បន្ទាយមានជ័យ ៖ ជនសង្ស័យម្នាក់ត្រូវបានកម្លាំងប៉ូលិសក្រុងប៉ោយប៉ែតធ្វើការឃាត់ខ្លួនបន្ទាប់ពីបានឆក់ទូរស័ព្ទដៃពីស្ត្រីជាជាតិថៃម្នាក់មិនបានសម្រេច ខណៈពេលនាំស្ត្រីនោះឆ្លងដែនខុសច្បាប់ចេញពីកម្ពុជា។ ការឃាត់ខ្លួននេះធ្វើឡើងកាលពីវេលាម៉ោង១៧និង២០នាទី នារសៀលថ្ងៃទី១៩ ខែសីហា នេះនៅចំណុចមាត់ច្រកអន្តរជាតិប៉ោយប៉ែត ខេត្តបន្ទាយមានជ័យ។
តាមប្រភពព័ត៌មានបានឲ្យដឹងថា ជនសង្ស័យដែលបានឆក់ទូរស័ព្ទដៃពីជនបរទេស គឺជាអ្នកនាំមនុស្សឆ្លងដែនតាមច្រករបៀងដោយខុសច្បាប់។ ហើយស្ត្រីដែលត្រូវយុវជនឆក់នោះគេជាស្ត្រីជនជាតិថៃ រស់នៅសមុទ្របាកាន ប្រទេសថៃ បានឆ្លងដែនមកកម្ពុជាតាមច្រករបៀងខុសច្បាប់ ដែលមានជនដៃដល់ជាអ្នកនាំផ្លូវ។
ប្រភពបន្តថា ស្ត្រីរូបនោះបានឆ្លងដែនមកលេងកាស៊ីណូតាំងពីថ្ងៃ លុះត្រៀមត្រឡប់ទៅវិញ ក៏ពឹងជនដៃដល់ឲ្យជូន តែក៏ត្រូវជនដៃដល់ឆក់យកទូរស័ព្ទរត់តែម្ដង តែត្រូវក្រុមអ្នករត់ម៉ូតូឌុប និងអ្នកដំណើរជួយចាប់ជាប់ប្រគល់ឲ្យសមត្ថកិច្ច។
លោក អ៊ំ សុផល អធិការ នៃអធិការដ្ឋាននគរបាលក្រុងប៉ោយប៉ែតបានឲ្យដឹងថា ជនសង្ស័យខាងលើមានឈ្មោះ ជួន សាវឿន អាយុ៣០ឆ្នាំ បានឆក់ទូរស័ព្ទម៉ាកអាយហ្វូនហ្វាយអេស(iphone5s)ពណ៌.ស ពីស្ត្រីថៃឈ្មោះ និត ចាផា អាយុ៣៣ឆ្នាំ។ ក្រោយឃាត់ខ្លួន ដកហូតវត្ថុតាងទូរស័ព្ទដៃ ប្រគល់ឲ្យស្ត្រីនោះវិញភ្លាមៗនៅកន្លែងកើតហេតុ ឯជនសង្ស័យនាំខ្លួនមកកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់។
ដោយឡែក ចំពោះជនជាតិថៃដែលបានឆ្លងដែនខុសច្បាប់មកកម្ពុជា មិនត្រូវបានសមត្ថកិច្ចឃាត់ខ្លួនសួរនាំ ឬចាប់បញ្ជូនទៅស្រុកវិញនោះទេ គឺត្រឡប់ទៅវិញដោយខ្លួនឯង៕
ឃាត់ខ្លួនជនសង្ស័យឆក់ទូរស័ព្ទដៃជនបរទេសនៅក្រុងប៉ោយប៉ែត
0 Comments