ភ្នំពេញ ៖ ក្នុងរយៈពេល៥ថ្ងៃ គិតត្រឹមថ្ងៃទី៦ រហូតថ្ងៃទី១១ ខែសីហា ឆ្នាំ២០១៥ ការិយាល័យជំនាញប្រឆាំងគ្រឿងញៀន នៃកងរាជអាវុធហត្ថរាជធានីភ្នំពេញ និងអាវុធហត្ថតាមបណ្ដាខណ្ឌចំនួន៤ទៀតគឺខណ្ឌជ្រោយចង្វា ខណ្ឌទួលគោក ខណ្ឌដូនពេញ ចំការមន និងពោធិ៍សែនជ័យ បានចេញប្រតិបត្តិការចុះបង្ក្រាបចាប់ខ្លួនជនសង្ស័យសរុប៤០នាក់(ស្រី៦នាក់) ពាក់ព័ន្ធការប្រើប្រាស់ និងជួញដូរគ្រឿងញៀន និងកាំភ្លើងគ្រាប់បែកដៃដែលសមត្ថកិច្ចកំពុងបន្តបើកអង្កេត សង្ស័យថាអាចពាក់ព័ន្ធនឹងក្រុមភេរវកម្មណាមួយ ហើយបានរៀបចំបញ្ជូនទៅតុលាការជាបន្តបន្ទាប់។
មន្ត្រីអាវុធហត្ថការិយាល័យប្រឆាំងគ្រឿងញៀនរាជធានីបានឲ្យដឹងកាលពីវេលា៩និង៥នាទីព្រឹក ថ្ងៃទី១២ ខែសីហាថា ជនសង្ស័យទាំង៤០នាក់ដែលកម្លាំងអាវុធហត្ថការិយាល័យជំនាញ និងអាវុធហត្ថខណ្ឌខាងលើឃាត់ខ្លួន ពាក់ព័ន្ធករណីជួញដូរគ្រឿងញៀន និងប្រើប្រាស់យ៉ាងសកម្មនៅចំណុចខាងលើ ជាពិសេសនៅតំបន់មុខមន្ទីរពេទ្យលោកសង្ឃ ដែលសកម្មភាពពួកគេហាក់បីដូចជាផ្គើននឹងសមត្ថកិច្ចតែម្ដង។
ជាការកត់សម្គាល់ ក្រុមដែលបង្ក្រាបបាននៅខណ្ឌពោធិ៍សែនជ័យប្រើប្រាស់រូបភាពដូចក្រុមភេរវកម្ម ព្រោះមានទាំងកាំភ្លើង និងគ្រាប់បែកដៃគ្រាប់កាំភ្លើងទៀតផង។ ពាក់ព័ន្ធទៅនឹងការបង្ក្រាបករណីជួញដូរគ្រឿងញៀន៥យប់ ពេញនោះ កម្លាំងអាវុធហត្ថរាជធានីដកហូតបានថ្នាំញៀនម៉ាទឹកកកសរុបជាង៥០កញ្ចប់ តូច-ធំ ព្រមទាំងសម្ភារៈពាក់ព័ន្ធមួយចំនួនដូចជា ១-គ្រាប់បែកដៃ១គ្រាប់,២-កាំភ្លើងខ្លីK 54 មួយដើម, បង់១គ្រាប់១២ ,និងក្បាលគ្រាប់បាញ់រួច១គ្រាប់ ,៣-ម្សៅក្រាម ស.ថ្លា…កញ្ចប់តូច ,៤-ប្រដាប់កាច់.ក ឡាន១៥-ប្រដាប់ឆ្កឹះសោម៉ូតូមួយ ,៦-ទូរស័ព្ទ៣គ្រឿង,៧-សម្ភារៈប្រើប្រាស់គ្រឿងញៀន១ចំនួនធំ ,៨-សោចាក់ចង្កូតឡានដែលកាច់បាក់១ និង៩-ម៉ូតូC125 ចំនួន២គ្រឿង និងសម្ភារៈពាក់ព័ន្ធមួយចំនួនទៀត។
បច្ចុប្បន្ន កម្លាំងជំនាញកងរាជអាវុធហត្ថរាជធានីបានបញ្ជូនជនសង្ស័យទៅតុលាការផ្ដន្ទាទោសជាបន្តបន្ទាប់ ហើយសមត្ថកិច្ចកំពុងស្រាវជ្រាវតាមចាប់ខ្លួនមេខ្លោងធំជាមេៗរបស់ជនសង្ស័យខាងលើ ដើម្បីយកមកផ្ដន្ទាទោសបន្តទៀត តាមទិសដៅចង្អុលបង្ហាញរបស់លោកមេបញ្ជាការអាវុធហត្ថរាជធានី ពីព្រោះថាបទល្មើសភាគច្រើន ពួកជនល្មើសសុទ្ធសឹងតែប្រើប្រាស់គ្រឿងញៀនតែម្ដង ដើម្បីឲ្យមានចិត្តក្លាហានក្នុងពេលធ្វើសកម្មភាពល្មើសគ្រប់ប្រភេទ មិនខ្លាចសមត្ថកិច្ចនោះឡើយ៕
ចាប់ខ្លួនជនសង្ស័យ៤០នាក់ ពាក់ព័ន្ធគ្រឿងញៀន ដកហូតបានកាំភ្លើង និងគ្រាប់បែកដៃអាចជាក្រុមភេរវកម្ម
0 Comments