ក្រុមជនភៀនខ្លួនរាប់រយនាក់បន្ថែមទៀត បានធ្វើដំណើរមកដល់កោះកូសរបស់ប្រទេសក្រិក កាលពីព្រឹកថ្ងៃព្រហស្បតិ៍នេះ ខណៈដែលក្រុមអាជ្ញាធរក្រិក ចាប់ផ្តើមរឹតបន្តឹងសន្តិសុខ នៅលើកោះទេសចរណ៍របស់ខ្លួន ដើម្បីទប់ស្កាត់ការកើនឡើងនៃវិបត្តិជនអន្តោប្រវេសន៍។
ទូកតូចៗផ្ទុកដោយស្ត្រី និងកូនក្មេង បានធ្វើដំណើរមកដល់លើកោះកូស នៅពេលថ្ងៃរះនាថ្ងៃព្រហស្បតិ៍នេះ ពោលគឺរយៈពេល២ថ្ងៃប៉ុណ្ណោះ ក្រោយពេលដែលក្រុមចំណាកស្រុក ឈ្លោះទាស់ទែងគ្នាជាមួយក្រុមនគរបាល ហើយរដ្ឋាភិបាល បានសន្យាថា នឹងលុបបំបាត់ចោល ការមកដល់របស់ជនអន្តោប្រវេសន៍រាប់រយនាក់ជារៀងរាល់ថ្ងៃបែបនេះ។
ក្មេងប្រុសហ្វីរ៉ា ដែលជាជនអន្តោប្រវេសន៍មកពីប្រទេសស៊ីរី បាននិយាយប្រាប់ទីភ្នាក់ងារព័ត៌មានរ៉យទ័រថា ពួកលោកទាំងអស់គ្នា បានបញ្ចប់ការសិក្សានៅសាកលវិទ្យាល័យ ចំណែកពួកគេទាំងអស់នោះវិញ សុទ្ធតែជាវេជ្ជបណ្ឌិត និងជានិស្សិតបញ្ចប់សាលាសេដ្ឋកិច្ច ប៉ុន្តែគ្មានអ្វីធ្វើនោះទេ នៅក្នុងទីក្រុងអាឡេប៉ូ ដោយសារនៅទីនោះមានតែសង្គ្រាម និងការទម្លាក់គ្រាប់បែកប៉ុណ្ណោះ។
លោកបានបន្តទៀតថា ពួកលោកចាកចេញពីទីក្រុងអាឡេប៉ូ គឺដើម្បីរស់ដោយខ្លួនឯង។ ខណៈនោះដែរ រដ្ឋមន្ត្រីការបរទេសក្រិក គឺលោកអាឡេកូស ផ្លាប៊ូរ៉ារីស បាននិយាយថា នាវាដែលអាចផ្ទុកអ្នកដំណើរជាង២៥០០នាក់ នឹងត្រូវបញ្ជូនទៅកាន់កោះកូស ដើម្បីជួយសម្រួលដល់កាលវិបត្តិដែលកំពុងកើតឡើង៕
ក្រុមជនភៀសខ្លួនរាប់រយនាក់បន្ថែមទៀត បន្តធ្វើដំណើរមកដល់កោះកូសប្រទេសក្រិក
0 Comments