ប្រទេសជប៉ុន បានអំពាវនាវដល់ប្រទេសចិន កាលពីថ្ងៃអង្គារកន្លងមកនេះឲ្យបញ្ឈប់សាងសង់ទីតាំងខួង និងរុករកប្រេងកាត និងឧស្ម័ននៅតំបន់សមុទ្រចិនខាងកើត ដែលជាប់ជាមួយនឹងដែនទឹក ដែលអះអាងដោយប្រទេសទាំងពីរ ដោយក្ដីបារម្ភថា ការខួងប្រេងរបស់ចិន នៅពេលរុករកប្រេងកាតនោះ អាចនឹងប៉ះពាល់ដល់អាងស្ដុកប្រេងកាត និងឧស្ម័នធម្មជាតិនៅក្នុងបាតសមុទ្រ ដែលស្ថិតនៅក្នុងអធិបតេយ្យភាពនៃប្រទេសជប៉ុន។
ក្រសួងការពារប្រទេសនៃប្រទេសជប៉ុន បានបន្ថែមថា ការស្នើនោះគឺផ្អែកទៅលើការត្រួតពិនិត្យទៅលើផ្នែកការពារប្រទេស ដែលត្រូវបានធ្វើឡើងជារៀងរាល់ឆ្នាំ បន្ទាប់ពីសមាជិកទាំងឡាយនៃបក្សកាន់អំណាចបានត្អូញត្អែរថា សេចក្ដីព្រាងដើមរបស់ខ្លួនចំពោះសំណើដល់ប្រទេសចិននោះ វាហាក់ដូចជានៅទន់ភ្លន់ពេកនៅឡើយ មន្ដ្រីរបស់ក្រសួងនេះបានលើកយកមកនិយាយដូច្នេះ។
ក្រសួងការពារប្រទេសបាននិយាយថា យើងបានបញ្ជាក់អះអាងរួចហើយថា ប្រទេសចិន បានចាប់ផ្ដើមសាងសង់នូវទីតាំងរុករកថ្មី នៅក្នុងដែនសមុទ្រអូសេអង់ ហើយយើងបានប្រាប់ហើយប្រាប់ទៀត ចំពោះការជំទាស់របស់យើង ទៅនឹងការអភិវឌ្ឍបែបឯកតោភាគីធ្វើឡើងដោយប្រទេសចិន ហើយអំពាវនាវសូមឲ្យចិន បញ្ឈប់សកម្មភាពយ៉ាងដូច្នេះជាបន្ទាន់។
ក្រុងតូក្យូបារម្ភថា ទីតាំងខួងប្រេងរបស់ចិននោះ អាចនឹងប៉ះពាល់ដល់អាងស្ដុកឧស្ម័នធម្មជាតិដែលស្ថិតនៅក្រោមដី ហើយដែលកំពុងត្រូវបានប្រើប្រាស់ស្ថានីយរ៉ាដា ជាមួយនឹងមូលដ្ឋានសម្រាប់យន្ដហោះសង្កេតការណ៍ដោយគ្មានមនុស្សបើក រួមទាំងរាល់ការហោះហើរនៃយន្ដហោះផ្សេងៗទៀត ដែលធ្វើសកម្មភាពសម្រាប់ការត្រួតពិនិត្យលើផ្ទៃសមុទ្រនៅត្រង់ចំណុចនៃជួរកូនកោះដែលកំពុងមានជម្លោះ ដែលភាសាជប៉ុន ហៅកោះតូចៗទាំងអស់នោះថា សេនកាគូ រីឯតាមភាសាចិនវិញ ហៅថា ឌីយ៉ាវយូ។
ដោយឡែកក្រសួងការពារប្រទេស និងក្រសួងការបរទេសនៃប្រទេសចិនវិញ នៅពុំទាន់ឆ្លើយតបភ្លាមៗនៅឡើយចំពោះសំណើដែលសុំឲ្យមានការអធិប្បាយស្ដីអំពីរបាយការណ៍របស់ប្រទេសជប៉ុននោះ។ ដោយឡែករបាយការណ៍ក៏មិនបានលើកយកមកនិយាយយ៉ាងលម្អិត ក៏ដូចជាបញ្ជាក់ឲ្យបានច្បាស់អំពីទីតាំង ឬក៏កន្លែងដែលចិន កំពុងតែខួងរុករកប្រេងកាតនោះផងដែរ។
របាយការណ៍មួយដែលមានសរុបចំនួន៥០០ទំព័រ ត្រូវបានឯកភាពព្រមព្រៀងដោយនាយករដ្ឋមន្ដ្រីជប៉ុន លោកសីុនហ្សូ អាបេ ដែលអធិប្បាយផងដែរអំពីតំបន់សមុទ្រចិនខាងត្បូង ដែលកំពុងស្ថិតនៅក្នុងជម្លោះ ខណៈពេលដែលប្រទេសជប៉ុន ព្រមទាំងបណ្ដាប្រទេសផ្សេងៗទៀតកំពុងទិតៀនប្រទេសចិន យ៉ាងខ្លាំងទៅលើគម្រោងទាមទារទឹកដីរបស់ចិន ដោយចាត់ទុកថា ជាការគំរាមកំហែងមួយចំពោះសន្ដិសុខតំបន់។
ជប៉ុន ក៏បាននិយាយផងដែរថា ខ្លួនអាចចាប់ផ្ដើមធ្វើការល្បាតតាមអាកាស នៅក្នុងតំបន់សមុទ្រចិនខាងត្បូង ខណៈដែលប្រទេសចិន និយាយថា បើហ៊ានតែធ្វើដូច្នេះ ខ្លួននឹងជ្រៀតជ្រែកបង្អាក់នូវរាល់សកម្មភាពទាំងអស់នោះ៕
Reuters
ជប៉ុនស្នើប្រទេសចិនឲ្យបញ្ឈប់ការរុករកប្រេងកាតនៅតំបន់សមុទ្រចិនខាងកើត
0 Comments