ក្នុងដំណើរចុះត្រួតពិនិត្យនូវការរៀបចំសណ្ដាប់ធ្នាប់ក្នុងផាប់ស្ទ្រីប តំបន់ជុំវិញផ្សារចាស់ ដែលជាទីតាំងលំនៅដ្ឋាន ជាប្រវត្តិសាស្ត្រ នៃផ្ទះបុរាណនាសម័យអាណានិគមបារាំង ដើម្បីរៀបចំឲ្យមានសោភ័ណភាពស្រស់ស្រាយ ក្នុងការទទួលស្វាគមន៍ភ្ញៀវទេសចរណ៍ជាតិ អន្តរជាតិ ដែលចូលមកទស្សនាកម្សាន្តនៅពេលរាត្រី បន្ទាប់ពីការទស្សនាកម្សាន្តនៅតាមបណ្ដារមណីយដ្ឋានវប្បធម៌ និង ធម្មជាតិ។
តាមប្រសាសន៍របស់លោកបណ្ឌិត ថោង ខុន បានគូសបញ្ជាក់ថា ក្រោយពេលដែលត្រូវបានគេវាយតម្លៃ ជាក្រុងប្រវត្តិសាស្ត្រសៀមរាបរបស់ប្រទេសកម្ពុជា បានជាប់ចំណាត់ថ្នាក់ជាទីក្រុងគោលដៅទេសចរណ៍លេខ១ នៅតំបន់អាស៊ី និងជាប់ចំណាត់ថ្នាក់លេខ២ នៅលើពិភពលោក ក្នុងការវាយតម្លៃទីក្រុងទាក់ទាញភ្ញៀវទេសចរណ៍នៅឆ្នាំ២០១៥នេះ ហើយមកដល់ពេលនេះ ក្រុងសៀមរាប បានទទួលនូវចំណាត់ថ្នាក់លេខ១ ដោយផ្ដោតទៅលើសណ្ឋាគារ ភោជនីយដ្ឋាន សេវាកម្ម និង ភាពស្រស់ស្អាត ពណ៌បៃតង របស់ក្រុងសៀមរាប ដែលធ្វើឲ្យទាក់ទាញដល់អារម្មណ៍ភ្ញៀវទេសចរ ចូលមកទស្សនាកម្សាន្តច្រើនជាងទីក្រុងដទៃ នៅក្នុងតំបន់អាស៊ី និងពិភពលោក។
តាមការបញ្ជាក់របស់លោក ឃឹម ប៊ុនសុង បានឲ្យដឹងថា ដោយកត្តានេះហើយ អាជ្ញាធរខេត្តសៀមរាប ក៏បានយកចិត្តទុកដាក់ខ្ពស់លើការរៀបចំនូវសណ្ដាប់ធ្នាប់ក្នុងតំបន់ទីកម្សាន្តរបស់ភ្ញៀវទេសចរឲ្យមានសណ្ដាប់ធ្នាប់ បរិស្ថានអនាម័យល្អ ព្រមទាំងបានធ្វើការកែលំអនូវសោភ័ណភាពក្រុង ឲ្យកាន់តែមានភាពស្រស់ស្អាត ក្នុងការទទួលស្វាគមន៍ភ្ញៀវជាតិ អន្តរជាតិ ចូលមកស្នាក់នៅទស្សនាកម្សាន្តឲ្យមានរយៈពេលយូរ ហើយអាជ្ញាធរខេត្តក៏បានខិតខំក្នុងការស្វែងរកដៃគូ អ្នកវិនិយោគជាតិ អន្តរជាតិ ចូលមកបណ្ដាក់ទុន វិនិយោគលើវិស័យសេវាកម្មទេសចរណ៍។
បន្តមកគណៈប្រតិភូក៏បានអញ្ជើញចុះត្រួតពិនិត្យការដ្ឋានសាងសង់ចំណតរថយន្តរបស់លោកឧកញ៉ា ទូច សៀ អ្នកវិនិយោគចំណតរថយន្តនៅខេត្តសៀមរាប។
តាមការបញ្ជាក់របស់លោកឧកញ៉ា ទូច សៀ បានឲ្យដឹងថា ដើម្បីចូលរួមក្នុងកិច្ចអភិវឌ្ឍន៍នៅក្រុងប្រវត្តិសាស្ត្រសៀមរាបឲ្យកាន់តែមានសោភ័ណភាព សណ្ដាប់ធ្នាប់រៀបរយ ក្នុងការគ្រប់គ្រងលើយានយន្តគ្រប់ប្រភេទ ដែលបានធ្វើអាជីវកម្មដឹកជញ្ជូនភ្ញៀវ និងទំនិញផ្សេងៗចូលមកក្នុងក្រុងសំខាន់ភ្ញៀវទេសចរណ៍មកពីក្រុងប៉ោយប៉ែត ត្រូវចូលមកទីចំណតរថយន្តផ្នែកខាងលិចក្រុង ដែលមានទីតាំងស្ថិតនៅភូមិថ្នល់ សង្កាត់ស្រង៉ែ ក្រុងសៀមរាប ក្នុងការបញ្ចៀសនូវការកកស្ទះចរាចរណ៍នៅក្នុងក្រុងផង និងចែករំលែកការដឹកជញ្ជូនពីបងប្អូនក្រុមរ៉ឺម៉កម៉ូតូ និងម៉ូតូឌុបជាដើម។
លោកឧកញ៉ាក៏បានឲ្យដឹងទៀតថា ក្នុងការវិនិយោគធ្វើចំណតរថយន្តនេះ ដែលមានផ្ទៃដី២ហិកតា ដែលមានអគារកម្ពស់១ជាន់ មានផ្ទៃក្រឡា១ពាន់៧០០ម៉ែត្រក្រឡា មានបណ្ដោយ៦០ម៉ែត្រ ទទឹង២០ម៉ែត្រ គម្រោងសាងសង់ក្នុងថវិកា២លានដុល្លារ ប្រកបទៅតាមស្តង់ដារអន្តរជាតិ ដែលមានទីកន្លែងសម្រាប់ភ្ញៀវអង្គុយរង់ចាំ មានភោជនីយដ្ឋាន និងកន្លែងលក់សំបុត្ររថយន្ត ព្រមទាំងមានទីកន្លែងកម្សាន្ត ហើយដែលនឹងសាងសង់រួចរាល់នៅក្នុងត្រីមាសទី១ ដើមឆ្នាំ២០១៦ខាងមុខ ត្រូវបានទទួលការអនុញ្ញាតពីក្រសួងសេដ្ឋកិច្ច និងហិរញ្ញវត្ថុផងដែរ។
ក្នុងការចុះត្រួតពិនិត្យនោះ លោកបណ្ឌិត ថោង ខុន និងលោក ឃឹម ប៊ុនសុង ក៏បានគូសបញ្ជាក់ថា ក្រោមគោលនយោបាយឈ្នះៗរបស់ប្រមុខរាជរដ្ឋាភិបាល ក្រោមកិច្ចដឹកនាំដ៏ឈ្លាសវៃរបស់សម្ដេចតេជោ ហ៊ុន សែន នាយករដ្ឋមន្ត្រី បានធ្វើឲ្យមានកិច្ចអភិវឌ្ឍន៍លើគ្រប់វិស័យ។ ម្យ៉ាងទៀត ដោយសន្ទុះលើវិស័យសេដ្ឋកិច្ច សំខាន់នៅក្រុងប្រវត្តិសាស្ត្រសៀមរាប ដែលប្រមូលផ្ដុំទៅដោយភ្ញៀវទេសចរមកពីគ្រប់មជ្ឈដ្ឋាននៅលើពិភពលោក ហើយកំណើននៃយានយន្តគ្រប់ប្រភេទ ដែលបានធ្វើអាជីវកម្មចូលមកក្រុងសៀមរាបមានកំណើនកើនឡើង។ ដោយកត្តា នេះហើយ ក្រសួងទេសចរណ៍ ក៏ដូចជាអាជ្ញាធរខេត្តសៀមរាប ត្រូវធ្វើការរៀបចំនូវចំណតរថយន្តមួយ នៅផ្នែកខាងលិចក្រុង ក្នុងការកាត់បន្ថយគ្រប់យានយន្ត ដែលបានធ្វើចរាចរណ៍ទៅកកស្ទះនៅក្នុងក្រុង និងកាត់បន្ថយនូវគ្រោះថ្នាក់ចរាចរណ៍ទៀតផង។
ក្នុងនោះ លោកទាំងពីរក៏បានធ្វើការណែនាំដល់ម្ចាស់វិនិយោគ ត្រូវធ្វើការរៀបចំទីធ្លាចំណត ឲ្យត្រូវទៅតាមស្តង់ដារអន្តរជាតិ ដោយចំណតរថយន្តនេះមានលក្ខណៈពិសេសក្នុងការទទួលស្វាគមន៍ដល់ភ្ញៀវជាតិ អន្តរជាតិ មកពីក្រុងប៉ោយប៉ែត សំខាន់ភ្ញៀវទេសចរបរទេសដែលចូលមកខេត្តសៀមរាប។ ម្យ៉ាងទៀត ត្រូវមានបន្ទប់រង់ចាំរបស់ភ្ញៀវ ព្រមទាំងត្រូវយកចិត្តទុកដាក់ខ្ពស់អំពីបរិស្ថាន អនាម័យ និងពិនិត្យឲ្យបានត្រឹមត្រូវពីការសាងសង់អគារក្នុងការធានានូវគុណភាពសំណង់ ដើម្បីកុំឲ្យមានបញ្ហាដល់ភ្ញៀវទៀតផង៕
ត្រួតពិនិត្យសណ្ដាប់ធ្នាប់ក្នុងក្រុងសៀមរាប និងការសាងសង់ចំណតរថយន្តក្រុងថ្មី
0 Comments