ភ្នំពេញ ៖ ក្រោយពេលលោក ម៉ៅ សាមឿន ហៅនាយវីតាមីនសេ បានចូលសម្រាកព្យាបាលជំងឺនៅមន្ទីរពេទ្យកាល់ម៉ែត ដែលចាំបាច់ត្រូវការថវិកាមួយចំនួនធំដើម្បីធ្វើការវះកាត់នោះ ក្រុមគ្រួសាររបស់តារាកំប្លែងជើងចាស់រូបនេះក៏បានដង្ហោយសុំឲ្យសប្បុរសជននានាក៏ដូចជាសមាគមសិល្បករខ្មែរជួយដល់គាត់ផងដែរ។
អ្នកនាងប៉េងប៉ោង កូនស្រីបង្កើតរបស់នាយវីតាមីនសេបាននិយាយឲ្យដឹងថា ឪពុករបស់នាងមានអាយុ៦៧ឆ្នាំទៅហើយ ដែលសព្វថ្ងៃកំពុងមានជំងឺប្រចាំកាយលើសជាតិស្ករ ឫសដូងបាត និងជំងឺម្យ៉ាងទៀតគេហៅថាបូសអន្ទង់ ដោយក្រុមគ្រូពេទ្យតម្រូវឲ្យធ្វើការវះកាត់ជាបន្ទាន់ផងដែរនៅព្រឹកថ្ងៃទី៨កញ្ញានេះ។
ប៉េងប៉ោងនិយាយបន្តថា នេះមិនមែនជាលើកទីមួយទេដែលឪពុករបស់អ្នកនាងត្រូវបានបញ្ជូនមកព្យាបាលនៅមន្ទីរពេទ្យនោះ ហើយនៅពេលនេះដែរ ស្ថានភាពជំងឺហាក់បីដូចជាធ្ងន់ធ្ងរមានខ្ទុះ ឈាមហូរគួរឲ្យព្រួយបារម្ភ។
ដំណក់ឈាមរបស់នាយវីតាមីនសេនិយាយបន្ថែមថា មួយរយៈចុងក្រោយនេះឪពុករបស់នាងមិនបានលេងកំប្លែងដូចពេលមុនៗនោះទេ នេះក៏ព្រោះតែសុខភាពរបស់គាត់ចុះខ្សោយ និងមានជំងឺប្រចាំកាយច្រើនមុខ ហើយនៅពេលនេះបើតាមការនិយាយប្រាប់របស់ក្រុមគ្រូពេទ្យជំនាញនៃមន្ទីរពេទ្យកាល់ម៉ែតបានឲ្យដឹងថា អ្វីដែលមានការព្រួយបារម្ភនោះ គឺឪពុករបស់នាងមានជាតិស្ករខ្ពស់ដែលអាចធ្វើឲ្យមានផលលំបាកដល់ការវះកាត់ប្រភេទជំងឺបូសអន្ទង់នេះ។
អ្នកនាងប៉េងប៉ោងនិយាយបញ្ជាក់ឲ្យដឹងថា បន្ទាប់ពីឪពុករបស់នាងបានចូលសម្រាកព្យាបាលនៅមន្ទីរពេទ្យប៉ុន្មានថ្ងៃនេះ គឺមានអ្នកសិល្បៈ ក៏ដូចជាសប្បុរសជនមួយចំនួនបានមកសួរសុខទុក្ខ និងជួយផ្តល់ជាថវិកាដើម្បីព្យាបាលជំងឺឪពុករបស់នាងផងដែរ។
រូបនាង ព្រមទាំងក្រុមគ្រួសារសូមថ្លែងអំណរគុណ និងអំពាវនាវដល់សប្បុរសជន ក៏ដូចជាសមាគមសិល្បករខ្មែរជួយដល់ក្រុមគ្រួសាររបស់គាត់ផង ពីព្រោះពេលនេះកំពុងតែខ្វះខាតប្រាក់កាសមួយចំនួនធំដើម្បីព្យាបាលជំងឺឪពុករបស់នាង ជាពិសេសសូមសម្តេចតេជោ និងសម្តេចកិត្តិព្រឹទ្ធបណ្ឌិត មេត្តាជួយដល់ឪពុករបស់នាងផងដែរ៕
ក្រុមគ្រួសារតារាកំប្លែងនាយវីតាមីនសេ ដង្ហោយសុំឲ្យសប្បុរសជនជួយ
0 Comments