ភ្នំពេញ ៖ រថយន្តម៉ាកលុច្យស៊ីស៣០០ បុកម៉ូតូពីស្រុកពញាឮ ខេត្តកណ្តាល បើករត់គេចមកបុកម៉ូតូនៅសង្កាត់ព្រែកព្នៅ ខណ្ឌព្រែកព្នៅ កើលទៅមុខលែងរួច ទើបប្រជាពលរដ្ឋឃាត់ខ្លួនបាន កាលពីវេលាម៉ោង៧និង២០នាទីយប់ ថ្ងៃទី២១ ខែកុម្ភៈ ឆ្នាំ២០១៥ នៅតាមបណ្តោយផ្លូវជាតិលេខ៥ ត្រង់ចំណុចភូមិព្រែកតាទែន ស្រុកពញាឮ ខេត្តកណ្តាល និងត្រង់ចំណុចភូមិឌួង ស្ថិតក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
សមត្ថកិច្ចប៉ូលិសប៉ុស្តិ៍ព្រែកព្នៅបានឱ្យដឹងថា ជនរងគ្រោះដែលរងរបួសក្នុងហេតុការណ៍លើកទី១ក្នុងភូមិព្រែកតាទែន ស្រុកពញាឮ ខេត្តកណ្តាល មិនត្រូវបានគេស្គាល់ឈ្មោះឡើយ ជិះម៉ូតូ២នាក់ រងរបួសធ្ងន់ម្នាក់ ស្រាលម្នាក់។ ចំណែកជនរងគ្រោះលើកទី២ នៅចំណុចភូមិឌួង ស្ថិតក្នុងសង្កាត់ព្រែកព្នៅ ខណ្ឌព្រែកព្នៅ ឈ្មោះ ឈួន នឿន ភេទប្រុស អាយុ៤៩ឆ្នាំ មុខរបរកសិករ មានទីលំនៅក្នុងភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល ជិះម៉ូតូម៉ាកសង់សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CJ 60 01។
ដោយឡែកជនបង្កក្នុងហេតុការណ៍នេះឈ្មោះ ជា តារា ភេទប្រុស អាយុ៣៨ឆ្នាំ មុខរបរបុគ្គលិកធនាគារអេស៊ីលីដា មានទីលំនៅក្នុងខណ្ឌទួលគោក រាជធានីភ្នំពេញ បើករថយន្តម៉ាកលុច្យស៊ីស៣០០ ពណ៌ស ពាក់ស្លាកលេខ ភ្នំពេញ 2E 8377 បើកបរក្នុងស្ថានភាពស្រវឹង ទិសដៅពីជើងមកត្បូង។ ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ជិះម៉ូតូម៉ាកសង់សេ១២៥មួយគ្រឿង ក្នុងទិសដៅពីត្បូងទៅជើង លុះមកដល់ចំណុចកើតហេតុស្រាប់តែមានរថយន្តម៉ាកលុច្យស៊ីស៣០០ បើករ៉េពេញផ្លូវបញ្ច្រាសទិសជាមួយម៉ូតូ ក្នុងស្ថានភាពស្រវឹងផង និងមានម៉ូតូជាច្រើនគ្រឿងជិះតាមពីក្រោយផង។
ប្រភពបន្តថា នៅក្នុងខណៈរថយន្តបង្កបើកបរក្នុងល្បឿនលឿនមិនប្រយ័ត្ននោះ ក៏រ៉េចង្កូតមកខាងឆ្វេងដៃបុកម៉ូតូជនរងគ្រោះដែលបើកនៅខាងស្តាំដៃ បណ្ដាលឲ្យម៉ូតូខ្ទាតចូលកង់រថយន្តទៅមុខលែងរួច ចំណែកឯជនរងគ្រោះរងរបួសស្រាលតែសន្លប់ដោយសារភ័យនឹងហេតុការណ៍នេះខ្លាំងពេក រីឯជនបង្កមិនមានរងរបួសអ្វីឡើយ ភ្លាមៗនោះត្រូវបានប្រជាពលរដ្ឋឃាត់ខ្លួនប្រគល់ឲ្យសមត្ថកិច្ចប៉ូលិស។
ក្រោយកើតហេតុ ជនបង្កនិងរថយន្ត ព្រមទាំងម៉ូតូជនរងគ្រោះត្រូវបានសមត្ថកិច្ចបញ្ជូន យកទៅរក្សាទុកនៅចរាចរណ៍ក្រុង រង់ចាំដោះស្រាយទៅតាមផ្លូវច្បាប់៕
ឧត្តរ៉ា
0 Comments