គួររំលឹកដែរថា កាលពីថ្ងៃទី២ ខែសីហា ឆ្នាំ២០១៥ វេលាម៉ោង១១និង៥០នាទីយប់ នៅត្រង់ចំណុចផ្លូវបំបែកក្បែរមន្ទីរពេទ្យវិសាលសុខ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តម៉ាកPorsche ពណ៌ស ហើយរថយន្តនេះត្រូវបានគេដោះស្លាកលេខចេញ ដែលមានស្លាកលេខភ្នំពេញ2AD-7888 បានបើកបរយ៉ាងលឿនក្នុងទិសដៅពីលិចទៅកើត ហើយក៏បានបុកទៅលើម៉ូតូមួយគ្រឿង ដែលមានសណ្តោងរ៉ឺម៉កដឹកទឹកកក របស់ឈ្មោះទុយ មោង ភេទប្រុស អាយុ៤២ឆ្នាំ រស់នៅសង្កាត់រតនៈ ក្រុងបាត់ដំបង បណ្ដាលឲ្យម្ចាស់ម៉ូតូរងរបួសយ៉ាងដំណំនៅក្នុង ខណៈនោះដែរគេសង្កេតឃើញថារថយន្តចង់មានបំណងព្យាយាមបើករត់គេចបន្តទៅទៀត ប៉ុន្តែសំណាងល្អដោយសារតែការប៉ះទង្គិចនោះត្រូវបានក្បាលរថយន្តកៀបកង់ជាប់ ដោយមិនអាចបើកបរបានទើបគេឃើញមានមនុស្សស្រីចំនួនពីរនាក់បានចេញពីរថយន្តដើម្បីធ្វើការដោះស្រាយជាមួយភាគីម៉ូតូ។ នៅពេលនោះគឺគេស្គាល់យ៉ាងច្បាស់ថាគឺជាកញ្ញា សាសា ដែលទើបនឹងមានរឿងក្ដីក្ដាំថ្មីៗនៅឯទីក្រុងភ្នំពេញជាមួយនឹងលោកឧកញ៉ាសុខ ប៊ុន ហើយក៏ទើបតែមានការបើកបរបុកទៅលើជនជាតិបារាំងម្នាក់ផងដែរ ដែលការប៉ះទង្គិចនោះស្ថិតនៅក្រុងភ្នំពេញ ចំណែករថយន្តបង្កដែលនាងបើកបរនោះគឺជារថយន្តតែមួយជាមួយនឹងការបង្កនៅក្នុងខេត្តបាត់ដំបង។ នៅទីបំផុតការចរចាគ្នាដើម្បីសម្របសម្រួលគឺភាគីរថយន្តបានបង់ទៅឲ្យជនរងគ្រោះចំនួន៣លានរៀល ដែលភ្លាមៗនោះដែរ ជនរងគ្រោះត្រូវបានក្រុមគ្រូពេទ្យវិសាលសុខនាំចូលទៅពិនិត្យ និងព្យាបាលទាំងយប់។
យោងតាមប្រភពច្បាស់ការជាច្រើនបាននិយាយថា នៅល្ងាចមុនពេលកើតហេតុគឺកញ្ញាសាសា រួមទាំងនារីប្រមាណ៥នាក់ទៀតដោយក្នុងចំណោមនោះដែរក៏មានមនុស្សប្រុសម្នាក់ឈ្មោះ តូ ដែលគេតែងតែហៅលែងថា ឡូតូ ជាអ្នកគ្រប់គ្រងផ្ទះសំណាក់យីហោ ស្តារវីឡា ក៏មានវត្តមាននៅទីនោះដែរព្រោះគេគឺជាមិត្តស្និទ្ធស្នាលជាមួយនឹងកញ្ញាសាសា ដោយគេបាននាំគ្នាចូលទៅផឹកស៊ីនៅក្នុងអាហារដ្ឋានមួយកន្លែងយីហោតោពីរ ស្ថិតក្នុងភូមិកំពង់ក្របី។
ប្រភពច្បាស់ការដដែលបានបន្តថា នៅពេលដែលការផឹកស៊ីនេះម្នាក់ៗកាន់តែទោរទន់ទៅហើយនោះ ពួកគេបានទូរស័ព្ទទៅកក់កៅអីសាឡុងដើម្បីបន្តការរាំរែកនៅក្នុងក្លិបកម្សាន្តស្តារឡាយជាបន្តទៀត។ បន្ទាប់មកពួកគេក៏បានបែកគ្នាជាពីរក្រុមដោយសារតែគេមានរថយន្តចំនួនពីរគ្រឿង ដោយក្រុមទីមួយគេបានធ្វើដំណើរឆ្ពោះទៅកាន់ក្លិបកម្សាន្តហើយ ដោយឡែកកញ្ញាសាសា បានធ្វើដំណើរជាមួយនឹងនារីម្នាក់ទៀតតាមបណ្តោយផ្លូវជាតិលេខ៥ លុះទៅដល់ចំណុចកើតហេតុក៏មានករណីគ្រោះថ្នាក់ចរាចរណ៍នេះបានកើតឡើងទើបការកក់សាឡុងត្រូវបានរំសាយចោលវិញ។
ប្រភពមួយផ្សេងទៀតដែលជាថៅកែហាងនៅម្ដុំជ្រៃកោងបាននិយាយថា គ្រោះថ្នាក់ចរាចរណ៍របស់កញ្ញាសាសា គឺរូបគេក៏បានមកទាន់ដែរ ព្រមទាំងបានថតរូបថែមទៀត ប៉ុន្តែភ្លាមៗនោះគេឃើញមនុស្សម្នាក់ ដែលមានឈ្មោះតូ បានដើរមកខ្សឹបថា កុំថតអីគឺជាកញ្ញាសាសា សុទ្ធតែគ្នាយើងទេលុបចោលទៅ។ ដូច្នេះហើយបានជាការធ្វើកំណត់ហេតុរបស់សមត្ថកិច្ចចរាចរណ៍បានដាក់ឈ្មោះ តូ នេះជាម្ចាស់រថយន្ត តែធាតុពិតគេពុំមានរថយន្តប្រភេទនេះឡើយ ហើយការអះអាងថាគេជាម្ចាស់រថយន្តគួរណាស់តែសមត្ថកិច្ចសុំត្រួតពិនិត្យឯកសារពាក់ព័ន្ធ ហើយក៏ត្រូវតែនាំខ្លួនទៅកាន់ការិយាល័យដើម្បីវាស់កម្រិតជាតិអាល់កុលឲ្យសមស្របតាមនីតិវិធី ដោយមិនគួរណាលោក ឈាង រ៉ុង អនុញ្ញាតឲ្យភាគីបង្ក ដែលសុទ្ធតែស្រវឹងធ្វើការស្ទូចយករថយន្តចេញពីកន្លែងកើតហេតុបែបនេះសោះ ដោយបានធ្វើកំណត់ហេតុដាក់ឈ្មោះ តូ ជាម្ចាស់រថយន្តទៅវិញ ហើយនៅយប់នោះទំនងជារវល់ខ្លាំងបានជាឈ្មោះតូ ចូលដល់ផ្ទះវិញនៅវេលាម៉ោង៤ទៀបភ្លឺ ចំណែកកញ្ញា សាសា គឺស្នាក់នៅក្នុងសណ្ឋាគារ ភ្លាស់ស៊ី ដែលជាសណ្ឋាគារដ៏ទំនើបនៅក្នុងខេត្តបាត់ដំបង។
នៅព្រឹកថ្ងៃទី៤ ខែសីហា ឆ្នាំ២០១៥ កម្ពុជាថ្មីបានទទួលព័ត៌មានពិស្តារមួយបន្ថែមទៀតគឺនៅយប់ក្រោយពេលកើតហេតុគឺមានក្រុមហ៊ុនលក់រថយន្តមួយយីហោ ហេង ហ៊ុយ ជាអ្នកចេញមុខជួលរថយន្តស្ទូចរបស់លោក អានឲ្យស្ទូចចេញពីចំណុចកើតហេតុទៅលាក់ទុកនៅផ្ទះលោក អាន ក្នុងតំលៃ១០០ដុល្លារ។ លុះនៅល្ងាចថ្ងៃទី៣ ខែសីហា ឆ្នាំ២០១៥ ទើបមានការជួលដឹកបន្តទៅកាន់ទីក្រុងភ្នំពេញក្នុងតម្លៃ៣៥០ដុល្លារបន្ថែមទៀតដោយរថយន្តនេះមិនមានការជួសជុលឡើយ។
រាល់ការបំភ្លឺរបស់ប្រភពនានាជាច្រើននេះគួរណាស់តែគ្រប់គ្រាន់ហើយសម្រាប់កញ្ញាសាសា ដែលកំពុងតែឆេះដុំខ្ញាល់នឹងអ្នកកាសែត ដោយបានចោទប្រកាន់ថាជាការចុះផ្សាយមិនពិត ហើយចង់ធ្វើដំណើរទៅដល់ខាងមុខស្នាក់ការកាសែតកម្ពុជាថ្មីទៀត នេះបើយោងតាមការសរសេរនៅលើហ្វេសប៊ុករបស់នាងកាលពីល្ងាចថ្ងៃទី៣ ខែសីហា ឆ្នាំ២០១៥។
លោកនួន សាន ព្រះរាជអាជ្ញាសាលាដំបូងខេត្តបានបញ្ចេញនូវប្រតិកម្មយ៉ាងខ្លាំងទៅលើសមត្ថកិច្ចចរាចរណ៍ ដែលតែងតែព្យាយាមលាក់រឿងហេតុដែលបានកើតឡើងជាញឹកញាប់ ដោយមិនបានរាយការណ៍ ឬក៏ត្រូវឃាត់ខ្លួនជាបណ្ដោះអាសន្នទៅតាមនីតិវិធីច្បាប់ ព្រោះការបង្កគ្រោះថ្នាក់ចរាចរណ៍ដោយភាគីម្ខាងសេពគ្រឿងស្រវឹងនោះ មិនត្រូវធ្វើការដោះលែង ឬសម្របសម្រួលគ្នានៅត្រង់ចំណុចកើតហេតុនោះឡើយ ព្រោះបើតាមលោកដឹងមានច្រើនករណីណាស់ដែលគេធ្វើការលាក់លៀមដោះស្រាយនៅក្រៅការិយាល័យគឺជាការខុសច្បាប់ទាំងស្រុង សម្រាប់អ្នកអនុវត្តច្បាប់ហើយបំពានលើផ្លូវច្បាប់៕
កញ្ញាសាសាកំពុងបដិសេធថា គ្រោះថ្នាក់ចរាចរណ៍នៅបាត់ដំបងមិនមែនជាការពិត
0 Comments