សមាគមកីឡាបាល់ទាត់ Japan Dream Football Association (JDFA) ត្រៀមផ្ដល់ស្បែកជើងដល់កុមារកម្រិតបឋមសិក្សាប្រមាណជា ៣០ នាក់ព្រមទាំងបង្រៀនបាល់ទាត់រយៈពេលខ្លីមួយនៅទីលានបាល់ទាត់កងទ័ពជើងទឹក (ខាងកើតស្ពានជ្រោយចង្វា) ក្នុងរាជធានីភ្នំពេញ នៅថ្ងៃពុធ ទី ២៩ ខែ កក្កដា ឆ្នាំ ២០១៥ ចុងខែនេះ ចាប់ពីម៉ោង ៩:៣០ នាទីព្រឹកតទៅ។ នេះបើយោងតាមសេចក្ដីប្រកាសព័ត៌មានរបស់សមាគមកីឡាបាល់ទាត់មួយនេះ។
JDFA ត្រូវបានបង្កើតឡើងដោយ អតីតប្រធានក្រុមរបស់ក្លិប Gamba Osaka នៃក្របខណ្ឌបាល់ទាត់លីកកំពូលជប៉ុន លោក ម៉ាសេអូ ឃីមប៉ា (Masao Kiba) ចាប់តាំងពីឆ្នាំ២០១២ មក ក្នុងបំណងស្វែងរកសមត្ថភាពកីឡាករដ៏មានសក្តានុពលពីតំបន់អាស៊ីអាគ្នេយ៍ (អាស៊ាន) ដើម្បីទទួលបានឱកាសទៅលេងក្នុងក្របខណ្ឌបាល់ទាត់លីកកំពូល (J-League) របស់ជប៉ុន។
លោក Masao Kiba ធ្លាប់បានមកធ្វើ Football Clinic នៅកម្ពុជា បាន ២ ឬ ៣ លើកមកហើយ។ Football Clinic អាច កាត់យល់ថា គឺជាការនាំយកលំហាត់ និង មេរៀនថ្មីៗទាក់ទងនឹង កីឡាបាល់ទាត់មកចែកជូនកីឡាករវ័យក្មេង និងដើម្បីជំរុញឲ្យពួកគេសម្រេចបំណងចង់ក្លាយជាកីឡាករ បាល់ទាត់ល្បីនៅ ថ្ងៃអនាគត។
កន្លងមកលោក Masao Kiba ធ្លាប់បាននាំ កីឡាករម៉ាឡេស៊ី១រូប និងកីឡាករថៃ១រូប ទៅធ្វើការហ្វឹកហាត់រយៈពេលខ្លីក្នុងក្លិបនៃក្របខណ្ឌ J.League។ ជាបន្ទាប់លោកគ្រោងនាំកីឡាករវៀតណាមម្នាក់ទៀត ហើយលោករំពឹងថា កីឡាករកម្ពុជាអាយុចន្លោះពី១៩ទៅ២០ ឆ្នាំ នឹងទទួលបានឱកាសបែបនេះដែរ។
កាលពីខែកញ្ញាឆ្នាំ២០១៤ JDFA បានរៀបចំ Football Clinic មួយសម្រាប់កុមារនៅទីលានទ័ពជើងទឹក ក្នុងរាជធានីភ្នំពេញ ដោយកាលណោះ ក្មេងៗមួយចំនួនមិនមានស្បែកជើងពាក់នោះឡើយ។ ដោយមើលឃើញថា ការលេងដោយគ្មានស្បែកជើងអាចបង្កគ្រោះថ្នាក់ JDFA សហការជាមួយក្រុមហ៊ុន ម៉ូរីស៊ីតា ជីតាន់ ដែលជាម្ចាស់ឧបត្ថម្ភដ៏សំខាន់ បានរៀបចំកម្មវិធីប្រមូលស្បែកជើងដែលគេឈប់ប្រើនៅជប៉ុន យកមកចែកដល់កុមារកម្ពុជា តាមរយៈកីឡាករ Masao Kiba។
បើនិយាយពីកីឡាករ Masao Kiba វិញប្រកបអាជីពបាល់ទាត់ដំបូងនៅឆ្នាំ ១៩៩៣ នៅក្រុមGamba Osaka រហូតដល់ឆ្នាំ ២០០៤។ នៅឆ្នាំ ២០០៥ ខ្សែការពាររឹងមាំមួយនេះបានប្ដូរទៅលេងក្លិប Avispa Fukuoka។ ចូលដល់ រដូវកាល ២០០៦ – ២០០៧ លោកបានទៅលេងនៅក្លិប Valiente Toyama និង MIO Biwako Kusatsu។ ជាចុងក្រោយ Kiba បានប្ដូរទៅលេងក្លិប Customs United F.C របស់ប្រទេសថៃ នៅរដូវកាល២០០៨ ដល់ ២០១០៕
ប្រធានសមាគមបាល់ទាត់ JDFA របស់ជប៉ុនត្រៀមចែកស្បែកជើងដល់កុមារកម្ពុជា ចុងខែកក្កដា នេះ
0 Comments