កំពង់ធំ ៖ ហេតុការណ៍បង្កឲ្យមានការភ្ញាក់ផ្អើលមួយបានបង្កឲ្យមានការជ្រួលច្របល់ ដោយសារតែមានមនុស្សម្នាក់ទៅបង់ត្រី ត្រូវបានឆក់ខ្សែភ្លើងស្លាប់យ៉ាងអាណោចអាធ័មនៅកណ្ដាលវាលស្រែ ស្ថិតនៅចំណុចកោះតាវាំង ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ចម្ងាយពីស្រុកបារាយណ៍៣០គីឡូម៉ែត្រ។
ហេតុការណ៍នេះបានកើតឡើងកាលពីវេលាម៉ោង១៦ ថ្ងៃទី២៤ ខែកុម្ភៈ ឆ្នាំ២០១៥ ជនរងគ្រោះត្រូវបានគេស្គាល់ឈ្មោះ ឃាង នឹង ភេទប្រុស អាយុ២៣ឆ្នាំ រស់នៅភូមិប្រនាគ ឃុំចើងដើង ស្រុកបារាយណ៍ ខេត្តកំពង់ធំ តាមការរៀបរាប់របស់សាច់ញាតិជនរងគ្រោះបានឲ្យដឹងថា មុនពេលកើតហេតុ ជនរងគ្រោះបានទៅបង់សំណាញ់ក្នុងប្រឡាយទឹក ក៏បានប៉ះនឹងខ្សែភ្លើងរាយខ្សែភ្លើងសម្រាប់ចាប់សត្វកណ្ដុរ ជនរងគ្រោះបានឆក់ស្លាប់ភ្លាមៗនៅនឹងនៅក្នុងប្រឡាយទឹក។
លោក កែ ខាន់ណារ៉ា ស្នងការរងទទួលព្រហ្មទណ្ឌបានឲ្យដឹងថា ករណីឆក់ខ្សែភ្លើងស្លាប់ ដោយជនរងគ្រោះបានដើរទៅប៉ះនឹងខ្សែភ្លើងសម្រាប់យកសត្វកណ្ដុរ ក្រោយពីទទួលបានព័ត៌មាននេះភ្លាម លោកបានដឹកនាំកម្លាំងចុះទៅទាំងកណ្ដាលអាធ្រាត្រទៅពិនិត្យកន្លែងកើតហេតុ ដែលនៅ ផ្នែកទន្លេសាប មុនពេលសមត្ថកិច្ចចុះទៅដល់ជនសង្ស័យដែលបានរាយខ្សែភ្លើងនោះបានរត់គេចខ្លួនបាត់ហើយ តែសមត្ថកិច្ចបានស្គាល់ជនសង្ស័យឈ្មោះ សាយ ភេទប្រុស អាយុ៣៥ឆ្នាំ ទីលំនៅមិនទាន់ច្បាស់ តែនៅខេត្តស្វាយរៀងមកធ្វើស្រែប្រាំងនៅចំណុចកើតហេតុ ហើយបានយកខ្សែលួសមករុំព័ទ្ធស្រែសម្រាប់ឆក់កណ្ដុរ ដើម្បីកុំឲ្យស៊ីស្រូវ ចំណែកជនរងគ្រោះបានដើរបង់សំណាញ់នៅតាមប្រឡាយហើយបានទាក់ខ្សែលួស ឆក់ស្លាប់ទៅ ខណៈនេះសមត្ថកិច្ចដុតដៃដុតជើងតាមរកជនបង្កហេតុមកទទួលទោសតាមផ្លូវច្បាប់។ លោកបានបន្តថា ករណីនេះ គឺជាឃាតកម្មដោយអចេតនា ។ គួរបញ្ជាក់ផងដែរថា ករណីប្រើប្រាស់ឧបករណ៍ឆក់ត្រីនេះ ឬឆក់សត្វកណ្ដុរនេះបានធ្វើឲ្យមាន មនុស្សជាច្រើននាក់បានស្លាប់បាត់បង់ជីវិតជាច្រើននាក់មកហើយ គឺបណ្ដាលមកពីការធ្វេសប្រហែស ចំណែកជនល្មើសខ្លះបានយកឧបករណ៍ទាំងនេះ ធ្វើជាអាវុធសម្រាប់តតាំងជាមួយនឹងសមត្ថកិច្ចដែលបានចុះទៅបង្ក្រាប ដូច្នេះសមត្ថកិច្ច និងប្រជាពលរដ្ឋគួរមានការប្រុងប្រយ័ត្នខ្ពស់៕
ប៊ុនរដ្ឋា
0 Comments