បន្ទាយមានជ័យ ៖ សមត្ថកិច្ចហាក់ដូចជាព្រងើយកន្តើយក្នុងរឿងគ្រោះថ្នាក់ចរាចររថយន្តដឹកទំនិញ ដែលបើកបុកឆេះផ្ទះរហូតដល់ជនរងគ្រោះជាម្តាយម្ចាស់ផ្ទះរងរបួសដល់ស្លាប់ ហើយនៅតែជនបង្កមិនទាន់ត្រូវបានចាប់ខ្លួន ចំណែកឯសំណងរដ្ឋប្បវេណីនៅតែមិនទាន់បាននៅឡើយ។
ម្តាយម្ចាស់ផ្ទះឈ្មោះ ក្រួច ថន អាយុ៧០ឆ្នាំ ដែលត្រូវភ្លើងឆាបឆេះ បន្ទាប់ពីរថយន្តដឹកទំនិញមួយគ្រឿងបើកបុកផ្ទះលក់គ្រឿងទេស ភេសជ្ជះ និងសាំង បណ្ដាលឲ្យឆេះ កាលពីថ្ងៃទី០៥ ខែកុម្ភៈ ឆ្នាំ២០១៥ ត្រង់ចំណុចមុខសាលាក្រុងសិរីសោភ័ណ ត្រូវបានស្លាប់បានពីថ្ងៃទី១២ ខែកុម្ភៈ ឆ្នាំ២០១៥ ។ កូនជនរងគ្រោះ២នាក់ប្ដីប្រពន្ធឈ្មោះ ថន ខែម និងឈ្មោះ សុជាតិ បានឲ្យដឹងថា ចាប់តាំងពីថ្ងៃកើតហេតុរហូតដល់ម្តាយរបស់ខ្លួនស្លាប់ពួកខ្លួនមិនបានទួលសំណងណាមួយពីម្ចាស់រថយន្ត ឬក៏ជនបង្កឡើយ ហើយក្នុងនោះជនបង្កក៏មិនទាន់ត្រូវបានសមត្ថកិច្ចឃាត់ខ្លួន ឬអនុវត្តទៅតាមច្បាប់ឡើយ ។ កាលដែលរថយន្តបុកឆេះផ្ទះរបស់ខ្លួន និងទ្រព្យសម្បត្តិជាច្រើន និងស្លាប់ម្តាយខ្លួននោះ ខ្លួនបានទាសំណងពីជនបង្កចំនួន១០ម៉ឺនដុល្លារ។ ជនរងគ្រោះបានស្នើឲ្យខាងសមត្ថកិច្ចនគរបាលចរាចរជើងគោក និងតុលាការ មេត្តាចាត់ការរឿងនេះឲ្យបានឆាប់ ដើម្បីផ្តល់សំណងរដ្ឋប្បវេណី និងភាពយុត្តិធម៌ជូនជនរងគ្រោះ។
តាមការឲ្យដឹងពីរថយន្តដែលបង្កត្រូវបានគេស្គាល់ថា ជារបស់ឈ្មោះ គីម នៅក្នុងសង្កាត់កំពង់ស្វាយ ក្រុងសិរីសោភ័ណ ជាអ្នកដឹកទំនិញទៅមកពីភ្នំពេញ-បន្ទាយមានជ័យ។
លោក សួន នីប៉ូ នាយរងការិយាល័យនគរបាលចរាចរជើងគោកនៃស្នងការនគរបាលខេត្តបន្ទាយមានជ័យបានឲ្យដឹងនៅព្រឹកថ្ងៃទី២៣នេះថា ដោយការទាមទារសំណងពីជនរងគ្រោះមានទំហំធំធេង រហូតដល់១០ម៉ឺនដុល្លារ និងការិយាល័យទើបតែទទួលបានសំណុំរឿងនេះពីអធិការក្រុងសិរីសោភ័ណ ការិយាល័យជំនាញនឹងបញ្ជូនទៅតុលាការវិនិច្ឆ័យទៅតាមច្បាប់។ លោកក៏បានបន្តឲ្យដឹងទៀតថា យោងតាមច្បាប់ចរាចរថ្មី និងចាស់ ជនបង្កដែលបង្កគ្រោះថ្នាក់ចរាចរ ខូចខាតទ្រព្យសម្បត្តិ និងប៉ះពាល់ដល់អាយុជីវិតនឹងត្រូវផ្ដន្ទាទោសជាប់ពន្ធនាគារទៅតាមការវិនិច្ឆ័យរបស់តុលាការ៕
អ,ពៅ
0 Comments