ក្រុងប៉ោយប៉ែត ៖ បើយោងតាមលទ្ធផលបូកសរុបការងាររបស់សាលាឯកជន ពន្លកខ្មែរ ក្រុងប៉ោយប៉ែត ឃើញថា សិស្សានុសិស្សដែលបានចូលរៀនក្នុងសាលាឯកជនមួយនេះ ចាប់ពីកម្រិតមត្តេយ្យសិក្សា បឋមសិក្សា រហូតដល់មធ្យមសិក្សា គឺមានលទ្ធផលសិក្សាល្អគួរឲ្យកត់សម្គាល់។
កិច្ចប្រជុំបូកសរុបលទ្ធផលរបស់សាលាពន្លកខ្មែរខាងលើ ធ្វើឡើងកាលពីថ្ងៃទី២០ សីហា ២០១៥ ក្នុងបរិវេណសាលា ស្ថិតក្នុងក្បាលស្ពាន២ សង្កាត់-ក្រុងប៉ោយប៉ែត ខេត្តបន្ទាយមានជ័យ ដោយមានការអញ្ជើញចូលរួមពីសំណាក់លោក ង៉ោ ម៉េងជ្រួន អភិបាលក្រុងប៉ោយប៉ែត លោក ចែម សំបូរ ប្រធានការិយាល័យអប់រំយុវជន និងកីឡាក្រុងប៉ោយប៉ែត លោក យូ សុខខេង នាយកសាលាពន្លកខ្មែរ និងលោកគ្រូ-អ្នកគ្រូ អាណាព្យាបាលសិស្ស ព្រមទាំងសិស្សានុសិស្សជាច្រើននាក់ទៀត។
លោក យូ សុខខេង នាយកសាលាពន្លកខ្មែរបានបង្ហាញពីលទ្ធផលនៃការសិក្សារបស់សិស្សដែលបានចូលរៀននៅសាលាឯកជនពន្លកខ្មែរ ក្នុងកម្រឹតមត្តេយ្យសិក្សាមាន ១១ថ្នាក់ មានសិស្សសរុបចំនួន២៨៣នាក់ ស្រី១៥៣នាក់ បានឡើងថ្នាក់ទី១ ចំនួន១៩៥នាក់ ស្មើនឹង ៩៦%។ កម្រិតបឋមសិក្សាមាន ៤៥ថ្នាក់ មានសិស្សសរុបចំនួន១២១០នាក់ ស្រី៥៦៨នាក់ បានឡើងថ្នាក់ចំនួន១១៤៩នាក់ ស្មើនឹង ៩៥%។ កម្រិតមធ្យមសិក្សាមាន ២៩ថ្នាក់ មានសិស្សសរុបចំនួន៨២០នាក់ សិស្សថ្នាក់ទី៩ ប្រឡងសញ្ញាបត្រមធ្យមសិក្សាបឋមភូមិចំនួន១៦២នាក់ ស្រី៧២នាក់ ប្រឡងជាប់១៤៨នាក់ ស្រី៧១នាក់ស្មើនឹង៩២%។ ដោយឡែកសម្រាប់ថ្នាក់ទី១២ ដែលនឹងត្រូវប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី២៤-២៤ សីហា នាពេលខាងមុខមានចំនួន៦៣នាក់ ស្រី២៦នាក់។
ជាមួយកិច្ចប្រជុំនេះដែរលោក ង៉ោ ម៉េងជ្រួន អភិបាលក្រុងប៉ោយប៉ែតបានមានប្រសាសន៍ថា លោកសូមធ្វើការកោតសរសើរខ្ពស់ចំពោះលោកនាយកសាលាពន្លកខ្មែរក្រុងប៉ោយប៉ែត ដែលបានខិតខំប្រឹងប្រែងលើកស្ទួយវិស័យអប់រំ នៅក្រុងប៉ោយប៉ែតដែលជាក្រុងមួយសំបូរទៅដោយប្រជាជនរស់នៅយ៉ាងច្រើន ស្របតាមគោលនយោបាយរបស់រដ្ឋាភិបាលនៃព្រះរាជាណាចក្រកម្ពុជាដែលមានសម្តេចតេជោ ហ៊ុន សែម ជាប្រមុខដឹកនាំ ហើយជាក់ស្តែងចំពោះសិស្សដែលបានមកចូលរួមសិក្សានៅជាទីនេះទៀតសោតគឺសុទ្ធតែទទួលបានលទ្ធផលសិក្សាល្អ។ ហើយលោកក៏សូមធ្វើការអំពាវនាវដល់សិស្សានុសិស្សទាំងអស់ត្រូវខិតខំប្រឹងប្រែងរៀនសូត្រយកចំណេះដឹង និងត្រូវជៀសវាងអោយឆ្ងាយពីគ្រឿងញៀន៕
សាលាពន្លកខ្មែរក្រុងប៉ោយប៉ែតសិស្សគ្រប់កម្រិតមានលទ្ធផលសិក្សាល្អ
0 Comments