កន្លងមក គ្មាននរណាម្នាក់បានដឹងថា តារាចម្រៀងប្រចាំផលិតកម្មហង្សមាស និងរស្មីហង្សមាស លោក ព្រាប សុវត្ថិ មានតួនាទីអ្វីទៀតនោះទេ ក្រៅអំពីអាជីពជាអ្នកចម្រៀង។ ចំពោះការបង្ហាញវត្តមានក្នុងឈុតទាហាន និងមានស័ក្ដិលើស្មាដល់ទៅ៤កន្លះរបស់លោក ព្រាប សុវត្តិ នេះដែរ ត្រូវបានមជ្ឈដ្ឋានមហាជនមួយចំនួននិយាយរិះគន់ច្រើនជាងការលើកសរសើរផងដែរ។
គេនិយាយថា តារាចម្រៀងរូបនេះពិតជាឡូយមែន បន្ទាប់ពីមានអាជីពជាតារាចម្រៀងដ៏ល្បីល្បាញ ដែលអាចរកកម្រៃបានមួយខែៗរាប់ពាន់ដុល្លារហើយនោះ លោកថែមទាំងមានតួនាទីជាកងទ័ពនៅក្នុងស្ថាប័នរដ្ឋទៀត។
អ្នកខ្លះទៀតនិយាយបែបលែបខាយថា ការបង្ហាញខ្លួនជាមួយឈុតទាហានរបស់លោក ព្រាប សុវត្ថិ នេះដែរ គឺវាមិនមានអ្វីដែលគួរឲ្យចាប់អារម្មណ៍នោះទេ ពីព្រោះកន្លងមក ដូចដែលយើងធ្លាប់ដឹងហើយថាតារាសិល្បៈមួយចំនួនទៀតក៏ធ្លាប់បានបង្អួតនៅមុខតំណែងក្នុងក្របខ័ណ្ឌរដ្ឋរបស់ខ្លួនឲ្យមហាជនបានដឹងដែរ ដូចជា នាយកុយ នាយក្រឹម ជាដើម ដែលមានតួនាទីជាទាហាន និងមានស័ក្ដិធំៗពាក់សំញែងគេឯង តែធាតុពិតមិនដែលទៅតស៊ូឯណានោះទេ។
ដោយឡែក មតិខ្លះទៀតបានសរសេររិះគន់នៅក្នុងបណ្ដាញហ្វេសប៊ុកថា គេមិនដែលបានឃើញតារាចម្រៀងលោក ព្រាប សុវត្ថិ ចូលព្រៃតស៊ូការពារបូរណភាពទឹកដីផង គឺឃើញតែស្រែកច្រៀងរាំនៅតាមឆាកតន្ត្រីស្រាបៀរសោះ ស្រាប់តែស្ងាត់ៗមានស័ក្ដិ៤កន្លះ ពាក់យ៉ាងសង្ហា ក្នុងជួរកងទ័ព ចំណែកឯអ្នកដែលតស៊ូពិតប្រាកដ បែរជាគ្មានសំណាងបានស័ក្ដិ បានផ្កាយពាក់នឹងគេទៅវិញ ហើយរហូតដល់ពេលខ្លះ ធ្លាក់ខ្លួនពិការក៏មានដែរ។ ទាក់ទងនឹងការនិយាយចំអកឲ្យលោក ព្រាប សុវត្ថិ ខាងលើនេះដែរ «កម្ពុជាថ្មី» មិនអាចសុំសួរនាំតារាចម្រៀងដុះស្លែរបស់ផលិតកម្មហង្សមាសរូបនេះបានទេ កាលពីថ្ងៃទី២១ ខែកក្កដានេះ៕
ព្រាប សុវត្ថិ បង្ហាញមុខក្នុងសំលៀកបំពាក់កងទ័ពពាក់ស័ក្ដិ៤កន្លះ ទទួលរងការរិះគន់ច្រើនជាងសរសើរ
0 Comments