ភ្នំពេញ ៖ បុរសម្នាក់ ត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចកាលពីថ្ងៃទី២៥ ខែកក្កដា ឆ្នាំ២០១៥ ឃុំខ្លួនដាក់ពន្ធនាគារដើម្បីរង់ចាំការស៊ើបអង្កេតបន្តទៀត។ បុរសរូបនេះត្រូវបានលោកព្រះរាជអាជ្ញារង ខាំ សុផារី ចោទប្រកាន់ពីបទជួញដូរដោយខុសច្បាប់នូវសារធាតុញៀន ។
លោកវរសេនីយ៍ទោ យិន បញ្ញារិទ្ធ នាយការិយាល័យអន្តរាគមន៍ “ក៩” នៃមន្ទីរប្រឆាំងបទល្មើសគ្រឿងញៀនក្រសួងមហាផ្ទៃថ្លែងថា ជនសង្ស័យមានឈ្មោះ សុខ អាត អាយុ៥៣ឆ្នាំ មានទីលំនៅផ្ទះលេខ០៦៩ ផ្លូវលេខ១០៧ ភូមិសាមគ្គី៣ សង្កាត់ត្រពាំងក្រសាំង ខណ្ឌដង្កោ ត្រូវបានសមត្ថកិច្ចឃាត់ខ្លួនកាលពីវេលាម៉ោង៤និង៤៥នាទីល្ងាច ថ្ងៃទី២២ ខែកក្កដា ឆ្នាំ២០១៥ នៅអតីតសំណង់អគារផ្ទះល្វែងជាប់ផ្សារបឹងព្រលឹត ស្ថិតក្នុងភូមិអូរអណ្ដូង១ សង្កាត់ព្រែកប្រា ខណ្ឌច្បារអំពៅ ។
លោកថ្លែងបន្តថា មុនឈានដល់ការចុះបង្ក្រាបមុខសញ្ញាចែកចាយគ្រឿងញៀនដ៏ធំ និងយ៉ាងសកម្មម្នាក់នេះបាន គឺកម្លាំងសមត្ថកិច្ចបានបើកការស្រាវជ្រាវតាមដានយ៉ាងល្អិតល្អន់ជាង៣ខែមកហើយ រហូតមកដល់ទទួលបានដំណឹងច្បាស់ការណ៍ពីកន្លែងពួនសម្ងំលាក់ខ្លួនរបស់ជនសង្ស័យ ទើបកម្លាំងនគរបាល នៃមន្ទីរប្រឆាំងគ្រឿងញៀន ប្រមូលកម្លាំងចុះធ្វើការបង្ក្រាបបានជាក់ស្ដែងតែម្ដង ។ ក្នុងការឃាត់ខ្លួនជនសង្ស័យរូបនេះ សមត្ថកិច្ចដកហូតបានថ្នាំញៀនប្រភេទក្រាម ស.ថ្លា ចំនួន៥កញ្ចប់ធំ ដែលមានទម្ងន់ស្មើនឹង៥០០ក្រាម និងវត្ថុតាងមួយចំនួន៕
តុលាការ ឃុំខ្លួនបុរសម្នាក់ករណីជួញដូរគ្រឿងញៀនកន្លះគីឡូក្រាម
0 Comments