មណ្ឌលគិរី ៖វិស័យនានានៅក្រុងសែនមនោរម្យនាពេលបច្ចុប្បន្ននេះ បាននិងកំពុងមានការអភិវឌ្ឍនៅលើទឹកដីមួយនេះគួរឱ្យកត់សម្គាល់ និងជាតំបន់មួយសម្រាប់ការទាក់ទាញលើវិស័យទេសចរណ៍ផងដែរ។ តែអ្វីដែលប្រជាពលរដ្ឋមិនសប្បាយចិត្តនោះ គឺនៅពេលយប់ ក្នុងក្រុងសែនមនោរម្យ តាមសួនកម្សាន្តនានា ក្នុងក្រុងមួយនេះចំណុចមួយចំនួនងងឹតគ្មានភ្លើងសម្រាប់បំភ្លឺពេលយប់ ដើម្បីសោភ័ណភាពក្រុង។ បញ្ហានេះត្រូវបានគេមើលឃើញថា រដ្ឋបាលសាលាខេត្ត និងអង្គភាពអគ្គិសនីដែលជាអ្នកទទួលខុសត្រូវខ្ពស់បំផុតលើបញ្ហានេះបែរជាមើលរំលងទៅវិញ។
ប្រជាពលរដ្ឋក្នុងសែនមនោរម្យ រួមទាំងមន្ត្រីរាជការនៅក្នុងតំបន់នេះដែរបានបង្ហើបឱ្យដឹងថា អ្នកទទួលខុសត្រូវលើបញ្ហាភ្លើងក្នុងក្រុងនេះ គឺសាលាខេត្តជាអ្នកផ្គត់ផ្គង់សម្ភារៈបរិក្ខារ និងថវិកា រីឯខាងអង្គភាពអគ្គិសនីជាអ្នកផ្គត់ផ្គង់ខាងចរន្តភ្លើង។ ចម្ងល់របស់មតិសាធារណជនបានចោទសួរថា បញ្ហាគ្មានភ្លើងសម្រាប់បំភ្លឺនៅក្រុងមួយនេះ តើបណ្ដាលមកពីកត្តាអ្វីខ្លះ? ឬមួយសាលាខេត្ត និងអង្គភាពអគ្គិសនីខេត្តនេះរួមគ្នាក្នុងការកាត់បន្ថយការចំណាយថវិកា បានជាទុកឱ្យក្រុងមួយនេះងងឹត ធ្វើឱ្យប្រជាពលរដ្ឋមិនសប្បាយចិត្ត។ ដោយឡែកជារៀងរាល់ថ្ងៃ ភ្លើងអគ្គិសនីសម្រាប់ផ្គត់ផ្គង់ដល់អ្នកប្រើប្រាស់នៅខេត្តមណ្ឌលគិរី ជាញឹកញាប់ឧស្សាហ៍ដាច់ភ្លើងណាស់ រំខានដល់ការរកស៊ីរបស់បងប្អូនអាជីវករ ម្យ៉ាងវិញទៀតរាល់សម្ភារៈដែលប្រើប្រាស់ដោយចរន្តអគ្គិសនីក៏មានការខូចខាតយ៉ាងច្រើនទៀតផង។ ដោយមានការខ្សឹបខ្សៀវគ្នាពីមន្ត្រីរាជការនៅក្នុងខេត្តនេះបាននាំនិយាយថា លោក ផាន់ កុសល ប្រធានអង្គភាពអគ្គិសនីខេត្តមណ្ឌលគិរីចូលមកកាន់ដំណែងថ្មីនៅមណ្ឌលគិរីនេះ គឺប្រហែលជាគាត់មានខ្សែធំៗណាស់នៅក្រោយខ្នង ព្រោះប្រធានអង្គភាពរូបនេះកន្លងមក បើទោះបីមានការចុះផ្សាយរបស់កាសែត និងទូរទស្សន៍ជាច្រើននៅភាពអសកម្មរបស់រូបគាត់ គាត់មិនខ្ចីឈឺក្បាលវិលមុខឡើយ ចង់ផ្សាយអីផ្សាយទៅ ស្រេចតែនឹងចិត្តទៅ។
ទាក់ទងនឹងបញ្ហានេះ លោក ឡុង វិបុល អភិបាលក្រុងបានបញ្ជាក់ប្រាប់អ្នកយកព័ត៌មាននៅរសៀលថ្ងៃទី០៦ ខែសីហា ឆ្នាំ២០១៥វេលាម៉ោង១៥និង៥៤នាទីនេះថា បញ្ហារឿងចរន្តអគ្គិសនីនេះវាហួសដែនសមត្ថកិច្ចរបស់គាត់ហើយ។
លោក អេង ប៊ុនហ៊ាង អភិបាលខេត្តមណ្ឌលគិរីបានថ្លែងប្រាប់អ្នកយកព័ត៌មានយើងថា រឿងបញ្ហាភ្លើងអគ្គិសនីសម្រាប់បំភ្លឺនៅបង្គោលភ្លើងតាមសួនភ្លឺតែចំនួន០៣បង្គោលនេះ លោកកំពុងចាត់ចែងឱ្យខាងមន្ត្រីជំនាញធ្វើការពិនិត្យឡើងវិញហើយ៕
ប្រជាពលរដ្ឋ ស្នើឱ្យរដ្ឋបាលសាលាខេត្ត និងអង្គភាពអគ្គិសនីជួយមើលភ្លើងពេលយប់ក្នុងក្រុងផង
0 Comments