ពួកសកម្មជនគ្រឹស្តនិកស៊ីរីបាននិយាយនៅថ្ងៃអង្គារថា ពួកសកម្មប្រយុទ្ធរដ្ឋឥស្លាមបានចាប់ពង្រត់មនុស្សយ៉ាងតិច១៥០នាក់ ពីភូមិគ្រឹស្តនិក Assyrian នៅភាគឥសានប្រទេសស៊ីរីដែលពួកគេបានវាយឆ្មក់។
គ្រឹស្តនិកស៊ីរីមួយក្រុមដែលតំណាងឲ្យអង្គការមិនមែនរដ្ឋាភិបាលជាច្រើននៅខាងក្នុង និងនៅខាងក្រៅប្រទេសនិយាយថា ខ្លួនបានបញ្ជាក់ច្បាស់ថា មនុស្សយ៉ាងតិច១៥០នាក់កំពុងបាត់ខ្លួនក្នុងនោះរួមមាន ស្ត្រី មនុស្សចាស់ ដែលត្រូវបានចាប់ពង្រត់ដោយពួកសកម្មប្រយុទ្ធ។
លោកបាសាមអ៊ីសាក(Bassam Ishak) ប្រធានក្រុម ក្រុមប្រឹក្សាជាតិស៊ីរីយ៉ាក់របស់ប្រទេសស៊ីរីដែលគ្រួសាររបស់លោកមកពីហាសាកានោះបាននិយាយប្រាប់រ៉យទ័រ មកពីក្រុងអាម៉ង់ថា "យើងបានបញ្ជាក់ច្បាស់ថា មនុស្សយ៉ាងតិច១៥០នាក់ដែលត្រូវបានគេចាប់ពង្រត់ពីប្រភពផ្សេងៗនៅលើមូលដ្ឋាន"។
កាលពីពេលថ្មីៗនេះ ក្រុមសង្កេតការណ៍សិទ្ធិមនុស្សស៊ីរីដែលមានមូលដ្ឋាននៅប្រទេសអង់គ្លេសនោះនិយាយថា មនុស្ស៩០នាក់ ត្រូវបានគេចាប់ពង្រត់នៅពេលពួកសកម្មប្រយុទ្ធធ្វើការវាយឆ្មក់នៅពេលទៀបភ្លឺទៅលើភូមិដាច់ស្រយាលដែលមានពួកគ្រឹស្តនិកភាគតិចរស់នៅខាងលិចហាសាកាដែលជាទីក្រុងមួយគ្រប់គ្រងដោយពួកឃើដ៕
រឹទ្ធ
0 Comments