រដ្ឋាភិបាលបាននិយាយកាលពីថ្ងៃចន្ទថា ឆ្មាំសមុទ្រប្រទេសទួរគីបានជួយសង្គ្រោះជនចំណាកស្រុកជិត ១៨ ៣០០ នាក់នៅក្នុងសមុទ្រ Aegean កាលពីខែមុនក្នុងគ្រាដែលមានការកើនឡើងយ៉ាងខ្លាំងនៃចំនួនមនុស្ស ដែលព្យាយាមឆ្លងកាត់សមុទ្រនេះទៅកាន់សហភាពអឺរ៉ុប។រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា នៅចន្លោះថ្ងៃទី១៧ ខែកក្កដាដល់ថ្ងៃទី ១៧ ខែសីហាឆ្នាំ ២០១៥ មានជនចំណាកស្រុកមិនទៀងទាត់ចំនួន១៨ ២៩៦ នាក់ត្រូវបានជួយសង្គ្រោះដោយឆ្មាំសមុទ្រទួរគី។
ក្នុងចំណោមនោះ មានជនចំណាកស្រុកចំនួន៥២៧៦ នាក់ត្រូវបានជួយសង្គ្រោះកាលពីសប្តាហ៍មុនពីចន្លោះថ្ងៃទី ១០ ដល់ថ្ងៃទី ១៧ ខែសីហា។
វាបាននិយាយថា ចាប់តាំងពីដើមផ្តើមឆ្នាំនេះមក ជនចំណាកស្រុកចំនួន៣៦ ៥១១ នាក់ត្រូវបានជួយសង្គ្រោះក្នុងសមុទ្រ Aegean ដែលមានន័យថា ច្រើនជាងពាក់កណ្តាលនៃមនុស្សទាំងអស់នោះ ដែលបានឆ្លងកាត់នៅក្នុងឆ្នាំ ២០១៥ នេះគឺបានកើតឡើងនៅក្នុងខែមុន ។
ការបញ្ចេញទិន្នន័យនេះត្រូវបានធ្វើឡើងស្របពេលដែលមានការព្រួយបារម្ភចំពោះការកើនឡើងនៃចំនួនជនចំណាកស្រុកដែលឆ្លងកាត់ពីប្រទេសទួរគីទៅកាន់ប្រទេសក្រិកដែលជាសមាជិកសហភាពអឺរ៉ុបជាពិសេសចេញពីឧបទ្វីប Bodrum របស់ប្រទេសទួរគីទៅកាន់កោះ Kos របស់ប្រទេសក្រិក៕
AFP
ជនចំណាកស្រុកជាង១៨ ០០០នាក់ត្រូវបានជួយសង្គ្រោះនៅសមុទ្រក្នុងរយៈពេលមួយខែ
0 Comments