កំពង់ឆ្នាំង ៖ ស្ត្រីមានផ្ទៃពោះ៤ខែម្នាក់ខូចចិត្តប្រចណ្ឌនឹងប្ដីបានផឹកថ្នាំបំពុលកណ្ដុរប៉ងសម្លាប់ខ្លួន ប៉ុន្តែពេលដឹងទាន់ក្រុមគ្រួសារបានដឹកយ៉ាងប្រញាប់ប្រញាល់បញ្ជូនមកកាន់មណ្ឌលសុខភាពស្រុក និងបានដឹកបន្តបញ្ជូនមកមន្ទីរពេទ្យខេត្តជាបន្តទៀតដើម្បីជួយសង្គ្រោះជីវិតនាង។ ហេតុការណ៍ខាងលើនេះបានកើតឡើងនៅវេលាម៉ោង១និង៣០នាទីរសៀល ថ្ងៃទី០៣ ខែកុម្ភៈ ឆ្នាំ២០១៥ នៅក្នុងភូមិមេលំ ឃុំមេលំ ស្រុកបរិបូណ៌ ខេត្តកំពង់ឆ្នាំង។
ស្ត្រីប៉ងធ្វើអត្តឃាតរូបនោះមានឈ្មោះ ចឹម ស៊ីណា អាយុ២៨ឆ្នាំ មានប្ដីឈ្មោះ សួង គឹមសេង អាយុ៣២ឆ្នាំ គ្រួសារនេះមានទីលំនៅភូមិ/ឃុំកើតហេតុខាងលើ។ ចំពោះមូលហេតុនៃការប៉ងសម្លាប់ខ្លួននេះក្រុមគ្រួសារមិនបានដឹងនោះទេ ប៉ុន្តែតាមការអះអាងរបស់បុរសជាប្ដីដែលបានប្រាប់លោកមេឃុំមេលំនោះថា មុនពេលកើតហេតុប្រពន្ធគាត់ជាមួយស្រីៗអ្នកភូមិជាមួយគ្នា៤-៥នាក់បាននាំគ្នាផឹកទឹកត្នោតជូរអស់ច្រើនល្មមដែរនៅផ្ទះអ្នកជិតខាងក្នុងភូមិ។
ក្នុងពេលនោះរូបគាត់ជាប្ដីបានត្រឡប់មកពីស្រែវិញ ក៏ត្រូវស្រីៗដែលកំពុងនៅផឹកជាមួយប្រពន្ធគាត់បានហៅគាត់ឲ្យចូលផឹកជាមួយគ្នា ហើយគាត់ក៏ចូលផឹកជាមួយបានតែមួយកែវ និងកំពុងនិយាយគ្នាលេងក៏ស្រាប់តែបាត់ប្រពន្ធគាត់មិនដឹងទៅណា បន្តិចក្រោយមកមានគេរត់មកប្រាប់គាត់ថា ប្រពន្ធគាត់បានទៅផឹកថ្នាំបំពុលសត្វកណ្ដុរកំពុងប្រកាច់នៅក្នុងផ្ទះ ភ្លាមៗនោះដែរគាត់ប្រញាប់រត់ទៅផ្ទះ និងបានស្រែកអ្នកជិតខាងក្នុងភូមិឲ្យជួយដឹកនាងយកទៅពេទ្យស្រុកបរិបូណ៌ជួយសង្គ្រោះនាង។ សមត្ថកិច្ចមូលដ្ឋានបាននិយាយឲ្យដឹងថា ពេលប្ដីមកចូលផឹកជាមួយនោះប្រពន្ធបានខឹងនឹងប្ដី ព្រមជាមួយគ្នានោះមានស្រីៗញោះឌឺដងដាក់ប្ដីលលេងផងនោះ ទើបនាងប្រចណ្ឌ ហើយបានគេចត្រឡប់មកផ្ទះមុន និងបានយកថ្នាំបំពុលកណ្ដុរផឹកប៉ុនប៉ងធ្វើអត្តឃាតខ្លួនឯងតែម្តង ព្រោះភ្លើងប្រចណ្ឌ។ ក្រុមគ្រូពេទ្យខេត្តដែលកំពុងជួយសង្គ្រោះបាញ់ទឹកបញ្ចូលលាងក្រពះឲ្យនាងបាននិយាយអោយដឹងថា ស្ត្រីប៉ងធ្វើអត្តឃាតរូបនេះកំពុងស្ថិតក្នុងការសង្គ្រោះជីវិតជាបន្ទាន់ ចំណែកទារកក្នុងផ្ទៃពោះនាងដែលទើបតែមានអាយុ៤ខែនោះ គេមិនអាចសន្និដ្ឋានបានថាទារកនោះជោគវាសនាយ៉ាងណានោះទេ ប្រហែលជាសង្ឃឹមជួយសង្គ្រោះទារកនោះបានតិចតួចណាស់៕
( ឈៀង ថារិទ្ធ )
0 Comments