ក្រុមបាល់ទាត់ស្វាយរៀងអែហ្វស៊ី ត្រូវបើកទ្វាកីឡដ្ឋានខេត្តរបស់ខ្លួនទទួលភ្ញៀវក្រុមខេមបូឌានថៃហ្គ័រអែហ្វស៊ី (Cambodian Tiger FC) ក្នុងជំនួបសប្ដាហ៍ទី ៧ នៃពានរង្វាន់បាល់ទាត់មិត្តហ្វូនខេមបូឌានលីក ២០១៥ (Metfone Cambodian League 2015 ឬ MCL 2015) វេលាម៉ោង ៦ ល្ងាចថ្ងៃ ពុធ ទី ២២ ខែ កក្កដា ឆ្នាំ ២០១៥ នេះ។ ការប្រកួតនេះក៏មានផ្សាយផ្ទាល់តាមប៉ុស្ដិ៍ទូរទស្សន៍បាយ័នព័ត៌មាន (BTV) ផងដែរ។
ព័ត៌មានពីក្រុមខេត្តស្វាយរៀងអែហ្វស៊ី
ក្រុមខេត្តស្វាយរៀង កំពុងតែជួបបញ្ហានៅដើមរដូវកាលនេះ ក្រោយប្រកួតបាន ៦ លើក ឈ្នះ ២ ស្មើ ១ និង ចាញ់ ៣ លើកមាន ៧ ពិន្ទុក្នុងដៃ ឈរនៅលេខរៀងទី ៩ បណ្ដោះអាសន្នក្នុងចំណោមក្រុមទាំង១។ អ្វីដែលគួរឱ្យកត់សម្គាល់នោះមានកីឡាករមួយចំនួនទើបត្រឡប់មកពីក្រុមជម្រើសជាតិ ទើបមិនសូវមានពេលហ្វឹកហាត់ជាមួយគ្នាគ្រប់គ្រាន់។ កាលពីថ្ងៃអាទិត្យ ថ្មីៗនេះ កីឡាករជនជាតិ នីហ្សេរីយ៉ា James Machael បានបាក់កជើងជា ២ កំណាត់ ក្នុងជំនួបសប្ដាហ៍ទី៦ ប៉ះក្រុមបឹងកេតអង្គរ លើទីលានកីឡដ្ឋានកងយោធពលខេមរភូមិន្ទ (ស្ដាតចាស់)។
លោក សំ វ៉ាន់ដេត គ្រូបង្វឹករបស់ក្រុមខេត្តស្វាយរៀង កំពុងតែរកវិធីដោះស្រាយបញ្ហាផ្ទួនៗគ្នានេះដើម្បីស្វែងរកកៅអីក្រុមខ្លាំងទាំង ៤ នៅចុងរដូវកាល។ កង្វះកីឡាករសំខាន់ៗ នៅលើទីលានអាចជាឱកាសមួយសម្រាប់កីឡាករក្មេងៗនៅក្នុងក្លិបបញ្ចេញសមត្ថភាព។
ស្វាយរៀង នៅសល់កីឡាករល្អជាច្រើនទៀតដូចជា ប្រាក់ មុន្នីឧត្តម, ហួយ ផល្លីន, ផានី អ៊ីរដ្ឋា, សំអឿន ពិដោ, មូល ដារ៉ាវ័ន្ត, ឡាយ រស្មី, សឿយ វិសាល និង អ្នកចាំទី អាំ សុវណ្ណរ៉ាត់ ជាដើម សុទ្ធតែអាចបង្ហាញខ្លួនក្នុងជម្រើស ១១ នាក់ដំបូងរបស់ក្រុមបាននៅប្រកួតនេះ។
៦ ប្រកួតមកនេះក្រុមខេត្តស្វាយរៀង បានចាញ់ណាហ្គាវើល ១ ទល់ ០ តែឈ្នះក្រុមអាស៊ីអឺរ៉ុប ៣ ទល់ ២ ហើយស្មើក្រុមចំណូលថ្មីស៊ីម៉ាក់ ៣ ទល់ ៣ បន្តចាញ់វេស្ទើន ១ ទល់ ០ តែឈ្នះអគ្គស្នងការដ្ឋាននគរបាលជាតិ ២ ទល់ ០ និង បរាជ័យក្រោមថ្វីជើងក្រុមជើងឯករងឆ្នាំចាស់បឹងកេតអង្គរ ៥ ទល់ ។
ខ្សែប្រយុទ្ធជនជាតិនីហ្សេរីយ៉ា Dzarma Bata របស់ក្រុមខេត្តស្វាយរៀង រកគ្រាប់បាល់បាន ៦ គ្រាប់ម្នាក់ឯងក្នុងចំណោម ៦ ប្រកួតមកនេះ។ ចំណែកខ្សែប្រយុទ្ធក្នុងឈុតជម្រើសជាតិក្រោមអាយុ២៣ឆ្នាំ (U-23) ផានី អ៊ីរដ្ឋា និង កីឡាករ រស់ គង់សំរេច ក៏ធ្លាប់រកគ្រាប់បាល់នាំសំណាងឱ្យក្រុមនាពេលកន្លងមកដែរ។
ព័ត៌មានពីក្រុមខេមបូឌានថៃហ្គ័រអែហ្វស៊ី
ខេមបូឌានថៃហ្គ័រ ជាក្រុមដែលមានថ្នាក់ដឹកនាំជាជនជាតិជប៉ុន។ កាលពីរដូវកាលមុនក្លិបនេះមានឈ្មោះថា ត្រាយអាស៊ីភ្នំពេញ ហើយមានក្បាលម៉ាស៊ីនជាជនជាតិជប៉ុនដូចគ្នា ប៉ុន្តែក្រោយពេលបញ្ចប់រដូវកាល២០១៤ កន្លងទៅក្លិបបានជួបបញ្ហាហិរញ្ញវត្ថុ ទើបប្ដូរអ្នកដឹកនាំហើយថែមទាំងប្ដូរឈ្មោះទៀតផង។
អតីតកីឡាករជម្រើសជាតិជើងចាស់ដែលធ្លាប់ផ្ទេរទៅលេងនៅក្លិប Surin FC ប្រទេសថៃ ចាន់ ឬទ្ធី អ្នកចាំទីក្រុមជម្រើសជាតិ ហែម ស៊ីម៉ៃ ខ្សែប្រយុទ្ធ សុខ ចាន់រស្មី ក្នុងក្រុមជម្រើសជាតិក្រោមអាយុ២៣ឆ្នាំរបស់កម្ពុជា សុទ្ធតែជាសមាជិកក្នុងក្រុមនេះ ស្របពេលកីឡាករ សួង វីរៈ អាចចូលលេងបានវិញហើយ ក្រោយរួចពិន័យពេលវាយគ្នាលើទីលានកាលប្រកួតជាមួយក្រុមម្ចាស់ផ្ទះក្រសួងការពារជាតិ កាលពីសប្ដាហ៍ទី ៤ កន្លងទៅ។
៦ ប្រកួតមកនេះក្រុមខេមបូឌានថៃហ្គ័រ ឈ្នះក្រុមអគ្គស្នងការដ្ឋាននគរបាលជាតិ ២ ទល់ ០ តែចាញ់បឹងកេតអង្គរ ៣ ទល់ ២ ហើយចាញ់ក្រុមជើងឯកឆ្នាំចាស់ភ្នំពេញក្រោន ៣ ទល់ ១ បន្តចាញ់ក្រុមក្រសួងការពារជាតិ ២ ទល់ ១ តែឈ្នះក្រុមគីរីវង់សុខសែនជ័យ ៦ ទល់ ២ និង ស្មើជាមួយក្រុមបៀលប្រាយ ០ ទល់ ០ ក្នុងជំនួបចុងក្រោយនៅកីឡដ្ឋានខេត្តស្វាយរៀង។ ខេមបូឌានថៃហ្គ័រ មាន ៧ ពិន្ទុក្នុងដៃឈរចំណាត់ថ្នាក់លេខ ៧ បណ្ដោះអាសន្នក្នុងចំណោមក្រុមជាសមាជិកទាំង ១។
កីឡាករជនជាតិជប៉ុន Masato Yoshihara រកគ្រាប់បាល់ឱ្យក្រុមបាន ៥ គ្រាប់ម្នាក់ឯងក្នុងចំណោមគ្រាប់បាល់ទាំង ១២ គ្រាប់ដែលទាត់បញ្ចូលទីគេបាន ១២ គ្រាប់កន្លងមកនេះ ខណៈមិត្តរួមជាតិរបស់គេគឺកីឡាករ Kihara Masakazu រកបាន ៤ គ្រាប់ម្នាក់ឯង។ ចំណែក ៣ គ្រាប់ទៀតរកបានដោយកីឡាករ សុខ ចាន់រស្មី, កង ប៊ុនចន្ថា និង សួង វីរៈ ផងដែរ។
ប្រវត្តិជួបគ្នារវាងស្វាយរៀងអែហ្វស៊ីនិងខេមបូឌានថៃហ្គ័រអេហ្វស៊ីក្នុងពាន MCL
ក្រុមទាំង ២ ធ្លាប់ជួបគ្នាចំនួន ២ លើកប៉ុណ្ណោះក្នុងពានរង្វាន់ MCL នេះ គឺនៅពេលដែលខេមបូឌានថៃហ្គ័រ នៅជាឈ្មោះត្រាយអាស៊ីភ្នំពេញ ក្នុងរដូវកាលទី២០១។ នៅជើងទី១ ក្រុមខេត្តស្វាយរៀង បានយកឈ្នះក្រុម ត្រាយអាស៊ី ១ ទល់ ០ តែចូលដល់ជើងទី២ វិញក្រុមត្រាយអាស៊ី យកឈ្នះ ៣ ទល់ ២ វិញ។
ចំពោះទស្សនិកជនដែលចង់ទៅទស្សនាការប្រកួតដល់ទីលានកីឡដ្ឋានខេត្តស្វាយរៀង អាចជាវសំបុត្រចូលទស្សនាបានដោយដាក់លក់ក្នុងតម្លៃ ៤០០០រៀល និង ១០០០ រៀលនៅមុខច្រកទ្វាចូលកីឡដ្ឋាន ទាំងមុនការប្រកួត១ ថ្ងៃ និងនៅក្នុងថ្ងៃប្រកួត។
សម្រាប់ប្រកួតនៅរសៀលថ្ងៃពុធ ទី ២២ ខែ កក្កដា នេះក៏មានគូប្រកួត ២ គូផ្សេងទៀតដែលក្រុមបឹងកេតអង្គរ ប៉ះក្រុមណាហ្គាវើល នៅវេលាម៉ោង ៣:៣០ នាទីលើទីលានកងយោធពលខេមរភូមិន្ទ (ស្ដាតចាស់) និងក្រុមវេស្ទើនភ្នំពេញ ទទួលស្វារគមន៍ចំណូលថ្មី មជ្ឍមណ្ឌលកំចាត់មីន (ស៊ីម៉ាក់) នៅវេលាម៉ោង ៣:៣០ នាទីរសៀលដូចគ្នា៕
MCL 2015៖ស្វាយរៀង បើកទ្វាកីឡដ្ឋានខេត្តខ្លួនស្វាគមន៍ក្រុមខេមបូឌានថៃហ្គ័រ នៅល្ងាចថ្ងៃពុធ នេះ
0 Comments