តាមប្រភពបណ្ដាញគេហទំព័រហុងកុងកាលពីថ្ងៃទី២១ ខែកក្កដា បានឲ្យដឹងថា ក្រោយពីលោកហ្វាង ជូមីង ត្រូវបានជាប់ឃុំខ្លួនពីបទសេពគ្រឿងញៀនអស់រយៈពេលកន្លះឆ្នាំមក លោកក៏ត្រូវបានដោះលែងកាលពីខែកុម្ភៈ ឆ្នាំ២០១៥កន្លងទៅនេះ ហើយភ្លាមៗនោះក៏បានវិលត្រឡប់ទៅរស់នៅប្រទេសតៃវ៉ាន់ជាមួយលោកស្រី លីង ហ្វុងឈីវ ដែលជាម្ដាយរបស់លោក។ ក្រោយមក លោកហ្វាង ជូមីង ក៏បានបាត់មុខមួយរយៈ។
ដោយសារតែការប្រព្រឹត្តអំពើខុសឆ្គងមួយពេលបានធ្វើឲ្យលោក ហ្វាង ជូមីង គេចវេះ មិនហ៊ានប្រឈមមុខនឹងមនុស្សជាច្រើន រួមទាំងអ្នកដែលជិតស្និទ្ធផងដែរ។
ថ្មីៗនេះ លោក ឈិនឡុង ដែលត្រូវជាឪពុករបស់លោក ហ្វាង ជូមីង បានឲ្យដឹងថា ទោះបីលោកបានទទួលរង នូវការវាយប្រហារផ្លូវចិត្តយ៉ាងណាក៏ដោយ ក៏លោកនៅតែឆ្លៀតពេលដែលសម្រាកពីការងារធ្វើដំណើរទៅប្រទេសតៃវ៉ាន់ដើម្បីបំភ្លឺរឿងខ្លះៗពីកូនប្រុសរបស់លោកដែរ ហើយលោកសង្ឃឹមថា កូនប្រុសរបស់លោកនឹងជៀសផុតពីស្រមោលខ្មៅនេះ។
ជាក់ស្ដែង ដោយឆ្លងកាត់រយៈពេលប៉ុន្មានខែក្រោយពីការដោះលែងមក គេសង្កេតឃើញថា ដំណើររឿងរបស់លោក ហ្វាង ជូមីង ហាក់បីដូចជាមានលក្ខណៈស្ងប់ស្ងាត់ ហើយលោកក៏បានដាក់ចិត្តទៅលើវិស័យចម្រៀងរបស់លោកវិញទៀតផង។
តាមប្រភពដដែលបានឲ្យដឹងថា លោក ហ្វាង ជូមីង បានចុះកិច្ចសន្យាជាមួយក្រុមហ៊ុនមួយនៃប្រទេសចិន ហើយក្នុងអំឡុងនេះពេល លោកកំពុងតែយកចិត្តទុកដាក់ថតចម្រៀងមួយចំនួន ត្រៀមនឹងចេញអាល់បុមថ្មីនាពេលឆាប់ៗនេះ។
ជាការបន្ថែមចុងក្រោយ ក្រុមការងាររបស់លោកហ្វាង ជូមីង ក៏បានប្រកាសប្រាប់អ្នកសារព័ត៌មានថា ដ្បិតតែពីមុនលោកបានទទួលរងនូវសម្ពាធមួយចំនួនក៏ពិតមែន ប៉ុន្តែមកទល់ពេលនេះលោកមានលក្ខណៈធម្មតាវិញហើយ ចំណែកឯជីវភាពរស់នៅរបស់លោក គឺមានលក្ខណៈដូចសព្វដងផងដែរ៕
កូនប្រុសលោកឈិនឡុង ត្រៀមចេញអាល់បុមថ្មី
0 Comments