បន្ទាយមានជ័យ ៖ នគរបាលការិយាល័យប្រឆាំងគ្រឿងញៀនខេត្តបន្ទាយមានជ័យនិងនគរបាលក្រុងប៉ោយប៉ែតបានឃាត់ខ្លួនជនសង្ស័យប្រុសស្រី៣នាក់ពេលបង្ក្រាបគ្រឿងញៀនមួយ កាលពីម៉ោង៥និង១៥នាទីល្ងាច ថ្ងៃទី៥ ខែកុម្ភៈ ឆ្នាំ២០១៥ នៅចំណុចក្បែរអាងចិញ្ចឹមក្រពើភូមិគីឡូម៉ែត្រលេខ៤ សង្កាត់ផ្សារកណ្ដាល និងបន្តទៅឆែកឆេរបន្ទប់លេខ១២៥នៃផ្ទះជួលមួយនៅភូមិក្បាលកោះសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ លោកវរសេនីយ៍ ធិន ស៊ិនដេត នាយការិយាល័យនគរបាលប្រឆាំងបទល្មើសគ្រឿងញៀនខេត្តបានឲ្យដឹងថា បទបញ្ជានិងការចង្អុលបង្ហាញរបស់លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ លោកបានដឹកនាំកម្លាំងនគរបាលជំនាញសហការនឹងកម្លាំងនគរបាលក្រុងប៉ោយប៉ែតបានចុះបង្ក្រាបករណីបទល្មើសគ្រឿងញៀនតាមមុខសញ្ញាស្រាវជ្រាវដូចវេលានិងទីតាំងខាងលើ។
លោកនិយាយបន្តថា ជនសង្ស័យ៣នាក់នោះរួមមាន ១-ឈ្មោះ ហង្ស សូគា ភេទប្រុស អាយុ ២៨ឆ្នាំ លំនៅភូមិគីឡូម៉ែត្រលេខ៤ សង្កាត់ផ្សារកណ្ដាល។ ២-ឈ្មោះ សាត សីហា ភេទប្រុស អាយុ ២៧ឆ្នាំ លំនៅភូមិយាងថ្មី សង្កាត់និមិត្ត និង៣-ឈ្មោះ សុខ ស្រីរ័ត្ន ភេទស្រី អាយុ២៣ឆ្នាំ លំនៅភូមិឫស្សីលើ សង្កាត់ផ្សារកណ្ដាល។ សង្កាត់ទាំងនេះនៅក្រុងប៉ោយប៉ែត។ ការបង្ក្រាបបន្តបានស៊ីពេលដល់ម៉ោង៧និង៣០នាទីយប់បន្ទាប់ពីឃាត់ខ្លួនជនសង្ស័យទាំង៣នាក់ ដោយសារបន្តទៅឆែកឆេរបន្ទប់ជួលលេខ១២៥នៃផ្ទះជួលក្បែរហាងលក់ទូរស័ព្ទយីហោ "វុយ សេង" ស្ថិតនៅភូមិក្បាលកោះ។ គឺទីនោះហើយដែលត្រូវរឹបអូសរថយន្តតូយ៉ូតាឆ្លាម១គ្រឿងពណ៌ស្លូញចង្កូតឆ្វេង និងវត្ថុតាងមួយចំនួនជាក់ស្តែងដូចជា ម្សៅក្រាមពណ៌ស៩ថង់ ក្នុងនោះថង់ធំ១ និងថង់តូច៨ ថ្នាំគ្រាប់ពណ៌ក្រហម១គ្រាប់១ចំហៀង សំបកថង់១ដុំ ដែកកេះ៥ដបកែច្នៃ។ លោកបន្តថា ជនសង្ស័យទាំង៣នាក់ត្រូវបានបញ្ជូនទៅតុលាការខេត្តបន្ទាយមានជ័យដាក់ទោសទៅតាមផ្លូវច្បាប់៕
គង្គា
0 Comments