កំពង់ឆ្នាំង ៖ មនុស្ស២ទៅ៣នាក់កំពុងត្រូវបានលោកនាយកសាលា និងអាជ្ញាធរឃុំ/ស្រុកស្វែងរកមុខឲ្យមកបកស្រាយបំភ្លឺ និងឲ្យទទួលខុសត្រូវក្នុងការលួចវាយអាគារថ្មសាលាមត្តេយ្យទ្រុឌទ្រោមមួយកន្លែងតាមទំនើងចិត្ត ដែលជាទ្រព្យសម្បត្តិសាធារណៈរបស់រដ្ឋនៃមន្ទីរអប់រំខេត្ត។ ការវាយអាគារសាលាមត្តេយ្យទ្រុឌទ្រោមខាងលើនេះ បានកើតឡើងនៅវេលាម៉ោង៣និង៣០នាទីរសៀល ថ្ងៃទី២៧ ខែមករា ឆ្នាំ២០១៥ ស្ថិតនៅក្នុងភូមិចំការឃ្លៃ ឃុំស្វាយជ្រំ ស្រុករលាប្អៀរ។
នៅព្រឹកថ្ងៃទី០៤ ខែកុម្ភៈ ឆ្នាំ២០១៥ លោក សោម វឺន អភិបាលស្រុករលាប្អៀរបាននិយាយឲ្យដឹងថា ទាក់ទងនឹងរឿងខាងលើនេះ នៅថ្ងៃទី០៣ ខែកុម្ភៈនេះ លោកបានទទួលរបាយការណ៍មួយច្បាប់របស់លោក អូង ចាន់បូណ៌ ប្រធានការិយាល័យអប់រំយុវជននិងកីឡាស្រុករលាប្អៀរ បានរាយការណ៍ឲ្យដឹងថា នៅថ្ងៃទី០២ ខែកុម្ភៈ ឆ្នាំ២០១៥ ក្រុមការងារចំរុះបានចុះត្រួតពិនិត្យដី និងអាគារទ្រុឌទ្រោមរបស់មត្តេយ្យសាលាស្វាយជ្រំ ដែលត្រូវបានគេវាយបំផ្លាញរួចអស់ទៅហើយ ដែលសាលាមត្តេយ្យនេះមានទំហំ៥២៣ម៉ែត្រការ៉េ អាគារមានសភាពបែកបាក់នៅតែគ្រឹះសសរ និងជញ្ជាំងបន្តិចបន្តួចគ្មានដំបូលទេ ប៉ុន្តែបានបញ្ចូលក្នុងបញ្ជីសារពើភ័ណ្ឌជាទ្រព្យសម្បត្តិរដ្ឋរួចហើយ។ នៅក្នុងរបាយការណ៍នេះលោក ជា ណុំ ជានាយករងសាលាបឋមសិក្សាស្វាយជ្រំបានឲ្យដឹងថា កាលពីថ្ងៃទី២៥ ខែមករា ឆ្នាំ២០១៥ ប្រពន្ធលោក អៀ គុយម៉ុង ហៅក្តាន់ បានមកសុំធ្វើការឈូសឆាយទីធ្លានេះដើម្បីយកកន្លែងធ្វើបុណ្យ តែលោក ជា ណុំ បានប្រាប់ថាគាត់មិនហានអនុញ្ញាតិធ្វើការឈូសឆាយទេ។ លុះដល់ថ្ងៃទី២៧ ខែមករា ឆ្នាំ២០១៥ វេលាជាងម៉ោង៥ល្ងាចលោកគ្រូ នុត សារ៉ា បានឃើញគ្រឿងចក្រកំពុងធ្វើសកម្មភាពឈូសឆាយអាគារនោះរាបដល់ដីទៅហើយ។ នៅព្រឹកថ្ងៃទី២៨ លោក ស៊ីវ ចាន់ផល នាយកសាលាបឋមសិក្សាស្វាយជ្រំបានធ្វើលិខិតជូនដំណឹងទៅលោកមេឃុំស្វាយជ្រំជួយចាត់ចែង និងអញ្ជើញសាមីជនមកបំភ្លឺ ព្រោះថាដីសាលាមត្តេយ្យនេះជាទ្រព្យសម្បត្តិរបស់រដ្ឋ ពុំមានលោកគ្រូណាម្នាក់មានសិទ្ធលក់ដីសាលាមត្តេយ្យនេះឡើយ ទោះបីអាគារនោះទ្រុឌទ្រោមគ្មានសិស្សរៀនក៏ដោយ។
នៅព្រឹកថ្ងៃទី០៤ ខែកុម្ភៈ ឆ្នាំ២០១៥ អ្នកយកព័ត៌មានយើងបានជួបសម្ភាសផ្ទាល់ជាមួយលោក យី ភួន មេឃុំស្វាយជ្រំនៅក្នុងសាលាឃុំស្វាយជ្រំ លោកបានបញ្ជាក់ឲ្យដឹងថា ការលួចឈូសឆាយអាគារសាលាមត្តេយ្យស្វាយជ្រំនេះ លោកមិនបានដឹងឡើយ។ ក្នុងរឿងនេះក៏មានប្រជាពលរដ្ឋ ជាច្រើននាក់បានសង្ស័យនិងរិះគន់ថា លោកឃុបឃិតលក់ដីនេះជាមួយលោកគ្រូៗឲ្យគេហើយ ទើបគេហានឈូសឆាយអាគារសាលាមត្តេយ្យនេះ។ ក្នុងរឿងនេះលោកសូមបញ្ជាក់ឲ្យច្បាស់ថា លោកមិនបានឃុបឃិតលក់ដីសាលានេះឡើយ ប្រសិនបើមានការពាក់ព័ន្ធក្នុងការលក់ដីនេះមែននោះ លោកនឹងចេញមុខទទួលខុសត្រូវចំពោះមុខច្បាប់មិនរាថយឡើយ។
នៅល្ងាចថ្ងៃទី០៤ ខែមករា ឆ្នាំ២០១៥ លោក អៀ គុយម៉ុង ហៅក្តាន់ និងប្រពន្ធឈ្មោះ ឃូ សុខឆេង រស់នៅភូមិស្វាយជ្រំថ្មី ឃុំស្វាយជ្រំ ដែលត្រូវបានរងការចោទប្រកាន់ក្នុងរឿងឈូសផ្ដួលសាលាមត្តេយ្យខាងលើនេះបានបំភ្លឺឲ្យអ្នកយកព័ត៌មានយើងដឹងថា លោកទាំង២នាក់ប្ដីនិងប្រពន្ធមិនមែនជាអ្នកឲ្យគេវាយឈូសឆាយទេ។ សាលានេះ ជាដីចំណីផ្លូវ បើរដ្ឋកសាងផ្លូវចេញពីអាក់ផ្លូវជាតិ៣០ម៉ែត្រតាមគំរោងមែននោះ គឺប៉ះដីសាលានេះទាំងអស់គ្មានសល់មួយម៉ែត្រឡើយ ហើយលោកក៏មិនបានទិញដីសាលាមត្តេយ្យនេះពីអ្នកណាដែរ។ កន្លងមកអាគារទ្រុឌទ្រោមនេះជាសំបុកអ្នកជក់គ្រឿងញៀនរៀងរាល់យប់ ដែលប្រជាពលរដ្ឋក្នុងភូមិសុំឲ្យលោកគ្រូៗវាយចោលយូរហើយ ខ្លាចបាក់សង្កត់ក្មេងៗ។
ទាក់ទងនិងរឿងនេះកាលពីថ្ងៃទី២៥ ខែមករា ស្ត្រីឈ្មោះ ឃូ សុខឆេង បានជូនបងស្រីម្នាក់ឈ្មោះធី (ប្រពន្ធលោក កែន ជាជំទប់ទី២ឃុំស្វាយជ្រំ)ជាអ្នករាប់អានគ្នាក្នុងភូមិ ដែលមានផ្ទះនៅពីក្រោយសាលានោះ ទៅសុំលោក ជា ណុំ នាយករងសាលាបឋមសិក្សាស្វាយជ្រំវាយអាគារទ្រុឌទ្រោមនេះចោល ដើម្បីយកកន្លែងធ្វើរោងបុណ្យក្នុងពេលខាងមុខ ពេលនោះលោក ជា ណុំ បានយល់ព្រមតែមិនបានធ្វើលិខិតស្នាមអីទេ ហើយនៅពេលស្ត្រីឈ្មោះធី ជួលគ្រឿងចក្រមកវាយនៅល្ងាចថ្ងៃទី២៧ ខែមករា ម្ចាស់គ្រឿងចក្រមិនទាំងយកថ្លៃឈ្នួលវាយអាគារនោះថែមទៀតផង តែបែរជាលោក ជា ណុំ ថាមិនដឹងមិនអនុញ្ញាតិទៅវិញ។ លោក អៀ គុយម៉ុង បានបញ្ជាក់ទៀតថា លោកគ្រាន់តែជាអ្នកជួយរកជួលគ្រឿងចក្រឲ្យស្ត្រីឈ្មោះធី តែប៉ុណ្ណោះមិនមែនជាអ្នកឲ្យគេវាយអាគារសាលានេះទេ ចំណែកប្រពន្ធគាត់(ឈ្មោះ ឃូ សុខឆេង)គ្រាន់តែជាអ្នកជូនស្ត្រីឈ្មោះ ធី ដែលជាអ្នករាប់អានគ្នាទៅសុំលោក ជាណុំ នាយករងសាលាស្វាយជ្រំប៉ុណ្ណោះ រឿងនេះមិនពាក់ព័ន្ធជាមួយគ្រួសារលោកទេ អ្នកចោទលោកខុសការពិតហើយ៕
(ឈៀង ថារិទ្ធ)
0 Comments