ក្រុមមន្ត្រីស៊ើបការណ៍បាននិយាយថា ការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិកបានសម្លាប់សកម្មប្រយុទ្ធប៉ាគីស្ថានយ៉ាងហោចណាស់ ១៥នាក់នៅក្នុងសង្កាត់ Gomal ក្នុងប្រទេសអាហ្វហ្គានីស្ថានកាលពីថ្ងៃពុធដែលនេះជាផ្នែកមួយនៃយុទ្ធនាការយន្តហោះគ្មានមនុស្សបើកប្រឆាំងពួកសកម្មប្រយុទ្ធប៉ាគីស្ថានក្នុងប្រទេសអាហ្វហ្គានីស្ថាន។
មន្ត្រីស៊ើបការណ៍ម្នាក់បាននិយាយថា “សាកសពរបស់ពួកសកម្មប្រយុទ្ធចំនួន១៥នាក់ដែលត្រូវបានសម្លាប់នឹងត្រូវបញ្ជូនទៅកន្លែងកំណើតរបស់ពួកគេនៅក្នុងក្រុង Dera Ismail Khan ដែលជាក្រុងមួយស្ថិតនៅភាគពាយព្យប្រទេសប៉ាគីស្ថាន”។
មន្ត្រីចំនួនបីនាក់បានបញ្ជាក់ថា ពួកសកម្មប្រយុទ្ធទាំង ១៥នាក់នេះគឺជាបក្សពួក Gandapur នៃក្រុមតាលីបង់ប៉ាគីស្ថានដែលដឹកនាំដោយលោក Mullah Fazlullah ដែលបុរសម្នាក់នេះបានអះអាងទទួលខុសត្រូវចំពោះការសម្លាប់រង្គាលសិស្សជាង ១៣០នាក់នៅក្នុងសាលាមួយក្នុង ទីក្រុង Peshawar កាលពីខែធ្នូ។
ការវាយប្រហារនេះបានកើតឡើងមួយសប្ដាហ៍បន្ទាប់ពីប្រទេសប៉ាគីស្ថាននិងអាហ្វហ្គានីស្ថានបានយល់ព្រមបញ្ចប់ការស្តីបន្ទោសដាក់គ្នានៅលើការវាយប្រហាររបស់កងទ័ពនិងធ្វើការដើម្បីស្ដារការជឿទុកចិត្តគ្នាឡើងវិញ។
ប្រទេសជិតខាងទាំងពីរនេះបានចោទប្រកាន់គ្នាទៅវិញទៅមកថា បានធ្វើកិច្ចការតិចតួចពេកដើម្បីទប់ស្កាត់ពួកយុទ្ធជនតាលីបង់និងក្រុមសកម្មប្រយុទ្ធឥស្លាមដទៃទៀតមិនឲ្យប្រតិបត្តិការនៅលើទឹកដីរបស់ខ្លួន។
ប្រធានាធិបតីអាហ្វហ្គានីស្ថានលោក Ashraf Ghani ចង់បង្កើតទំនាក់ទំនងកាន់តែជិតស្និតជាមួយប្រទេសប៉ាគីស្ថាននៅពេលដែលលោកចូលកាន់តំណែងកាលពីឆ្នាំមុនដោយសង្ឃឹមថា ទីក្រុងអ៊ីស្លាម៉ាបាដអាចជំរុញឲ្យមេដឹកនាំតាលីបង់ចូលមកកាន់តុចរចាដើម្បីបញ្ចប់សង្គ្រាមរយៈពេលវែងរបស់អាហ្វហ្គានីស្ថាន។
ទំនាក់ទំនងបានចេញជាផ្លែផ្កានៅក្នុងខែកក្កដាជាមួយនឹងការយល់ព្រមរៀបចំកិច្ចចរចាសន្តិភាពជាមួយពួកសកម្មប្រយុទ្ធ។ ប៉ុន្តែបន្ទាប់ពីការអះអាងនៃការស្លាប់របស់ស្ថាបនិកនៃក្រុមនេះគឺលោក Mullah Mohammad Omar ដំណើរការនៃកិច្ចចរចាត្រូវបានផ្អាកហើយពួកតាលីបង់បានចាប់ផ្តើមរលកនៃការវាយប្រហារនៅក្នុងក្រុងកាប៊ុលដោយបានសម្លាប់មនុស្សជាង៥០នាក់ ហើយបានធ្វើឲ្យទំនាក់ទំនងរវាងប្រទេសប៉ាគីស្ថាននិងអាហ្វហ្គានីស្ថានធ្លាក់ចូលក្នុងភាពតានតឹង៕
Reuters
យន្តហោះគ្មានមនុស្សបើករបស់អាមេរិកសម្លាប់ពួកតាលីបង់ក្នុងអាហ្វហ្គានីស្ថាន
0 Comments