ភ្នំពេញ ៖ យុវជនម្នាក់ត្រូវបានសមត្ថកិច្ចប៉ូលិសខណ្ឌទួលគោកធ្វើការឃាត់ខ្លួន ក្នុងខណៈពេលដែលយុវជនម្នាក់នេះជិះម៉ូតូតាមដងផ្លូវជួបនឹងកម្លាំងចម្រុះដាក់គោលដៅឆែកឆេរអាវុធជាតិផ្ទុះ ហើយស្របពេលនោះបានជិះម៉ូតូរត់គេចខ្លួន ទើបប៉ូលិសដេញចាប់បាន និងបានរកឃើញថ្នាំញៀននៅជាប់ខ្លួនតែម្តង។
ជនសង្ស័យម្នាក់ត្រូវបានសមត្ថកិច្ចប៉ូលិសខណ្ឌទួលគោកធ្វើការឃាត់ខ្លួនបានកាលពីរាត្រីថ្ងៃទី២៤ ខែកុម្ភៈ វេលាម៉ោងប្រមាណ២១និង២០នាទីនៅចំណុចមុខហាងលក់ម៉ូតូហុងដា ស្ថិតនៅតាមបណ្តោយផ្លូវម៉ៅសេទុង សង្កាត់បឹងសាឡាង ខណ្ឌទួលគោក។ ជនសង្ស័យត្រូវបានសមត្ថកិច្ចប៉ូលិសប្រាប់ឲ្យស្គាល់ឈ្មោះ យ៉ង ពុធ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលគ្មានលេខ ផ្លូវលំ ភូមិទួលគោក សង្កាត់ទួលសង្កែ ខណ្ឌឫស្សីកែវ ហើយក្នុងការឃាត់ខ្លួនជនសង្ស័យម្នាក់នេះ ប៉ូលិសដកហូតបានថ្នាំញៀនប្រភេទម៉ាទឹកកកចំនួន០១កញ្ចប់ រួមនឹងម៉ូតូម៉ាកហុង ដាសេ125 ពណ៌ខ្មៅ គ្មានស្លាកលេខមួយគ្រឿង។
មន្ត្រីប៉ូលិសខណ្ឌទួលគោកបានឲ្យដឹងថា នៅមុនពេលកើតហេតុគឺកម្លាំងចម្រុះរបស់គណៈបញ្ជាការឯកភាពខណ្ឌទួលគោកបានដាក់គោលដៅធ្វើការឆែកឆេរអាវុធជាតិផ្ទុះ ត្រួតពិនិត្យម៉ូតូអត់ស្លាកលេខ កញ្ចក់មើលក្រោយ បកកញ្ចក់រថយន្តបិតស្គុតខ្មៅ និងពិនិត្យជាតិអាកុលនៅចំណុចមុខហាងលក់ម៉ូតូហុងដា ស្ថិតនៅតាមបណ្តោយផ្លូវម៉ៅសេទុង សង្កាត់បឹងសាឡាង ខណ្ឌទួលគោក ស្របពេលនោះ ក៏ស្រាប់តែមានជនសង្ស័យ២នាក់ជិះម៉ូតូមួយគ្រឿងចូលមកក្នុងគោលដៅឆែកឆេរនេះ តែនៅពេលឃើញកម្លាំងមានសមត្ថកិច្ចភ្លាមជនសង្ស័យទាំង២នាក់មិនបានឈប់ម៉ូតូឲ្យកម្លាំងមានសមត្ថកិច្ចធ្វើការត្រួតពិនិត្យនោះទេ តែបែរជាបន្ថែមល្បឿនដើម្បីរត់គេចទៅវិញ។ ឃើញដូច្នេះប៉ូលិសក៏បានជិះម៉ូតូដេញតាមរហូតធ្វើការឃាត់ខ្លួនបានម្នាក់ រួមនឹងថ្នាំញៀនមួយកញ្ចប់ ចំណែកបក្ខពួកម្នាក់ទៀតបានគេចខ្លួនបាត់។
បច្ចុប្បន្នជនសង្ស័យរូបនេះ ត្រូវបានឃុំខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់៕
ស្រីរ័ត្ន
0 Comments