កោះកុង ៖ ទំនិញខូចគុណភាពជាប្រភេទគ្រឿងឧបភោគបរិភោគ ដូចជាស្លាបមាន់ កោះមាន់ សាច់មាន់ ត្រូវគេបង្ហូរចូលពីប្រទេសថៃមកកម្ពុជា តាមច្រកចាំយាម ដោយពុំមានការត្រួតពិនិត្យពីមន្ត្រីពាក់ព័ន្ធនោះឡើយ។
បើតាមប្រជាពលរដ្ឋឲ្យដឹងថា បច្ចុប្បន្ននេះ សាច់មាន់ កោះមាន់ ដែលខូចគុណភាព ត្រូវបានក្រុមឈ្មួញនាំចូលពីប្រទេសថៃយ៉ាងគគ្រឹកគគ្រេងតាមច្រកអន្តរជាតិចាំយាម យកមកធ្វើការចែកចាយនៅតាមផ្សារនានាក្នុងខេត្តកោះកុង ព្រមទាំងមានខ្លះយកទៅចែកចាយនៅរាជធានីភ្នំពេញ និងខេត្តនានា ដោយពុំឃើញមន្ត្រីពាក់ព័ន្ធប្រចាំច្រកត្រួតពិនិត្យទេ គឺពួកគេចាំតែលាដៃយកលុយ រួចបណ្តោយឲ្យទំនិញទាំងនោះចូលមកដោយសេរី។
ជាក់ស្ដែងកាលពីទៀបភ្លឺថ្ងៃទី២៨ ខែតុលា ឆ្នាំ២០១៥ សាច់មាន់ ស្លាបមាន់ ជង្គង់មាន់ កោះមាន់ ខូចគុណភាពជាច្រើនបាវ ត្រូវក្រុមឈ្មួញនាំចូលមកពីប្រទេសថៃ ចូលប្រទេសកម្ពុជាតាមច្រកចាំយាម យ៉ាងរំភើយដោយពុំមានមន្ត្រីណាម្នាក់ត្រួតពិនិត្យនោះឡើយ។
ចំពោះបញ្ហាទាំងនេះ លោក ថេង ម៉ុងហួន ប្រធានការិយាល័យគយ និងរដ្ឋាករច្រកចាំយាមបានមានប្រសាសន៍ថា លោកពុំបានដឹងអំពីបញ្ហានាំសាច់មាន់ និងស្លាបមាន់ខូចគុណភាពចូលនោះទេ ហើយកន្លងមកលោកធ្លាប់តែឮកូនចៅប្រាប់ថា មានប្រជាពលរដ្ឋមួយចំនួនបាននាំចូល តែជាលក្ខណៈតូចតាច ដូចជាត្រឹមមួយថង់ពីរថង់ប៉ុណ្ណោះ។
បើតាមលោក ថេង ម៉ុងហួន ករណីជង្គង់មាន់ និងស្លាបមាន់នេះ គឺជាភារកិច្ចរបស់កាំកុងត្រូល ព្រោះគេមានឡាបូសម្រាប់ត្រួតពិនិត្យ។ ចំណែកខាងលោកគឺគ្រាន់តែជាអ្នកត្រួតពិនិត្យទំនិញដែលត្រូវបង់ពន្ធនោះទេ។
លោកឡាយ សុខសៅគន្ធា ប្រធានសាខាកាំកុងត្រូលខេត្តកោះកុង មិនអាចសុំការបំភ្លឺបានទេនៅថ្ងៃនេះ ដោយទូរស័ព្ទចូល តែពុំមានអ្នកទទួល៕
ទំនិញខូចគុណភាពត្រូវឈ្មួញនាំចូលតាមច្រកចាំយាម ដោយសេរីគ្មានការត្រួតពិនិត្យ
0 Comments