លោកឧត្ដមសេនីយ៍ ស៊ិន សុផាត តំណាងទូរទស្សន៍កងយោធពលខេមរភូមិន្ទTV5 បានបញ្ជាក់ក្នុងសន្និសីទកាសែត នាព្រឹកថ្ងៃទី២១ ខែកក្កដា ឆ្នាំ២០១៥នេះ TV5 បានចាប់ផ្ដើមបើកកម្មវិធីប្រដាល់ឡើងវិញ បន្ទាប់ពីផ្អាកអស់មួយរយៈពេល ដែលក្នុងការបើកសង្វៀនថ្មីជាឡើងវិញនេះ ដោយភ្ជាប់ជាមួយព្រឹត្តិការណ៍ដ៏គួរឲ្យកក្រើក គឺការប្រកួតដណ្ដើមខ្សែក្រវាត់ “កំពូលជើងឯកTiffy Super Figth” ទម្ងន់៦០គីឡូក្រាម ដែលមានកីឡាករចំនួន៣២នាក់ចូលរួមប្រកួត។ អ្នកប្រដាល់ទាំង៣២នាក់នេះ សុទ្ធតែជាអ្នកប្រដាល់ជើងខ្លាំងៗ មកពី៣២ក្លិបល្បីៗទូទាំងប្រទេស។
លោកវេជ្ជបណ្ឌិត ឆឹង យ៉ាវយ៉េន អនុប្រធានសហព័ន្ធកីឡាប្រដាល់ទទួលបន្ទុកបច្ចេកទេស បានឲ្យដឹងថា រូបមន្តនៃការប្រកួត គឺបែងចែកជា៤ដំណាក់កាល ដែលដំណាក់ទី១ ជាការប្រកួតជម្រុះ ក្នុងចំណោម៣២នាក់ ទុកតែ១៦នាក់ ដែលការប្រកួតគឺចាញ់ធ្លាក់ ឯអ្នកឈ្នះឈរចាំ។ ហើយការប្រកួតមានរយៈពេលតែ៣ទឹកប៉ុណ្ណោះ ក្នុងមួយទឹកមាន៣នាទី។ ចំពោះតម្លៃខ្លួនក្នុងដំណាក់កាលទី១នេះ គឺឈ្នះទទួលបាន១៥០ដុល្លារ ចាញ់១០០ដុល្លារ។
សម្រាប់ការប្រកួតដំណាក់កាលទី២ ជាការចម្រាញ់ក្នុងចំណោមអ្នកប្រដាល់១៦រូប ជម្រុះនៅសល់៨រូប ដែលរូបមន្តការប្រកួតដូចដំណាក់កាលទី១ដែរ ចាញ់ធ្លាក់ ឈ្នះឈរចាំ ឯការប្រកួតតែ៣ទឹក ១ទឹក មាន៣នាទីដែរ។ ចំពោះតម្លៃខ្លួនក្នុងដំណាក់កាលទី២នេះ អ្នកឈ្នះ២០០ដុល្លារ អ្នកចាញ់១៥០ដុល្លារ។
លោកវេជ្ជបណ្ឌិត ឆឹង យ៉ាវយ៉េន បន្តថា សម្រាប់ការប្រកួតនៅក្នុងដំណាក់កាលទី៣ និងទី៤ ដែលជាការប្រកួតវគ្គ៨នាក់ និងវគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រនោះ ការប្រកួតនឹងប្រព្រឹត្តទៅដូចធម្មតា គឺប្រកួត៥ទឹក ក្នុង១ទឹកមាន៣នាទី សម្រាក២នាទី។ សម្រាប់ការប្រកួតដំណាក់កាលទី៣វគ្គ៨នាក់ចុងក្រោយនេះ តម្លៃខ្លួនអ្នកឈ្នះបាន២៥០ដុល្លារ អ្នកចាញ់២០០ដុល្លារ។ ការប្រកួតពាក់កណ្ដាលផ្ដាច់ព្រ័ត្រ អ្នកឈ្នះបាន៣០០ដុល្លារ អ្នកចាញ់បាន២៥០ដុល្លារ។ហើយសម្រាប់ជ័យលាភីនៅក្នុងវគ្គផ្ដាច់ព្រ័ត្រ ដែលមានចំណាត់ថ្នាក់ពីលេខ១ ដល់លេខ៤នោះ អ្នកជាប់លេខ៤ បាន៥០០ដុល្លារ លេខ៣ បាន៧៥០ដុល្លារ លេខ២ បាន២.០០០ដុល្លារ និងលេខ១តំណែងជើងឯកម្ចាស់ខ្សែក្រវាត់នោះ ទទួលបានខ្សែក្រវាត់១ ពាន១ និងរង្វាន់អម៤.០០០ដុល្លារ។
លោកឧត្ដមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់កម្ពុជាព្រមានថា កីឡាករគ្រប់ៗរូប ត្រូវតែប្រកួតឲ្យអស់ពីសមត្ថភាព ពិសេសត្រូវរក្សាទម្ងន់ខ្លួនឯងឲ្យបានល្អ។ ជាមួយគ្នានេះ លោកប្រធានសហព័ន្ធ ក៏ណែនាំឲ្យអាជ្ញាកណ្ដាល-ចៅក្រម ត្រូវតែមានភាពសុចរិតក្នុងការងារ ព្រោះនេះជាជាការងារមួយដែលទាំងអស់គ្នាសុទ្ធតែបានទទួលផលប្រយោជន៍។
ការប្រកួតប្រដាល់ក្បាច់បុរាណខ្មែរមួយដែលប្រសិទ្ធិនាមឈ្មោះថា “កំពូលជើងឯកTiffy Super Figth” ទម្ងន់៦០គីឡូក្រាម របស់TV5នេះ នឹងធ្វើការប្រកួតនៅសង្វៀនBeeline Arena ចាប់ពីថ្ងៃទី២៦ ខែកក្កដានេះទៅ រៀងរាល់ថ្ងៃអាទិត្យវេលាម៉ោង១៧និង០០នាទី ដល់១៩និង៣០នាទី ដែលក្នុងមួយសប្ដាហ៍ប្រកួតចំនួន២គូ(សម្រាប់គូខ្សែក្រវាត់)៕
TV5បើកសង្វៀនប្រដាល់ឡើងវិញ
0 Comments