បន្ទាយមានជ័យ ៖ គណៈកម្មាធិការខេត្តបន្ទាយមានជ័យដោះស្រាយទំនាស់ដីធ្លីនៅសាលប្រជុំ ខ នាព្រឹកថ្ងៃទី៤ ខែកុម្ភៈ ឆ្នាំ២០១៥នេះ។ លោក ចុង ផែត អភិបាលរងខេត្តបន្ទាយមានជ័យបានបើកការប្រជុំដោះស្រាយទំនាស់ដីធ្លីចំណុចត្រីកោណលើផ្ទៃដី២.២២២ហិកតា ដែលត្រូវអ្នកមានអំណាចនិងប្រជាពលរដ្ឋ៣ស្រុករំលោភយកធ្វើជាកម្មសិទ្ធិ និងលក់បណ្ដាក់គ្នាដូចខ្យង។
លោក កែវ តារារស្មី មន្ត្រីគណៈកម្មាធិការដោះស្រាយវិវាទដីធ្លីខេត្តបន្ទាយមានជ័យបានមានប្រសាសន៍ថា កិច្ចប្រជុំដោះស្រាយវិវាទដីធ្លីនៅចំណុចភូមិសាស្ត្រត្រីកោណដែលមានផ្ទៃដីចំនួន២.២២២ហិកតា ដែលជាដីសម្បទានសង្គមកិច្ចរបស់រដ្ឋ ត្រូវអ្នកមានអំណាច និងប្រជាពលរដ្ឋមួយចំណែកធំចាប់អង្កាន់ចែកគ្នាលក់យ៉ាងអានាធិបតេយ្យរួមមាន ១.ស្រុកភ្នំស្រុក ២.ស្រុកស្វាយចេក ៣.ស្រុកថ្មពួក។
លោក ចុង ផែត បានមានប្រសាសន៍នៅក្នុងកិច្ចប្រជុំនោះថា ដោយការរំលោភបំពានយកដីសម្បទានសង្គមកិច្ចរបស់រដ្ឋនៅចំណុចភូមិសាស្ត្រត្រីកោណដែលពាក់ព័ន្ធប្រជាពលរដ្ឋស្រុក៣មានស្រុកភ្នំស្រុក ស្រុកស្វាយចេក ស្រុកថ្មពួក ទើបលោកបានកោះហៅអ្នកពាក់ព័ន្ធទាំងអស់ឲ្យមកប្រជុំដោះស្រាយជាបន្ទាន់ ព្រោះលើដីទំនាស់ទៅលើដីសម្បទានសង្គមកិច្ចរបស់រដ្ឋ ត្រូវដោះស្រាយរក្សាទុកជារបស់រដ្ឋ គ្មានអ្នកណាមួយយកធ្វើជាកម្មសិទ្ធិបានឡើយ។ លោក ឆាយ ម៉ឺន តំណាងប្រជាពលរដ្ឋភូមិផ្គាំបានប្រាប់ថា ប្រជាពលរដ្ឋភូមិផ្គាំ ឃុំផ្គាំ ស្រុកថ្មពួក មានចំនួន៥៩៨គ្រួសារ ដែលមានផ្ទៃដី១.១៩៦ហិកតា ដែលធ្វើលើដីសមទានសង្គមកិច្ចរបស់រដ្ឋដែលអាស្រ័យផលតាំងពីឆ្នាំ២០០០រហូតដល់បច្ចុប្បន្ន។ លោក នាម ថាន តំណាងប្រជាពលរដ្ឋភូមិតាត្រៃបានប្រាប់ថា ប្រជាពលរដ្ឋភូមិតាត្រៃឃុំគោកឋិន ស្រុកថ្មពួក មានចំនួន១៦១គ្រួសារ ដែលអាស្រ័យផលលើដីសមទានសង្គមកិច្ចរដ្ឋ៣៥០ហិកតា នៅអំឡុងឆ្នាំ២០១៤។ លោក លី សំអាន បានប្រាប់ថា ដីរបស់លោកមានចំនួន៣៤០ហិកតា ដែលត្រូវបានគាត់ប្រមូលទិញនៅអំឡុងឆ្នាំ២០០៥ដល់២០០៦ ដែលមានឈ្មោះ ប៉ាក សឺង អតីតជាមេឃុំគោកឋិន បច្ចុប្បន្នជាប្រធានក្រុមប្រឹក្សាឃុំគោកឋិន ជាអ្នកណែនាំឲ្យទិញ និងឈ្មោះ វី ធឿន ជាអ្នកប្រមូលទិញពីប្រជាពលរដ្ឋក្នុងឃុំគោកឋិន ស្រុកថ្មពួក។ ទិញបានដីចំនួន៣៤០ហិតាលើដីសម្បទានសង្គមកិច្ចរបស់រដ្ឋ ហើយដីនេះគឺមានលិខិតស្នាមមានពីភូមិ.ឃុំ.ស្រុកទើបហ៊ានទិញ។ លោក ចុង ផែត បាននិយាយថា នៅចំណុចដីធ្លីត្រីកោណមានទំនាសលើផ្ទៃដី២.២២២ហិកតានេះ វាមានទំនាស់ជាច្រើនឆ្នាំមកហើយ ដោយសារតែអ្នកមានលុយ មានអំណាចទិញលក់បន្តបន្ទាប់ធ្វើឲ្យដីនៅចំណុចនេះមានទំនាស់មិនចេះឈប់ លោកនឹងប្រជុំដោះស្រាយឲ្យបានចប់នៅពេលខាងមុខនេះ៕
គង្គា
0 Comments