សហព័ន្ធកីឡាវ៉ូវីណាមបានរៀបចំការប្រកួតកីឡាវ៉ូវីណាម ជ្រើសរើសជើងឯកថ្នាក់ជាតិឆ្នាំ២០១៥រយៈពេល៣ថ្ងៃថ្ងៃទី២៩ដល់៣១ ខែតុលានេះនៅក្នុងវិមានពហុកីឡដ្ឋានជាតិ។ នាយកដ្ឋានអប់រំកាយនិងកីឡាបានឲ្យដឹងថា ការប្រកួតជើងឯកវ៉ូវីណាមឆ្នាំនេះនាយកដ្ឋាន បានប្រគល់សិទ្ធិឲ្យសហព័ន្ធជាអ្នករៀបចំ។ សម្រាប់ឆ្នាំ២០១៥នេះមានក្លិប-សមាគមចំនួន៦បានបញ្ជូនកីឡាករ-កីឡាការិនីរបស់ខ្លួនមកចូលរួមប្រកួតដែលក្នុងនោះមានកីឡាករចំនួន៧៥នាក់និងកីឡាការិនីចំនួន២៤នាក់។
សមាគម-ក្លិបទាំង៦នោះគឺក្លឹបវ៉ូវីណាមក្រុមហ៊ុនរ័ត្នសុខន– មហាផ្ទៃ-វិទ្យាល័យវត្តកោះ-អង្គការសង្គ្រោះកុមារកម្ពុជា-វិទ្យាល័យសាមគ្គីនិងសាកលវិទ្យាល័យអាស៊ីអឺរុប។ លោកជីវសុខុមដែលជាគ្រូបង្វឹកជម្រើសជាតិនិងជាអ្នកដឹកនាំការប្រកួតបានប្រាប់ឲ្យដឹងថា វិញ្ញាសាដែលដាក់ឲ្យប្រកួតនោះសម្រាប់វិញ្ញាសាប្រយុទ្ធមានប្រភេទទម្ងន់លើ៦៥គីឡូក្រាមបុរស-ទម្ងន់៥៥គីឡូក្រាមនារី-ទម្ងន់៦០គីឡូក្រាមនារី-ទម្ងន់៥០គីឡូក្រាមបុរសនិងទម្ងន់៦០គីឡូក្រាមបុរស។ ចំពោះវិញ្ញាសាសំដែងវិញមានមេគុនកាំបិតធំបុរស២នាក់មេគុនដាវឯកត្តជនមេគុនបុរសឯកត្តជននិងនារីឯកត្តជនមេគុនជាក្រុមបុរសនារី។វិញ្ញាសាបុរស៤នាក់ប្រើអាវុធវិញ្ញាសានារីម្នាក់និងបុរសម្នាក់វិញ្ញាសានារីម្នាក់និងបុរស៣នាក់ប្រើអាវុធ។
វ៉ូវីណាមជាប្រភេទកីឡាមានសក្ដានុពលមួយរបស់កម្ពុជា ដែលតែងនាំយកមេដាយពីក្នុងការប្រកួតលើឆាកអន្តរជាតិពិសេសកីឡាSEA Gamesនាឆ្នាំកន្លងមក។ប៉ុន្តែនៅSEA Games ទី២៨ ឆ្នាំ២០១៥ដែលប្រទេសសឹង្ហបូរីធ្វើជាម្ចាស់ផ្ទះកន្លងមកនោះមិនបានដាក់បញ្ចូលប្រភេទកីឡាវ៉ូវីណាមនេះទៅក្នុងបញ្ជីប្រកួតនោះឡើយ៕
ប្រកួតកីឡាវ៉ូវីណាមជ្រើសរើសជើងឯកជាតិឆ្នាំ២០១៥
0 Comments