សហរដ្ឋអាមេរិក បានចប់ប្រតិបត្ដិទៅតាមវិធីថ្មីមួយកាលពីថ្ងៃចន្ទកន្លងមកនេះ ដើម្បីប្រយុទ្ធប្រឆាំងនឹងការកើនឡើងខ្ពស់នៃការប្រើប្រាស់សារធាតុហេរ៉ូអ៊ីនលើសកម្រិត និងការបាត់បង់ជីវិត។
សេតវិមានបាននិយាយថា ខ្លួននឹងផ្គូរួមទាំងបុគ្គលិកសុខាភិបាល រួមជាមួយនឹងភ្នាក់ងារអនុវត្ដច្បាប់នៅ១៥រដ្ឋ នៃតំបន់ដែលមានមនុស្សរស់នៅយ៉ាងច្រើនកុះករ ស្ថិតក្នុងភាគឦសានប្រទេស ដើម្បីពង្រីកសេវាព្យាបាលដល់អ្នកប្រើប្រាស់ថ្នាំញៀន បន្ថែមទៅលើការដាក់ទណ្ឌកម្ម។
កម្មវិធីដែលត្រូវចំណាយដល់ទៅរាប់លានដុល្លារនោះ គឺជាការផ្ដោតទៅរកស្លាកស្នាម និងដានថា តើហេរ៉ូអ៊ីននោះវាមកពីទីណា? តើវាមកដល់ទីនេះដោយរបៀបណា ក្នុងខណៈវាជាសារធាតុញៀនដែលបណ្ដាលឲ្យបាត់បង់ជីវិតបាននោះ? ហើយថា តើនរណាជាអ្នកទិញវា នៅតាមដងផ្លូវ?
ផែនការនេះ គឺជាការឆ្លើយតបទៅនឹងការកើនឡើងនៃការប្រើប្រាស់គ្រឿងញៀនប្រភេទហេរ៉ូអ៊ីនលើសកម្រិត នឹងបណ្ដាលឲ្យបាត់បង់ជីវិតនៅទូទាំងប្រទេស ប៉ុន្ដែជាពិសេសគឺនៅក្នុងរដ្ឋទាំងឡាយ ដែលគ្របដណ្ដប់ទៅដោយកិច្ចខិតខំប្រឹងប្រែងលុបបំបាត់ថ្មីនេះ។
ក្រុមមន្ដ្រីរងក្ដីកង្វល់ចំពោះការកើនឡើងនៃករណីដែលគេកំពុងតែឃើញសារធាតុហេរ៉ូអីុន ត្រូវបានយកមកលាយបញ្ចូលជាមួយថ្នាំ fentanyl ដែលមានលាយជាតិអាភៀន ដែលជាទ្រង់ទ្រាយនៃប្រភេទឱសថស្របច្បាប់ទៅតាមទម្រង់របស់វា សម្រាប់ការចេញវេជ្ជបញ្ជាឲ្យយកមកប្រើប្រាស់ ដោយសារកើតមានការឈឺចាប់ក្រោយពេលធ្វើការវះកាត់រួចមក។
មន្ដ្រីមួយរូបបាននិយាយថា សេចក្ដីសង្ឃឹមគឺដោយមានការបញ្ចូលរួមជាមួយគ្នា ទាំងបុគ្គលិកសុខាភិបាល និងក្រុមភ្នាក់ងារប៉ូលិសនោះគឺជាវិធីពីរយ៉ាងផ្គូគ្នា ដើម្បីកាត់បន្ថយបទល្មើសឧក្រិដ្ឋ ព្រមទាំងចំនួនអ្នកប្រើប្រាស់គ្រឿងញៀនដែលត្រូវតែបញ្ចប់ឲ្យបានយ៉ាងបន្ទាន់ដោយទទួលបានទាំងការព្យាបាល។
កម្មវិធីដែលប្រើប្រាស់ថវិកា២.៥លានដុល្លារគឺជាចំណែកមួយនៃថវិកា១៣.៤លានដុល្លារនៅ ក្នុងការផ្ដល់ជាមូលនិធិពីការិយាល័យគោលនយោបាយផ្នែកគ្រឿងញៀនរបស់សេតវិមានផ្ដោតទៅលើចំណុចនៃតំបន់ប្រកាសដែលត្រូវបានគេហៅថា High High Intensity Drug Trafficking Areas។
មូលនិធិនោះក៏នឹងគាំទ្រផងដែរទៅដល់កិច្ចខិតខំប្រឹងប្រែងបង្ការផ្សេងទៀត ព្រមទាំងផ្ដោតទៅលើការគម្រាមកំហែងដោយសារថ្នាំញៀន ទៅលើទឹកដីនៃក្រុមកុលសម្ព័ន្ធក្នុងសហរដ្ឋអាមេរិក ហើយរួមទាំងការខិតខំប្រឹងប្រែងដើម្បីបញ្ឈប់លំហូរចូលនៃគ្រឿងញៀនឆ្លងកាត់ព្រំដែនជាមួយប្រទេសម៉ិកស៊ីកូ៕
VOA
សហរដ្ឋអាមេរិកផ្គូរួមបញ្ចូលគ្នា ទាំងបុគ្គលិកសុខាភិបាល និងប៉ូលិសដើម្បីប្រយុទ្ធប្រឆាំងនឹងការប្រើប្រាស់ហេរ៉ូអ៊ីន
0 Comments