យមន្ត្រីជំនាញធ្វើឲ្យស្មើភាពផង កុំអនុវត្តតែអ្នករកស៊ីតូចតាច ចំណែកមេ ឈ្មួញធំៗដឹកដំឡូងមីខ្នាតធំៗ និងរថយន្តដឹកឈើៗសូមអនុវត្តន៍ឲ្យមានតម្លាភាពផង៕
ម៉េង ហ៊ាង
0 Comments