យន្ដហោះមួយគ្រឿង ដែលធ្លាក់នៅឯភាគខាងកើតប្រទេសឥណ្ឌូនេស៊ី កាលពី២ថ្ងៃកន្លងទៅនោះ រងក្ដីអន្ដរាយទាំងស្រុង ហើយសពអ្នកដំណើរទាំង៥៤នាក់ ក៏ត្រូវបានរកឃើញហើយដែរ នេះជាការលើកឡើងដោយក្រុមមន្ដ្រី បន្ទាប់ពីក្រុមសង្គ្រោះនៅទីបញ្ចប់បានរកឃើញទីកន្លែងធ្លាក់ដ៏ឆ្ងាយដាច់ស្រយាលកាលពីថ្ងៃអង្គារ។
រូបថតនៅកន្លែងដែលយន្ដហោះធ្លាក់នោះ បានបង្ហាញឲ្យឃើញថា ស្ថិតនៅក្នុងព្រៃដ៏ក្រាស់ដែលតាមរូបភាពរងការឆាបឆេះខ្លោច និងកម្ទេចកម្ទី។ យន្ដហោះនោះដឹកមនុស្ស៥៤នាក់ គឺអ្នកដំណើរ៤៩នាក់ និងក្រុមនាវិក៥នាក់។ អ្នកនាំពាក្យខាងក្រសួងដឹកជញ្ជូន J.A-Barata បាននិយាយថា សព៥៣នាក់ ក្នុងនោះមានទាំងកុមារម្នាក់ផង ត្រូវបានរកឃើញនៅឯកន្លែងយន្ដហោះធ្លាក់នោះតែម្ដង។
ទន្ទឹមពេលស្វែងរកអ្នកនៅសល់ពីស្លាប់ ក្រុមជំនួយសង្គ្រោះក៏កំពុងតែស្វែងរកទិន្នន័យថតការហោះហើរនោះ គឺប្រអប់ខ្មៅដែលអាចជាពន្លឺបង្ហាញអំពីអ្វីដែលជាមូលហេតុបណ្ដាលឲ្យយន្ដហោះកង្ហារពីរមួយគ្រឿងនេះធ្លាក់។
នៅពុំទាន់មានព័ត៌មានដែលត្រូវបានលើកយកមកផ្សាយឲ្យដឹងភ្លាមនៅឡើយនោះទេ អំពីប្រាក់ដល់ទៅ៦.៥កោដិ rupiah ស្មើនឹង៤៧០,០០០ដុល្លារ ដែលត្រូវបានដឹកជញ្ជូនតាមយន្ដហោះដែលធ្លាក់នោះនៅឡើយទេ ដែលប្រាក់ត្រូវបានដឹកទៅចែកជូនដល់ក្រុមគ្រួសារក្រីក្រ ដែលជាមូលនិធិសង្គមសម្រាប់ជាជំនួយប្រចាំជីវភាពតែប៉ុណ្ណោះ។
ផ្សែងអ័ព្ទដ៏ក្រាស់ឃ្មឹក ព្រមទាំងភ្លៀងធ្លាក់យ៉ាងខ្លាំងនោះហើយ ដែលរារាំងដល់ការងាររបស់បុគ្គលិកសង្គ្រោះចំនួន២៥០នាក់ ព្រមទាំងយន្ដហោះ១១គ្រឿងសម្រាប់ការស្វែងរកកម្ទេចយន្ដហោះនោះកាលពីថ្ងៃចន្ទ ទើបបានជាពួកគេបង្ខំចិត្ដវិលត្រឡប់ថយក្រោយវិញ។
វិស័យអាកាសចរណ៍នៅប្រទេសឥណ្ឌូនេស៊ី គឺជាវិស័យដឹកជញ្ជូនយ៉ាងលឿនក៏ពិតមែន ប៉ុន្ដែអាកាសចរណ៍របស់ប្រទេសនេះកំពុងតែតស៊ូក្នុងការស្វែងរកបុគ្គលិកដែលទទួលបានការហ្វឹកហ្វឺនយ៉ាងល្អ ជាមួយនឹងការរីកចម្រើនលូតលាស់យ៉ាងឆាប់រហ័សរបស់ប្រទេសប្រជុំកោះមួយនេះ ដែលមានសរុបទាំងអស់ជាង១៧,០០០កោះ៕
AP/RT
យន្ដហោះឥណ្ឌូនេស៊ី ដែលធ្លាក់នោះ រងការអន្ដរាយយ៉ាងធ្ងន់ ដោយមិនមានអ្នកនៅរស់ទេ
0 Comments