ស្ថិតក្នុងស្ថានភាពជាក់ស្ដែងបែបនេះ គេឃើញទាំងប្រជាពលរដ្ឋ មន្ត្រីរាជការ អ្នកធ្វើនយោបាយតាមបណ្ដាគណបក្សនយោបាយផ្សេងៗ សស្រាក់សស្រាំក្នុងការចូលសញ្ជាតិបរទេស មិនថាជាតិសាសន៍ណាទេ ឲ្យតែខ្លួនអាចចូលបាន ដើម្បីបានទទួលនូវភាពងាយស្រួលទាំងក្នុងការធ្វើដំណើរចេញចូលទៅក្រៅប្រទេសផង ទាំងក្នុងការទំនាក់ទំនងក្នុងមុខរបររកស៊ីផង។ ជាពិសេសគឺអ្នកដែលបម្រើការនៅក្នុងគណបក្សនយោបាយរឹតតែមានចំណូលចិត្តក្នុងការចូលសញ្ជាតិបរទេសជាងពលរដ្ឋធម្មតាទៅទៀត ដើម្បីពួកគេមានភាពងាយស្រួលក្នុងការទំនាក់ទំនងជាមួយសាមីប្រទេសទាំងនោះ ក៏ដូចជាការចាកចេញទៅភ្លាមៗ ពេលពួកគេមានបញ្ហានៅក្នុងប្រទេសកំណើតជាដើម។
ជាក់ស្ដែងនៅក្នុងបរិបទសង្គមរបស់យើងនាពេលបច្ចុប្បន្ន ដែលមានការវិវត្តថ្មីៗ គេកត់សម្គាល់ឃើញអស់លោកមន្ត្រី ដែលបម្រើការឲ្យបក្សនយោបាយ ដែលគាត់មានសញ្ជាតិពីរ មិនថាមន្ត្រីតូច ឬ ក៏មេបក្សទេ ឲ្យតែគាត់មានបញ្ហា ឬប្រព្រឹត្តបទល្មើសនៅក្នុងប្រទេសកំណើតរបស់គាត់ ពួកគាត់តែងតែនាំគ្នាចាកចេញទៅបណ្ដាប្រទេសដែលពួកគាត់បានចូលសញ្ជាតិនោះធ្វើព្រងើយ ដោយមិនគិតខ្វល់ពីការរិះគន់របស់មហាជនអ្វីឡើយ។
ទង្វើរបស់អ្នកនយោបាយសញ្ជាតិពីរដែលគ្មានការទទួលខុសត្រូវដូច្នេះ ទោះបីត្រូវរត់ហួសធ្លាក់ជើងមេឃក៏គេចមិនផុតពីរង្វង់ច្បាប់ ដែលបានផ្ដន្ទា និងកំណត់ទោសទណ្ឌទៅតាមការប្រព្រឹត្តបទល្មើសព្រហ្មទណ្ឌ ដែលបុគ្គលបានប្រព្រឹត្តនោះឡើយ។
ពាក់ព័ន្ធនិងករណីអ្នកនយោបាយសញ្ជាតិពីរ សញ្ជាតិមួយប្រព្រឹត្តព្រហ្មទណ្ឌនេះ លោកមេធាចី លឹម វណ្ណា សមាជិកក្រុមប្រឹក្សាគណៈមេធាវីនៃព្រះរាជាណាចក្រកម្ពុជា និងជាមេធាវីនៃការិយាល័យមេធាវី វណ្ណា និងសហភាតា បានផ្ដល់នូវបទសម្ភាស និងបទពិសោធន៍ក្នុងការអនុវត្តច្បាប់នៃព្រះរាជាណាចក្រកម្ពុជាកន្លងមក។
លោកមេធាវីលឹម វណ្ណាបានគូសបញ្ជាក់ថា “ច្បាប់គឺច្បាប់”ច្បាប់គ្មានមនោសញ្ចេតនាទេ ! ការអនុវត្តច្បាប់ស្មើភាពគ្នា ដោយមិនគិតពីពណ៌សម្បុរ វណ្ណៈ រាស្ត្រ មន្ត្រី ឬអ្នកនយោបាយឡើយ ។ ច្បាប់បានកំណត់ឲ្យផ្ដន្ទាទោសបុគ្គលទាំងឡាយណា ដែលប្រព្រឹត្តបទល្មើសព្រហ្មទណ្ឌនៅក្នុងដែននៃព្រះរាជាណាចក្រកម្ពុជា បើទោះបីបុគ្គលនោះមានសញ្ជាតិជាអ្វីក៏ដោយ។
លោកមេធាវីបានលើកជាទឡ្ហីករណ៍ថា ជាក់ស្ដែងលោកសម រង្សី គាត់មានសញ្ជាតិពីរ ហើយនៅក្នុងបណ្ដាឆ្នាំកន្លងទៅ គាត់បានប្រព្រឹត្តបទល្មើសព្រហ្មទណ្ឌពាក់ព័ន្ធនឹងបញ្ហាព្រំដែនភាគខាងកើត បណ្ដាលឲ្យតុលាការផ្ដន្ទាទោសគាត់តាមក្រមព្រហ្មទណ្ឌ ខណៈដែលលោកសម រង្សីស្ថិតនៅក្រៅប្រទេស។
មេធាវីរបស់គាត់បានប្ដឹងឧទ្ធរណ៍នៅតុលាការកំពូលជាបន្តបន្ទាប់ រហូតសាលដីកាចូលជាស្ថាពរ មានការអនុវត្តលុបឈ្មោះលោកសម រង្សីចេញពីបញ្ជីគណៈមេធាវីនៃព្រះរាជាណាចក្រកម្ពុជាទៀតផង។ លុះក្រោយមកដោយមានការលើកលែងទោសពីពះមហាក្សត្រ ទើបលោកសម រង្សីអាចចូលមកធ្វើនយោបាយក្នុងប្រទេសកម្ពុជាវិញបាន។
នេះមានន័យថាច្បាប់មិនបានអត់ឱនឲ្យបុគ្គលដែលប្រព្រឹត្តបទល្មើសព្រហ្មទណ្ឌឡើយ។
លោកមេធាវី លឹម វណ្ណា បានលើកឡើងនូវរឿងជាក់ស្ដែងមួយទៀតថា លោកឧកញ៉ាខូវ ផល្លាបុត្រ គឺជាកូនក្ដីរបស់លោកនៅក្នុងសំណុំរឿងព្រហ្មទណ្ឌ ដែលប្ដឹងដោយលោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម។ គ្រប់ដំណើរនៃនីតិវិធីរបស់តុលាការនាពេលកន្លងមកពាក់ព័ន្ធក្នុងសំណុំរឿងលោកឧកញ៉ា ខូវ ផល្លាបុត្រ សុទ្ធតែមានមន្ត្រីស្ថានទូតបារាំងប្រចាំប្រទេសកម្ពុជាចូលរួមសង្កេតការជានិច្ច តែការឃ្លាំមើលនោះមិនប៉ះពាល់ដល់នីតិវិធីតុលាការឡើយ។ ពោលគឺគេពិនិត្យមើលដើម្បីស្វែងយល់ថាតើការអនុវត្តច្បាប់នៃព្រះរាជាណាចក្រកម្ពុជាយើងមានការរំលោភសិទ្ធិពលរដ្ឋរបស់គេដែរឬអត់?! ប៉ុន្តែដំណើរការរឿងក្ដីព្រហ្មទណ្ឌនៅតែអនុវត្ត។
ចំណែកលោក ឃឹម ប៊ុណ្ណាក់ អ្នកយកព័ត៌មានកាសែតកោះសន្តិភាពបានបង្ហាញទស្សនៈថា រឿងរាស្ត្រ ឬមន្ត្រី ឬ អ្នកនយោបាយមានសញ្ជាតិពីរជារឿងធម្មតាទេក្នុងពេលបច្ចុប្បន្ននេះ ប៉ុន្តែរឿងសំខាន់កុំឲ្យអ្នកមានសញ្ជាតិពីរនោះប្រព្រឹត្តបទល្មើសព្រហ្មទណ្ឌតែប៉ុណ្ណោះ ព្រោះបើមានបទល្មើសព្រហ្មទណ្ឌគេត្រូវតែទទួលខុសត្រូវចំពោះមុខច្បាប់ដោយមិនមានការលើកលែងឡើយ ហើយកុំអាងមានសញ្ជាតិពីរគិតតែចង់រត់ចោលស្រុកកំណើតខ្វះស្មារតីទទួលខុសត្រូវក្នុងនាមជាអ្នកដឹកនាំ។
លោកឃឹម ប៊ុណ្ណាក់ បានលើកឧទាហរណ៍ថាៈ លោក មាជ សុវណ្ណារ៉ា គាត់ជាថ្នាក់ដឹកនាំម្នាក់ក្នុងគណបក្សសង្គ្រោះជាតិ គាត់មានសញ្ជាតិពីរដែរ គឺសញ្ជាតិអាមេរិកាំង ហើយគាត់មកធ្វើនយោបាយក្នុងប្រទេសកម្ពុជា ដោយប្រព្រឹត្តបទល្មើសព្រហ្មទណ្ឌ ទាក់ទងនឹងការដឹកនាំកុប្បកម្ម។ ដូច្នេះតុលាការកម្ពុជាបានផ្ដន្ទាទោសគាត់ដាក់ពន្ធនាគារតាមអំពើល្មើសរបស់គាត់ ដែលបានប្រព្រឹត្ត។
ដូច្នេះសរុបសេចក្ដីមកមិនថារាស្ត្រ មន្ត្រី អ្នកនយោបាយណាទេ ដែលមានសញ្ជាតិពីរហើយប្រព្រឹត្តបទល្មើសព្រហ្មទណ្ឌក្នុងព្រះរាជាណាចក្រកម្ពុជា ត្រូវតែទទួលទោសទណ្ឌតាមច្បាប់ដោយគ្មានការលើកលែងឡើយ៕
ច្បាប់គ្មានមនោសញ្ចេតនា អ្នកប្រព្រឹត្តបទល្មើសត្រូវទទួលទោសតាមច្បាប់
0 Comments