កំពង់ឆ្នាំង ៖ នាព្រឹកថ្ងៃទី១៥ ខែតុលា ឆ្នាំ២០១៥នេះ នៅវត្តធម្មវ័ន្ត ស្ថិតក្នុងភូមិត្រពាំងអញ្ចាញ ឃុំស្វាយជ្រំ ស្រុករលាប្អៀរ ខេត្តកំពង់ឆ្នាំង មន្ត្រីរាជការ សមត្ថកិច្ចគ្រប់លំដាប់ថ្នាក់ ព្រះសង្ឃ សិស្ស និស្សិត និងប្រជាពលរដ្ឋរាប់ពាន់នាក់ទូទាំងខេត្តកំពង់ឆ្នាំងបាននាំគ្នាប្រារព្ធពិធីគោរពព្រះវិញ្ញាណក្ខន្ធ ព្រះករុណា ព្រះបាទសម្ដេចព្រះនរោត្ដម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋគម្រប់ខួប៣ឆ្នាំ។ ក្នុងពិធីគោរពវិញ្ញាណក្ខន្ធព្រះបរមរតនកោដ្ឋគម្រប់ខួប៣ឆ្នាំនោះផងដែរមានការអានរំលឹកនូវព្រះរាជជីវប្រវត្តិសង្ខេបរបស់ព្រះករុណាព្រះបាទសម្តេចព្រះនរោត្តមសីហនុ ព្រះបរមរតនកោដ្ឋថា ព្រះករុណាព្រះបាទសម្តេចនរោត្តមសីហនុ ពេលដែលព្រះអង្គបានឡើងសោយរាជ្យកាលណាមក ព្រះអង្គមានស្នាដៃល្អៗយ៉ាងច្រើនក្នុងការបម្រើជាតិ និងរំដោះជាតិមាតុភូមិ ពិសេសគឺរំដោះប្រជាជនឲ្យចេញពីនឹមត្រួតត្រារបស់បារាំងសេះ និងបន្តការពារប្រជាពលរដ្ឋខ្មែររហូតដល់ព្រះអង្គទ្រង់បានយាងសោយព្រះទិវង្គតនៅក្នុងព្រះជន្មាយុ៩០វស្សាដោយព្រះជរាពាធនៅមន្ទីរពេទ្យទីក្រុងប៉េកាំង នៃសាធារណរដ្ឋប្រជាមានិតចិន។
សូមបញ្ជាក់ថា ព្រះករុណា ព្រះបាទនរោត្តម សីហនុ ព្រះបរមរតនកោដ្ឋបានយាងចូលទិវង្គតនៅថ្ងៃទី១៥ ខែតុលា ឆ្នាំ២០១២ នៅក្រុងប៉េកាំង ប្រទេសចិន ទីដែលព្រះអង្គយាងទៅពិនិត្យ ព្រះរាជសុខភាព។ ព្រះអង្គយាងចូលទិវង្គតក្នុងព្រះជន្មាយុ៩០ព្រះវស្សា។
ក្នុងពិធីគោរពវិញ្ញាណក្ខន្ធនោះដែរ មន្ត្រីរាជការទូទាំងខេត្ត សមត្ថកិច្ច ព្រះសង្ឃ និស្សិត សិស្ស និងប្រជាពលរដ្ឋជាកូនជាចៅ ជាចៅទួត នៅក្នុងខេត្តកំពង់ឆ្នាំងទាំងអស់សូមកម្បង់អញ្ជលីបួងសួងដល់គុណព្រះរតនត្រ័យ សូមថ្វាយព្រះរាជកុសលដល់ព្រះវិញ្ញាណក្ខន្ធព្រះករុណាព្រះមហាវីរក្សត្រ នរោត្តមសីហនុ ព្រះវររាជបិតាជាតិខ្មែរ ព្រះបរមរតនកោដ្ឋ សូមព្រះអង្គបានយាងទៅសោយព្រះបរមសុខក្នុងសុគតិភព។ សូមឲ្យព្រះវិញ្ញាណក្ខន្ធដ៏សក្ដិសិទ្ធិរបស់ព្រះអង្គតាមជួយប្រោសប្រទានសាធុការពរជ័យដល់ទឹកដីនៃព្រះរាជាណាចក្រកម្ពុជា និងរាស្ត្រខ្មែរទូទាំងប្រទេសប្រកបដោយវឌ្ឍនភាព វិបុលភាព សន្តិភាព និងសុខក្សេមក្សាន្ត រុងរឿងជាអង្វែងតរៀងទៅ៕
មន្ត្រីរាជការ សមត្ថកិច្ច សិស្ស និស្សិត ព្រះសង្ឃ និងប្រជាពលរដ្ឋបាននាំគ្នាគោរពវិញ្ញាណក្ខន្ធព្រះបរមរតនកោដ្ឋគម្រប់ខួប៣ឆ្នាំ
0 Comments