កំពង់ឆ្នាំង ៖ លោកថោង ចំរើនប្រធានមន្ទីរសង្គមកិច្ចខេត្តកំពង់ឆ្នាំងនៅព្រឹកថ្ងៃទី១៤ ខែតុលា ឆ្នាំ២០១៥រួមដំណើរដោយលោកសេង វិចិត្រ, លោកហ៊ូ ប៊ុថន, លោក អេង ស្រស់វណ្ណៈ ស.ស.យ.កស្រុករលាប្អៀរ និងស.ស.យ.កខេត្តកំពង់ឆ្នាំងព្រមទាំងមន្ត្រីមន្ទីរសង្គមកិច្ចខេត្តជាច្រើនទៀតរូបបាននាំគ្នាយកអំណោយសប្បុរសជន និងអំណោយផ្ទាល់ខ្លួនទៅចែកជូនដល់លំនៅឋានជនចាស់ជរាគ្មានទីពឹងចំនួន៨នាក់នៅភូមិគ្រួស ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។
លោក សេង វិចិត្របានឲ្យដឹងថា គ្រួសារក្រីក្រដែលបាននាំយកអំណោយមកចែកជូនមានចំនួន៦គ្រួសារគឺ ១.លោកយាយហុក យ៉ាត អាយុ៧៤ឆ្នាំ, ២.លោកយាយអឿ លួន អាយុ៨៣ឆ្នាំ ៣,លោកយាយហ៊ូ វីន អាយុ៧៧ឆ្នាំ, ៤.លោកយាយកៅ យ៉ា អាយុ៨២ឆ្នាំ, ៥.លោកយាយម៉ុក តុប អាយុ៨៣ឆ្នាំ, ៦.លោកអឿ ម៉ុន អាយុ៨០ឆ្នាំដែលក្នុងម្នាក់ៗទទួលបានថវិកា៥ម៉ឺនរៀល, អង្ករ២០គីឡូក្រាម, មី១កេស។ ចំពោះលោកយាយអ៊ឹង សុខុម អាយុ៦៧ឆ្នាំ និងលោកយាយកង អួយ អាយុ៧៧ឆ្នាំក្នុងម្នាក់ៗទទួលបានថវិកា៦ម៉ឺនរៀល និងសម្ភារៈមួយចំនួនទៀត។ លោកបានបន្តថា អំណោយទាំងនេះបានការជួយឧបត្ថម្ភពីព្រះចៅអធិការហែម ឡូត, លោកថោង ចំរើន, លោកគង់ សារិន និងមន្ត្រី ស.ស.យ.ក ស្រុករលាប្អៀរនិងខេត្តកំពង់ឆ្នាំង។
លោកថោង ចំរើនបានពាំនាំប្រសាសន៍ផ្តាំផ្ញើរបស់សម្ដេចតេជោហ៊ុន សែននាយករដ្ឋមន្ត្រី និងសម្ដេចកិត្តិព្រឹទ្ធិបណ្ឌិតប៊ុន រ៉ានី ហ៊ុនសែនប្រធានកាកបាទក្រហមកម្ពុជាថា សម្ដេចតែងតែគិតគូរពីសុខទុក្ខ និងជួយប្រជាពលរដ្ឋរងគ្រោះដោយអគ្គិភ័យ ខ្យល់ព្យុះ ទឹកជំនន់ រន្ទះបាញ់ លង់ទឹក ចាស់ជរាគ្មានទីពឹង គ្រួសារទីទាល់ក្រ អ្នកផ្ទុកមេរោគអេដស៍ និងដោយឧបទ្ទវហេតុផ្សេងៗដោយមិនប្រកាន់ពូជសាសន៍ និងនិន្នាការនយោបាយឡើយ។ អំណោយទាំងអស់ខាងលើនេះរបស់សប្បុរសជន មន្ត្រីរាជការក្នុងខេត្ត និងស្រុកគឺជាការចូលរួមក្នុងការជួយសង្គ្រោះប្រជាពលរដ្ឋក្រីក្រជាមួយប្រមុខរាជរដ្ឋាភិបាលកម្ពុជា និងកាកបាទក្រហមកម្ពុជា។
លោកថោង ចំរើនបានផ្តាំផ្ញើដល់លោកយាយ លោកតាទាំង៨នាក់ សូមរស់នៅមានអនាម័យល្អ និងខិតខំថែទាំសុខភាពឲ្យបានល្អប្រសើរ បើស្ថានភាពមិនស្រួលត្រូវទៅកាន់មន្ទីរពេទ្យជាបន្ទាន់ជៀសវាងទុកឲ្យជំងឺធ្ងន់ធ្ងរលំបាកក្នុងការព្យាបាល៕
ប្រធានមន្ទីរសង្គមកិច្ចខេត្តយកអំណោយសប្បុរសជនចែកជូនជនចាស់ជរាគ្មានទីពឹង
0 Comments