ព្រះសីហនុ ៖ លោកសេង សក្កា អគ្គនាយក នៃអគ្គនាយកដ្ឋានក្រសួងការងារ និងបណ្តុះបណ្តាលវិជ្ជាជីវះ និងជាប្រធានក្រុមប្រឹក្សាភិបាលនៃប.ស.ស បានផ្សព្វផ្សាយ ស្តីពីសុវត្ថិភាពចរាចរណ៍លើមធ្យោបាយដឹកជញ្ជូនសុវត្ថិភាពការធ្វើដំណើររបស់កម្មករ និយោជិក និងពិធីសំណេះសំណាលជាមួយសមាជិក ប.ស.ស និងអត្ថគាហក(អ្នកនៅក្នុងបន្ទុក) នៅតំបន់សេដ្ឋកិច្ចពិសេសបិទត្រាំង មានទីតាំងនៅឃុំបិទត្រាំង ស្រុកព្រៃនប់ ខេត្តព្រះសីហនុ នៅព្រឹកថ្ងៃទី១៤ ខែកញ្ញា ឆ្នាំ២០១៥។
លោកសេង សក្កា មានប្រសាសន៍ថា តាមព្រះរាជក្រមលេខ នស/រកម/០៩០២/០១៨ ចុះថ្ងៃទី២៥ ខែកញ្ញា ឆ្នាំ២០០២ ប្រកាសឲ្យប្រើប្រាស់ច្បាប់ ស្តីពីរបបសន្តិសង្គមក្រោមបញ្ញត្តិនៃច្បាប់ស្តីពីការងារ។ ដោយឡែករយៈពេល៨ខែ ឆ្នាំ២០១៥ ប.ស.ស មានរបាយការណ៍ហានិភ័យការងារចំនួន ២០,៥៨២នាក់ លទ្ធផលអង្កេតមានគ្រោះថ្នាក់ការងារចំនួន១៩.៨២៥នាក់ គ្រោះថ្នាក់ក្នុងកន្លែងធ្វើការ១៤.៨១៤នាក់ គ្រោះថ្នាក់ពេលធ្វើដំណើរ ៥.០០៩នាក់ និងជំងឺវិជ្ជាជីវៈ០២នាក់ និងសម្រេចផ្តល់តាវកាលិកហានីភ័យការងារជូននិយោជិត នៅតាមមន្ទីរពេទ្យ បាត់បង់ការងារអចិន្ត្រៃយ៍ វិភាជន៍បូជាសពឧត្តរជីវី តាវកាលិកអ្នកចាំថែរក្សា និងសេវាបុននីតិសម្បទាចំណាយថវិកា ៧.៩២៨.៤៨៤.៨០០រៀល (១លាន៩សែនដុល្លាអាមេរិក)។
លោកបានបន្តថា ក្នុងអាណត្តិទី៣ រាជរដ្ឋាភិបាលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅឆ្នាំ២០១៥ រៀបចំគោលនយោបាយបេឡាជាតិរបបសន្តិសង្គមគ្រោះថ្នាក់ចរាចរ។ ឆ្នាំ២០១៦ យើងរៀបចំរបបសន្តិសុខសង្គមផ្នែកថែទាំសុខភាព ដោយពិនិត្យ ព្យាបាលដោយឥតគិតលុយ គឺបេឡាជាតិសន្តិសុខសង្គមជាអ្នកធានារ៉ាប់រង និងឆ្នាំ២០១៧ រៀបចំផ្នែកប្រាក់សោធនជូនសម្រាប់កម្មករ និយោជិត។
លោកសេង សក្កា ផ្វើការផ្តាំផ្ញើដល់កម្មករ និយោជក និយោជិត សហការអប់រំផ្សព្វផ្សាយដល់កម្មករ និយោជិតឲ្យយល់ដឹងពីលក្ខខណ្ឌការងារ លក្ខខណ្ឌអនាម័យ សុវត្ថិភាពការងារ ការថែទាំសុខភាព ការការពារបរិស្ថាននៅកន្លែងធ្វើការជាដើម និងឲ្យមានគណៈកម្មការសុខភាពសុវត្ថិភាពការងារនៅនឹងកន្លែងការងារ។ ចំណេះដឹងដែលទទួលបានពីមន្ត្រីជំនាញត្រូវចូលរួមគាំទ្រ និងអនុវត្តសកម្មភាពសុវត្ថិភាពចរាចរណ៍ផ្លូវគោលឲ្យបានខ្ជាប់ខ្ជួន ជាពិសេសអនុវត្តនូវវិធានការទាំង ១០ចំណុច មានដូចជា ពាក់មួកសុវត្ថិភាព និងខ្សែក្រវាត់សុវត្ថិភាព បើពិសារគ្រឿងស្រវឹងកុំបើកបរ កុំបើកបរហួសល្បឿនកំណត់ កុំវ៉ាជែងក្នុងស្ថានភាពគ្រោះថ្នាក់ បើកបរផ្ទុកលើសចំណុះកំណត់ គោរពសិទ្ធអាទិភាពពេលបើកបរ កុំប្រើប្រាស់ទូរស័ព្ទដៃក្នុងពេលបើកបរ ត្រួតពិនិត្យយានយន្តនិងគ្រឿងបរិធានមុនបើកបរ ត្រូវមានប័ណ្ណបើកបរតាមប្រភេទយានយន្ត ត្រូវមានសម្ភារៈចំណាំងផ្លាតធ្វើដំណើរនៅពេលយប់ ដើម្បីការពារបាននូវហានិភ័យក្នុងការងារធានារ៉ាប់រងព្យាបាលដោយឥតគិតថ្លៃដល់ជនរងគ្រោះទាំងអស់តាមរយៈប.ស.ស ជូនដល់កម្មករ និយោជក៕
ក្រសួងការងារបណ្តុះបណ្តាល ផ្សព្វផ្សាយស្តីពីសុវត្ថិភាពចរាចរណ៍លើមធ្យោបាយ ដឹកជញ្ជូន សុវត្ថិភាពធ្វើដំណើររបស់កម្មករនិយោជិក
0 Comments