កណ្ដាល ៖ បុរសម្នាក់បានរងរបួសធ្ងន់ ដោយត្រូវរថយន្តម៉ាក HILUX VIGO បើកបុក ខណៈដែល ជនរងគ្រោះជិះម៉ូតូតាមបណ្ដោយផ្លូវលេខ១១៥។ ហេតុការណ៍នេះកើតឡើងកាលពីវេលាម៉ោង៦និង១៥នាទីល្ងាច ថ្ងៃទី១៥ ខែតុលា ឆ្នាំ២០១៥ ត្រង់ចំណុចមុខផ្លូវចូលផ្ទះសំណាក់រស្មីស្រែមាស នៅលើផ្លូវ115 ស្ថិតក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ខេត្តកណ្តាល។
ប៉ូលិសក្រុងតាខ្មៅបានឲ្យដឹងថា រថយន្តបង្កហេតុម៉ាក HILUX VIGO ពណ៌ទឹកប្រាក់ ពាក់ស្លាកលេខ AT15 2-0567 អ្នកបើកបរមិនស្គាល់អត្តសញ្ញាណ(គេចបាត់)។ ចំណែកជនរងគ្រោះមានឈ្មោះ ច័ន្ទ រស្មីដេត ភេទប្រុស អាយុ៣២ឆ្នាំ មានទីលំនៅក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ។
ប៉ូលិសបានឲ្យដឹងទៀតថា នៅវេលាកើតហេតុខាងលើ រថយន្តបង្កបានបើកបរតាមបណ្ដោយផ្លូវ១១៥ ក្នុងទិសដៅពីកើតមកលិច លុះដល់ចំណុចខាងលើបានបុកម៉ូតូម៉ាក Honda C70 ពណ៌ខ្មៅ ពាក់ស្លាកលេខ 01 4003 បើកបរដោយឈ្មោះ ច័ន្ទ រស្មីដេត (អ្នកបើកបរមានមួក និងកញ្ចក់មើលក្រោយ) ធ្វើដំណើរក្នុងទិសដៅស្របគ្នាពីកើតទៅលិច បណ្តាលឲ្យអ្នកបើកបរម៉ូតូរងរបួសធ្ងន់ ត្រូវបានរថយន្តសង្គ្រោះរបស់ស្នងការដ្ឋានខេត្តដឹកយកទៅសង្គ្រោះនៅគ្លីនិកកែវសាន្ត។
ប៉ូលិសបានបញ្ជាក់ថា មធ្យោបាយទាំង២គ្រឿង ត្រូវបានសមត្ថកិច្ចយកមករក្សាទុកនៅអធិការដ្ឋានក្រុងតាខ្មៅបណ្ដោះអាសន្នដើម្បីដោះស្រាយជាក្រោយ៕
រថយន្តវីហ្គូបុកជាមួយម៉ូតូហុងដាសេ៧០ របួសធ្ងន់ម្នាក់
0 Comments