មន្ត្រីប៉ូលិសម្នាក់បាញ់សម្លាប់ខ្លួនឯង ក្រោយស្រីកំណាន់ប្តឹង (Update)

កំពង់ឆ្នាំង ៖ លោកវរសេនីយ៍ត្រី ទេព សារ៉ាត់ នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពង់ឆ្នាំង បានប្រើអាវុធខ្លីម៉ាកកា៥៩ បាញ់ទម្លាយក្បាលសម្លាប់ខ្លួន ដោយសារតូចចិត្តនឹងស្រីកំណាន់បានប្តឹង ពីបទបង្ករបួសស្នាម និងទាមទារជម្ងឺចិត្ត២០លានរៀល។ការធ្វើអត្តឃាតខាងលើនេះ បានកើតឡើងនៅម៉ោង១១ និង១៥នាទីព្រឹក ថ្ងៃទី២៦ ខែកក្កដា ឆ្នាំ២០១៥ នៅក្នុងការិយាល័យរបស់លោក ក្នុងស្នងការដ្ឋាននគរបាលខេត្តកំពង់ឆ្នាំង ស្ថិតនៅក្នុងភូមិត្រពាំងបី សង្កាត់កំពង់ឆ្នាំង ក្រុងកំពង់ឆ្នាំង ប៉ុន្តែការភ្ញាក់ផ្អើលបានដឹងរឿងនេះ នៅម៉ោង៥និង៣០នាទីល្ងាចទៅហើយ។

មន្ត្រីនគរបាលព្រហ្មទណ្ឌកម្រិតស្រាលខេត្តបាននិយាយឲ្យដឹងថា នៅវេលាម៉ោង១១និង១៥នា ទីព្រឹកថ្ងៃទី២៦ ខែកក្កដា ឆ្នាំ២០១៥ គេបានឮស្នូរកាំភ្លើងមួយគ្រាប់ផ្ទុះឡើង នៅក្នុងការិយាល័យរបស់លោក ទេព សារ៉ាត់ ប៉ុន្តែគេមិនចាប់អារម្មណ៍នោះទេដោយគិតថា លោក ទេព សារ៉ាត់ ធាក់ទ្វារបន្ទប់។

ក្រោយមក មន្ត្រីនគរបាលជាកូនចៅបានឃើញលោក ទេព សារ៉ាត់ ដេកលើប៉ៅអី ដៃកាន់កាំភ្លើងខ្លីម៉ាកកា៥៩ជាប់ដាក់លើពោះ គ្មានអ្នកហ៊ានចូលសួរ ឬចូលមើលលោកឡើយ នឹកស្មានថា លោកដេកលក់។

បន្ទាប់មកនៅម៉ោង៥និង៣០នាទីល្ងាច គេក៏បានហៅកូនស្រីលោក ទេព សារ៉ាត់ ពីផ្ទះឲ្យមកហៅឪពុកទៅផ្ទះហូបបាយ ព្រោះឃើញលោកដេកមួយកំណាត់ថ្ងៃទៅហើយ។ នៅពេលកូនស្រីមកដល់ទៅអង្រួនដាក់ឪពុកៗមិនឆ្លើយ និងពេលបានឃើញមានឈាមកកជាច្រើនក្រោមស្មាឪពុកទើប ស្រែកឆោឡោឡើងថា ឪពុកនាងស្លាប់ទៅហើយ។

សូមបញ្ជាក់ថា លោក ទេព សារ៉ាត់ អាយុ៤៨ឆ្នាំ មានប្រពន្ធ និងមានកូន៣នាក់រស់នៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។ កាលពីល្ងាចថ្ងៃទី២៤ ខែកក្កដា ឆ្នាំ២០១៥ លោក ទេព សារ៉ាត់ ត្រូវបានស្រីកំណាន់លោក ឈ្មោះ ឌុក ឌីឡុម អាយុ៤២ឆ្នាំរស់នៅភូមិប្អេរ សង្កាត់ប្អេរ ក្រុងកំពង់ឆ្នាំងធ្លាប់មានទំនាក់ទំនងស្នេហាជាង២ឆ្នាំមកហើយនោះបានដាក់បណ្តឹងនៅតុលាការខេត្តដោយចោទលោក ថាបានប្រើអំពើហិង្សាដាល់នាងរបួសជាំពេញមុខ ព្រោះតែការប្រច័ណ្ឌ ប្តឹងទារជម្ងឺចិត្តចំនួន២០លានរៀល និងប្តឹងឲ្យផ្ដន្ទាទោសលោកតាមផ្លូវច្បាប់។

នៅព្រឹកថ្ងៃទី២៥ និង២៦ ខែកក្កដានេះ លោក ពេទ សារ៉ាត៉ បានអង្វរ ឪពុក ម្តាយ និងបងប្អូន របស់ ស្ត្រីឈ្មោះ ឌុក ឌីឡុម ជាដើមបណ្ដឹង ឲ្យជួយអង្វរនាងអោយសម្របសម្រួលដកពាក្យបណ្តឹងពីតុលាការវិញលោកធានាព្យាបាលរបួសឲ្យជា និងឲ្យប្រាក់មួយចំនួនទៀត ប៉ុន្តែស្ត្រី ឌុក ឌីឡុមមិនយល់ព្រមឡើយ។ ហេតុនេះហើយទើបមានការធ្វើអត្តឃាតបាញ់សម្លាប់ខ្លួនខាងលើ ដោយគេធ្វើការសន្និដ្ឋានថា ទំនងជាលោកមានការអាម៉ាស់ខ្លាចគេដកសក្តិ និងខ្លាចគេផ្តន្ទាទោសក្នុងរឿងខាងលើនេះ។

សមត្ថកិច្ចបានឲ្យដឹងថា មុននឹងបាញ់សម្លាប់ខ្លួនលោក ទេព សារ៉ាត់ បានសេរពាក្យបណ្ដាំថា« សុំទោសលោកជំទាវក្រុមប្រឹក្សាខេត្ត ឯកឧត្តមអភិបាលខេត្តកំពង់ឆ្នាំង លោកស្នងការនគរបាលខេត្តកំពង់ឆ្នាំង ពីខ្ញុំ ទេព សារ៉ាត់ »។

សមត្ថកិច្ចឲ្យដឹងទៀតថា សព លោក ទេព ត្រូវបានថ្នាក់ក្រសួង បញ្ជាឲ្យរក្សាទុកនៅក្នុងកន្លែងកើតហេតុមួយយប់ ព្រឹកឡើងថ្ងៃទី២៧ ខែកក្កដា ឆ្នាំ២០១៥ សមត្ថកិច្ចក្រសួងនិងចុះមកពិនិត្យធ្វើកោសល្យវិច័យដោយផ្ទាល់បន្តទៀត។ មានមតិខ្លះឆ្ងល់ថា ពេលលោក ទេព សារ៉ាត់ បាញ់សម្លាប់ខ្លួនស្លាប់ ហេតុអីក៏គេកាន់កាន់ភ្លើងជាប់នៅដៃដាក់លើពោះស្រួលម្ល៉េះ ចម្ងល់នេះគ្មានអ្នកណាបកស្រាយទេ៕