ពោធិ៍សាត់ ៖ មុខសញ្ញាចែកចាយ និងសម្របសម្រួលឲ្យប្រើប្រាស់ដោយខុសច្បាប់នូវសារធាតុញៀនម្នាក់ដែលប្រជាពលរដ្ឋអះអាងថា ជាមេខ្លោងដុះស្លែដ៏សំខាន់ម្នាក់នៅកណ្ដាលក្រុងពោធិ៍សាត់នោះ ត្រូវបានចៅក្រមស៊ើបសួរនៃសាលាដំបូងខេត្តពោធិ៍សាត់ បង្គាប់ឲ្យសមត្ថកិច្ចចាប់ខ្លួន កាលពីព្រឹកថ្ងៃទី៣១ ខែតុលា ឆ្នាំ២០១៥ ក្នុងភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ហើយឈានទៅរកការឆែកឆេរក្នុងផ្ទះ រកឃើញវត្ថុតាងបទល្មើសមួយចំនួនធំទៀត។
លោកឈន រិទ្ធិ អធិការនគរបាលក្រុងពោធិ៍សាត់បានឲ្យដឹងនៅយប់ថ្ងៃ៣១ ខែតុលានេះថា ជន ដែលចៅក្រមបង្គាប់ឲ្យចាប់ខ្លួននេះឈ្មោះអ៊ឹង ប៊ុនផាន់ អាយុ៣៩ឆ្នាំ រស់នៅភូមិសង្កាត់កើតហេតុខាងលើ។
លោកអធិការបន្តទៀតថា យោងតាមដីកាលេខ១៤០៩ចុះថ្ងៃទី៣០ ខែតុលា ឆ្នាំ២០១៥ របស់ចៅក្រមស៊ើបសួរសាលាដំបូងខេត្តពោធិ៍សាត់ លោក ពេជ្រ ចិន្តា បង្គាប់ឲ្យសមត្ថកិច្ចនាំខ្លួនមកសាលាដំបូងខេត្តដើម្បីចាត់ការតាមនីតិវិធីនោះ ទើបនៅថ្ងៃខាងលើសមត្ថកិច្ចក៏ចុះទៅចាប់ខ្លួនឈ្មោះ អ៊ឹង ប៊ុនផាន់ ហៅ៧៩ នេះមកកាន់អធិការក្រុងពោធិ៍សាត់។
លោករស់ ប៊ុនណា ស្នងការរងទទួលបន្ទុកកិច្ចការបទល្មើសនេះបានប្រាប់អ្នកយកព័ត៌មាននៅយប់ថ្ងៃ៣១ ខែតុលាថា ក្រោយពីចាប់ខ្លួនភ្លាម លោក ពេជ្រ ចិន្ដា ចៅក្រមស៊ើបសួរបានបញ្ជាឲ្យសមត្ថកិច្ច ឆែកឆេរក្នុងរថយន្តរបស់ជនចែកចាយ និងសម្របសម្រួលឲ្យប្រើប្រាស់ដោយខុសច្បាប់នូវសារធាតុញៀនឈ្មោះអ៊ឹង ប៊ុនផាន់ ហៅ៧៩ នៅភូមិពាលញែក១ សង្កាត់ផ្ទះព្រៃ។ ក្រោយឆែកឆេរសមត្ថកិច្ចក៏បានរកឃើញថ្នាំញៀនមួយថង់ប្លាស្ទិកប្រភេទម្សៅ ពណ៌សក្រាម មេតំហ្វេតាមីន។ ក្រោយមកសមត្ថកិច្ចក៏បានដកហូតរថយន្តនោះ រួមទាំងទូរស័ព្ទដៃពីរគ្រឿង រួចធ្វើការឃាត់ខ្លួនបញ្ជូនទៅកាន់សាលាដំបូងខេត្តតែម្ដង។
លោករស់ ប៊ុនណាន ក៏បានឲ្យដឹងបន្ថែមទៀតថា ក្រោយពេលបញ្ជូនជនសង្ស័យ និងវត្ថុតាងដល់តុលាការភ្លាម កម្លាំងនគរបាលជំនាញរបស់លោកសហការជាមួយការិយាល័យនគរបាលប្រយុទ្ធប្រឆាំងគ្រឿងញៀនខេត្ត ចុះដល់ទីតាំងផ្ទះឈ្មោះអ៊ឹង ប៊ុនផាន់ នោះ ហើយធ្វើការឆែកឆេរ ក៏បានរកឃើញវត្ថុតាងជាច្រើន មានទាំងថ្លង់ប្លាស្ទិកសម្រាប់វេចខ្ចប់ចែកចាយសារធាតុញៀន និងប្រដាប់សម្រាប់ជក់គ្រឿងញៀនមួយឈុតធំ ព្រមទាំងនាំខ្លួន ស្ត្រីម្ចាស់ផ្ទះម្នាក់ឈ្មោះចេង សេងហ៊ឹម ត្រូវជាប្រពន្ធ របស់ឈ្មោះអ៊ឹង ប៊ុនផាន់ ហៅ៧៩ នេះមកកាន់អធិការក្រុងដើម្បីបំពេញសំណុំរឿងបញ្ជូនទៅតុលាការ។
ក្នុងការចាប់ខ្លួនប្ដីប្រពន្ធទាំងពីរនាក់នេះ កុមារឈ្មោះលៀង ថៃ អាយុ៤ឆ្នាំ ត្រូវជាកូនប្ដីប្រពន្ធអ្នកទាំងពីរនោះ បាននិយាយរៀបរាប់ប្រាប់សមត្ថកិច្ចថា រូបគេបានឃើញឪពុកខ្លួនជក់ថ្នាំញៀននេះរាល់ថ្ងៃ រហូតដល់ថ្ងៃ ដែលសមត្ថកិច្ចចាប់ខ្លួននេះតែម្ដង។
ទាក់ទងនឹងការឃាត់ខ្លួនអ្នកទាំងពីរ មានការលើកឡើងជាមួយនឹងក្ដីរំភើបរបស់ប្រជាពលរដ្ឋដែលជាអ្នកនៅក្នុងភូមិសង្កាត់ជាមួយ រួមទាំងប្រជាពលរដ្ឋមួយចំនួន ព្រមទាំងអ្នកធ្វើការងាររដ្ឋបាលដែលជាអាណាព្យាបាលយុវជនរងគ្រោះ។ ពួកគាត់ក៏បានថ្លែងអំណរគុណចំពោះចៅក្រមស៊ើបសួរ ពេជ្រ ចិន្ដា ជាមួយសមត្ថកិច្ចនគរបាល ដែលចាត់ការលើករណីនេះ ដែលធ្វើឲ្យពួកគាត់ស្រាលខ្លួនបានជាងពាក់កណ្ដាល ហើយពួកគាត់បន្តសំណូមឲ្យចាត់ការចំគោលដៅ ដូចករណីខាងលើទៀត ដើម្បីកាត់បន្ថយយុវវ័យរងគ្រោះដោយគ្រឿងញៀន៕
ចៅក្រមស៊ើបសួរបញ្ជាឲ្យចាប់ខ្លួនមេខ្លោងគ្រឿងញៀនម្នាក់ចំគោលដៅ, ប្រជាពលរដ្ឋសាទរគ្រប់កន្លែង
0 Comments