លោក គង់ វិចិត្រា នាយកប្រតិបត្តិអង្គការមូលនិធិកុមារពិការ បានឲ្យដឹងដែរថា សិក្ខាសាលា ដែលធ្វើក្នុងរយៈពេល២ថ្ងៃនេះចាប់ពីថ្ងៃទី៦-៧ ខែ សីហា «គឺដើម្បីកសាងសមត្ថភាព និងផ្តល់ទំនុកចិត្តសម្រាប់អ្នកពិការភាពខ្សោយសតិបញ្ញា និងអូទីស្សឹម រួមទាំងអាណាព្យាបាល ឪពុកម្តាយ និងអ្នកគាំទ្ររបស់ពួកគាត់ ជួយលើកកម្ពស់ការចូលក្នុងឆាកនយោបាយ សម្រាប់ជនពិការខ្សោយសតិបញ្ញា និងអូទីស្សឹម»។ លោកបន្តថា កុមារពិការ និងជនពិការរាងកាយ បានជួបប្រទះបញ្ហាប្រឈមជាច្រើន ដូចជាកង្វះការចងចាំ, មិនអាចរស់នៅបានដោយខ្លួនឯង មិនអាចរៀនសូត្រ តាមសាលាបានស្រួល និងបញ្ហាមួយចំនួនទៀត។ លោកក៏បានអំពាវនាវដល់រាជរដ្ឋាភិបាលកម្ពុជា ក៏ដូចជាដៃគូពាក់ព័ន្ធទាំងអស់ មេត្តាជួយគាំទ្រលើកកម្ពស់សិទ្ធិរបស់ជនពិការឲ្យកាន់តែទូលំទូលាយ ដែលធ្វើឲ្យពួកគាត់រស់នៅប្រកបដោយមានទំនុកចិត្ត និងគ្មានការរើសអើងក្នុងសង្គម។
លោក ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការបានទទួលស្គាល់ថា បងប្អូនជនពិការពិតជាជួបបញ្ហាប្រឈមច្រើនណាស់ ហើយបើយោងតាមប្រសាសន៍លោក វង សូត រដ្ឋមន្ត្រីក្រសួងសង្គមកិច្ច ក្រសួងកំពុងមានការគិតគូរ ដើម្បីប្រមូលបងប្អូនជនពិការ ដែលគ្មានទីពឹង ក្រីក្រលំបាក គ្មានផ្ទះសំបែង ហើយស្ម័គ្រចិត្តចង់រស់នៅក្នុងមណ្ឌលក្រោមការគ្រប់គ្រងរបស់រដ្ឋនោះ ក្រសួងនឹងផ្តល់នូវអាហារហូបចុកចំនួន ៥.០០០រៀល ក្នុង១ថ្ងៃ។ ដូចដែលកន្លងមកក្រសួងបានជួយក្រុមតន្ត្រីជនពិការមានគ្នា ១០នាក់ អីចឹងគាត់អាចទទួលបានថវិកា ៥ម៉ឺនរៀល ក្នុងមួយថ្ងៃ អាចជួយកាត់បន្ថយនូវការលំបាករបស់បងប្អូនជនពិការរបស់យើងផងដែរ។ សិក្ខាសាលារយៈពេល២ថ្ងៃនេះចាប់ពីថ្ងៃទី៦-៧ ខែ សីហា “គឺដើម្បីកសាងសមត្ថភាព និងផ្តល់ទំនុកចិត្តសម្រាប់អ្នកពិការភាពខ្សោយសតិបញ្ញា និងអូទីស្សឹម រួមទាំងអាណាព្យាបាល ឪពុកម្តាយ និងអ្នកគាំទ្ររបស់ពួកគាត់ ជួយលើកកម្ពស់ការចូលក្នុងឆាកនយោបាយ សម្រាប់ជនពិការខ្សោយសតិបញ្ញា និងអូទីស្សឹម” សូមឱ្យអង្គសិក្ខាសាលាទាំងអស់ចូលរួមពិភាក្សាឲ្យបានផុលផុស ដើម្បីទទួលបានចំណេះដឹងល្អៗពីសិក្ខាសាលានេះ។
លោកក៏បានឲ្យដឹងដែរថា តាមការស្រាវជ្រាវរបស់វិទ្យាស្ថានស្ថិតិកាលពីឆ្នាំ២០១៣ ជនពិការនៅកម្ពុជាមានជាង ៣០ម៉ឺននាក់ ហើយចំនួននេះអាចកើនឡើងដល់ចំនួន ៥០ម៉ឺននាក់ នៅឆ្នាំ២០១៥នេះ៕
បណ្តុះបណ្តាលលើកកម្ពស់សមត្ថភាពដល់ជនពិការ
0 Comments