អ្នកធ្វើដំណើរតាមទូកបាននិយាយថា ឪពុករបស់ក្មេងស៊ីរីដែលបានលង់ទឹកស្លាប់ Aylan Kurdi គឺបានធ្វើការជាមួយនឹងអ្នករត់ពន្ធហើយបើកទូកដែលបានក្រឡាប់ខណៈព្យាយាមទៅកាន់ប្រទេសក្រិក។
លោក Ahmed Hadi Jawwad និងភរិយារបស់គាត់ដែលបានបាត់បង់កូនស្រីអាយុ ១១ ឆ្នាំនិងកូនប្រុសអាយុ ៩ ឆ្នាំបានប្រាប់ Reutersថា លោក Abdullah Kurdi មានការភ័យស្លន់ស្លោនិងបង្កើន ល្បឿននៅពេលរលកបុកទូក។
លោក Jawwad បានឲ្យដឹងថា នៅចំណុចនៃការទំនាក់ទំនងរបស់គាត់ជាមួយនឹងអ្នករត់ពន្ធឈ្មោះ Abu Hussein លោក Abu Hussein បានប្រាប់ខ្ញុំថា លោក Kurdi គឺជាមនុស្សម្នាក់ដែលបានរៀបចំការធ្វើដំណើរនេះ។
Reuters បានព្យាយាមជាច្រើនដងដើម្បីទាក់ទងទៅកាន់ Kurdi តាមទូរស័ព្ទពីទីក្រុង Kobane នៃប្រទេសស៊ីរីប៉ុន្តែគឺមិនអាចទាក់ទងជាមួយគាត់បានឡើយ។ ចំណែកលោក Abu Hussein ក៏មិនអាចទាក់ទងបានដែរ។
ប៉ុន្តែទោះបីជាយ៉ាងណាក៏ដោយ លោក Kurdi បានប្រាប់គេហទំព័រ MailOnline របស់ចក្រភពអង់គ្លេសថា ការចោទប្រកាន់នោះមិនពិតទេ។ លោកបានថ្លែងថា “ខ្ញុំគិតអំពីការបើកបរទូកប៉ុន្តែខ្ញុំមិនជួញដូរទេ នោះគឺជាការភូតកុហកទាំងស្រុង”។
លោកបានប្រាប់សារព័ត៌មាននេះថា “នេះគឺជាការមិនពិតទេ បើខ្ញុំជាអ្នករត់ពន្ធមនុស្សមែននោះ ហេតុអ្វីបានជាខ្ញុំនឹងដាក់គ្រួសាររបស់ខ្ញុំក្នុងទូកដូចគ្នាជាមនុស្សផ្សេងទៀតនោះ? ខ្ញុំបានចំណាយប្រាក់ក្នុងចំនួនដូចគ្នាទៅឲ្យអ្នករត់ពន្ធមនុស្ស”។
គួរបញ្ជាក់ថា រូបភាពនៃកូនប្រុសរបស់លោក Kurdi ដែលបានលង់ទឹកអណ្ដែតមកទើរលើឆ្នេរសមុទ្រនៃរមណីយដ្ឋានដ៏មានប្រជាប្រិយរបស់ប្រទេសទួរគីបានបង្កឲ្យមានភាពភ្ញាក់ផ្អើលយ៉ាងខ្លាំងនៅទូទាំងពិភពលោក៕
Reuters
អ្នកដំណើរ៖ឪពុករបស់ក្មេងតូចស៊ីរីដែលលង់ទឹកគឺជា “អ្នករត់ពន្ធមនុស្ស”
0 Comments