បន្ទាយមានជ័យ ៖ មន្ត្រីគយស្នាក់តំបន់ម៉ាទ្បៃធ្វើការទប់ស្កាត់រឹតបន្តឹងមិនឲ្យមានការនាំចូលដូចមុននៅទូរទស្សន៍ចាស់ៗ(អេតចាយ)ពីប្រទេសថៃចូលកម្ពុជាក្រោយមានការចុះផ្សាយពីបណ្តាញព័ត៌មានក្នុងស្រុកពីការហូរចូលទូរទស្សន៍ចាស់ៗមិនមានការទប់ស្កាត់ពីមន្ត្រីជំនាញ។
ជាក់ស្តែងប៉ុន្មានថ្ងៃមកនេះបានចាប់បានទូរទស្សន៍ចាស់ៗប្រមាណជាង៥០គ្រឿងយកមករក្សាទុកនៅស្នាក់ការ។
សម្រាប់ការនាំចូលទូរទស្សន៍កន្លងមកមានឈ្មួញយ៉ាងតិចបីនាក់ដែលកំពុងតែសកម្មក្នុងការប្រមូលទិញនៅប្រទេសថៃរួចយកមកនាំចូលតាមច្រកម៉ាឡៃនិងមានរថយន្តតូចធំ៥ទៅ៧គ្រឿងរង់ចាំដឹកជញ្ជូនយកទៅលក់ចែកចាយនៅក្នុងខេត្តបន្ទាយមានជ័យនិងបន្តទៅចែកចាយតាមបណ្តាខេត្តដទៃទៀត។ ហើយត្រូវបានបណ្តាញព័ត៌មានមួយចំនួន បានធ្វើការចុះផ្សាយពី ភាពអសកម្មរបស់ មន្ត្រីគយ ម៉ាឡៃដែល មិនមានវិធានការទប់ស្កាត់ ហើយថែមបើកភ្លើងខៀវឲ្យមានការហូរចូលទូរទស្សន៍ចាស់ៗពីថៃតាមច្រករបៀងមកកម្ពុជាជាថ្នូរនឹងប្រយោជន៍ផ្ទាល់ខ្លួន។
ជុំវិញការនាំចូលនេះដែរប្រជាពលរដ្ឋ ដែលយល់ដឹងពីផលប៉ះពាល់បានសម្តែងក្តីបារម្ភថាប្រទេសកម្ពុជាមិនមែនជាធុងសំរាមសំរាប់បរទេសនោះទេ។ មួយវិញទៀតចំពោះទូរទស្សន៍ចាស់ៗនេះដែរវាជាប្រភេទវិទ្យុសកម្មមួយដែលបំផ្លាញសុខភាពពលរដ្ឋខ្មែរយ៉ាងធ្ងន់ធ្ងរទាំងមិនដឹងខ្លួន។
ចំពោះការចុះផ្សាយរបស់បណ្តាញព័ត៌មានលោក ចាប សាវ៉ាត ប្រធានស្នាក់ការគយនិងរដ្ឋាករច្រកទ្វារម៉ាឡៃប្រតិកម្មយ៉ាងខ្លាំងរហូតចាត់វិធានការទប់ស្កាត់មិនឲ្យមានការនាំចូលបន្តទៀតនិងធ្វើការឃាត់ចាប់ចំពោះទូរទស្សន៍ដែលព្យាយាមលួចនាំចូលបានប្រមាណជាង៥០គ្រឿងយកមករក្សាទុកនិងកសាងសំណុំរឿងបញ្ជូនទៅថ្នាក់លើដើម្បីយកស្នាដៃ។ លោក ចាប សាវ៉ាត បានប្រាប់អ្នកព័ត៌មានយើងតាមទូរស័ព្ទនារសៀលថ្ងៃទី២១ ខែកញ្ញានេះថា ចាប់ពីថ្ងៃនេះទៅលោក នឹងធ្វើការបង្ក្រាបរាល់ការនាំចូលទូរទស្សន៍ចាស់នេះមិនឲ្យមានការនាំចូលទៀតទេ៕
គយច្រកម៉ាឡៃចាប់ទូរទស្សន៍ចាស់ៗនាំចូលពីថៃក្រោយមានការរិះគុណនិងចុះផ្សាយពីសារព័ត៌មាន
0 Comments