តារាចម្រៀងមានឈ្មោះល្បីទូទាំងប្រទេស កញ្ញា សុខ ពិសី កន្លងទៅមិនត្រូវបាននរណាម្នាក់ ដឹងទេថានាងធ្លាប់មានបំណងចេញទៅកែសម្ផស្សនៅក្រៅប្រទេស តែភាពភ្ញាក់ផ្អើលក៏បានផ្ទុះឡើងភ្លាមៗស្របពេលដែលតារាស្រីរូបនេះបញ្ចេញនូវរូបថតជាច្រើនដែលបង្ហាញពីរូបភាពមុនពេល និងក្រោយពេលវះកាត់កែកុនធ្វើសម្រស់។
បើសង្កេតមើលទៅលើរូបថតរបស់កញ្ញា សុខ ពិសី អាចនិយាយបានថា នាងបានធ្វើការវះ កាត់ត្រង់ច្រមុះ ចង្កា ព្រមទាំងទម្រង់មុខស្ទើរទាំងស្រុងតែម្ដង ហើយបើប្រៀបធៀបរូបថតមុននឹងក្រោយនៃការកែសម្ផស្សរបស់នាងហាក់ដូចជាមនុស្សពីរផ្សេងគ្នា។ ប៉ុន្តែបើទោះបីជានាងបានធ្វើការវះកាត់កែសម្ផស្សស្រស់ស្អាតជាងមុនយ៉ាងនេះក៏ពិតមែន ប៉ុន្តែក៏មានសំឡេងនៃការរិះគន់ និងសរសើរផងដែរសម្រាប់ភ្នែកមហាជន។
តួយ៉ាងដូចជានៅពេលថ្មីៗនេះ កញ្ញា សុខ ពិសី ត្រូវអ្នកនិយមលេងបណ្ដាញសង្គមហ្វេសប៊ុក បាននាំគ្នាធ្វើការរិះគន់ដោយយករូបថតនាងមុននិងក្រោយពេលវះកាត់មកធ្វើការប្រៀបធៀប ថែមទាំងសរសេររិះគន់វាយប្រហារដោយមិនប្រណីដៃឡើយ ជុំវិញរឿងកែកុនសម្រស់នេះ ដោយមានអ្នកខ្លះលើកឡើងថា កែពេកឡើងមិនដូចមនុស្ស ទៅដូចជាម៉ាន់នឺកាំងវិញ….។ ខ្ញុំមើលយ៉ាងម៉េចក៏មិនចូលភ្នែកដែរ។ មុខពីមុនស្អាតគ្រាន់បើ ឥឡូវយ៉ាប់។
ជាមួយគ្នានេះដែរ ក៏មានអ្នកគាំទ្រមួយចំនួនផ្សេងទៀតបានលើកឡើងថា កែពេកទៅលែង ជា សុខ ពិសី ហើយ។ កែងចឹងទៅមុខមើលលែងចង់ស្គាល់ថាជា សុខ ពិសី មុខអាក្រក់មើលជាងមុនឆ្ងាយណាស់។ ឯកម្នាក់ទៀតបានសរសេរថា អាក្រក់ណាស់ច្រមុះដូចឈើ….។ ប៉ុន្តែយ៉ាងណាមិញបន្ទាប់ពីមានការរិះគន់ក៏ឃើញមានAccount ឈ្មោះRith TiTi បានចេញមុខសរសេរប្រឆាំងតបវិញថា ថាឲ្យគេច្រមុះដូចឈើ ចុះនៅផ្ទះយើងមានកញ្ចក់ឆ្លុះមើលមុខខ្លួនឯងទេ បានមួយសរសៃសក់គេនៅ ធម្មតាគេកែរឿងរបស់គេមិនមែនយកលុយអ្នកឯងមកកែទេ កុំពូកែទើសពេក ចង់បានពានទើស..។
កម្ពុជាថ្មី នៅរសៀលថ្ងៃទី៣០ ខែកក្កដា ឆ្នាំ២០១៥នេះ បានព្យាយាមទាក់ទងដើម្បីសាកសួរ ជុំវិញរឿងនេះពីសំណាក់តារាចម្រៀងកញ្ញា សុខ ពិសី ដែរ តែលេខទូរស័ព្ទប្រព័ន្ធ០១៣……២៤ ដែលនាងធ្លាប់ប្រើ ត្រូវស្ត្រីម្នាក់ទទួលជំនួសហើយប្រាប់ថា អូ….. មិនមែនទេបង ច្រឡំហើយ គាត់ឈប់ប្រើហើយទេដឹង ព្រោះអីលេខហ្នឹងខ្ញុំឈប់ប្រើយូរដែរហើយ។ ចេះតែមានអ្នកច្រឡំខលមកពិសេសអ្នកសារព័ត៌មានឧស្សាហ៍ខលមកញឹកញយណាស់…។ ដោយឡែកលេខប្រព័ន្ធ០១២…..៩២ នៅពេលភ្ជាប់ទំនាក់ទំនងទៅត្រូវបានឆ្លើយថា មិនអាចទំនាក់ទំនងបាន។
ចង់ដឹងថា មុនពេលវះកាត់ និងក្រោយពេលវះកាត់ខុសគ្នាខ្លាំងកម្រិតណា មានតែប្រិយមិត្តទស្សនារូបភាពទាំងអស់គ្នា៕
សុខ ពិសី រងការរិះគន់យ៉ាងចាស់ដៃ
0 Comments