ភ្នំពេញ ៖ សហគមន៍មូលនិធិនគរកាយវត្តព្រះពុទ្ធសាសនាកម្ពុជា និងសាលាអនុគណខណ្ឌជ្រោយចង្វារកាលពីព្រឹកថ្ងៃទី១៨ ខែសីហា ឆ្នាំ២០១៥ បានយកអំណោយជាគ្រឿងឧបភោគបរិភោគចែកជូនគ្រួសាររងគ្រោះដោយខ្យល់ព្យុះរលំផ្ទះចំនួន៤គ្រួសារ នៅសង្កាត់កោះដាច់ ខណ្ឌជ្រោយចង្វារ។
ពិធីនេះដោយមានការនិមន្ត និងអញ្ជើញចូលរួមដោយព្រះតេជគុណសុវណ្ណជោតិខឹម សម្បត្តិ ព្រះប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងព្រះមង្គលវិសុទ្ធ សុខ សុភាព ព្រះវិន័យធម៌អនុគណខណ្ឌជ្រោយចង្វារ នឹងព្រះសង្ឃជាច្រើនអង្គទៀត រួមនឹងអាជ្ញាធរភូមិសង្កាត់ និងក្រុមយុវជនខណ្ឌសង្កាត់ជាច្រើននាក់។
នាឱកាសនោះដែរ ព្រះតេជគុណ ព្រះមង្គលរក្ខិត សុវណ្ណជោតិ ខឹម សម្បត្តិ ព្រះប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជាបានមានសង្ឃដីការថា អំណោយដែលប្រគល់ប្រជាពលរដ្ឋដែលរងគ្រោះដោយខ្យល់ព្យុះរលំផ្ទះទាំង៤គ្រួសារនៅពេលនេះ គឺសម្រាប់ជួយរំលែកទុក្ខលំបាកនិងការខ្វះខាតផ្សេងៗ មិនបានយូរអង្វែងក៏បានជួយសម្រាលមួយគ្រាផងដែរ។
ជាមួយគ្នានោះដែរព្រះតេជគុណ សុវណ្ណជោតិ ខឹម សម្បត្តិ បានមានសង្ឃដីកាទៀតថា កន្លងមកក៏ដូចជាបច្ចុប្បន្នសហគមន៍មូលនិធិនគរកាយវត្តព្រះពុទ្ធសាសនាកម្ពុជា ដែលមានព្រះអង្គជាព្រះប្រធានតែងតែបានកៀរ គររកជំនួយផ្សេងៗពីសប្បុរសជននានា ទាំងក្នុងនិងក្រៅប្រទេសនិងតាមទីវត្តអារាមនានា ដើម្បីបម្រើឱ្យសកម្មភាពមនុស្សធម៌ជាមួយរាជរដ្ឋាភិបាលកម្ពុជាក៏ដូចជាកាកបាទក្រហមកម្ពុជាសាខាកាកបាទក្រហមកម្ពុជារាជធានីភ្នំពេញ និងអនុសាខាកាកបាទក្រហមខណ្ឌផ្សេងៗដើម្បីជូនជនងាយរងគ្រោះផ្សេងៗជាច្រើនទៀត។ អំណោយទាំងអស់នោះរួមមានរបស់សហគមន៍មូលនិធិនគរកាយវត្តព្រះពុទ្ធសាសនាកម្ពុជា និងព្រះអនុគណខណ្ឌជ្រោយចង្វារ មានដូចជា មួយគ្រួសារទទួលបានអង្ករ២៥គីឡូក្រាម គ្រឿងឧបភោគ បរិភោគមួយចំនួន និងថវិកា៥ម៉ឺនរៀល រីឯអំណោយរបស់សាលាអនុគុណខណ្ឌជ្រោយចង្វារក្នុងមួយគ្រួសារទទួលបានអង្គរ៥០គីឡូក្រាម គ្រឿងឧបភោគ បរិភោគមួយចំនួន និងថវិកា១០០.០០០រៀល៕
គ្រួសាររងគ្រោះដោយខ្យល់ព្យុះ៤គ្រួសារ នៅកោះដាច់ទទួលអំណោយ ពីមូលនិធិនគរកាយវត្តព្រះពុទ្ធសាសនាកម្ពុជា
0 Comments