អាជ្ញាធរបាននិយាយថា ឆ្មាំសមុទ្រក្រិកបានជួយសង្គ្រោះជនអន្តោប្រវេសន៍ចំនួន២៤២នាក់នៅពេលដែលទូកឈើរបស់ពួកគេបានលិចនៅភាគខាងជើងកោះ Lesbos កាលពីថ្ងៃពុធប៉ុន្តែ យ៉ាងហោចណាស់មានមនុស្សបីនាក់បានលង់ទឹកស្លាប់ដោយក្នុងនោះរួមមានក្មេងប្រុសតូចចំនួនពីរនាក់ផងដែរ។
បុរសម្នាក់ និងក្មេងប្រុសពីរនាក់ត្រូវបានគេប្រទះឃើញថា លង់ទឹកស្លាប់ហើយការស្វែងរកដ៏ទូលំទូលាយកំពុងត្រូវបានធ្វើឡើងនៅក្នុងតំបន់នេះបន្ទាប់ពីវាត្រូវបានគេគិតថា ជាគ្រោះមហន្តរាយសមុទ្រដ៏ធំនៅប្រទេសក្រិកចាប់តាំងពីការហូរចូលនៃជនភៀសខ្លួនយ៉ាងច្រើននៅឆ្នាំនេះ។
ជនភៀសខ្លួន និងជនចំណាកស្រុកជាង ៥០០ ០០០ នាក់បានចូលទៅក្នុងប្រទេសក្រិកតាមរយៈកោះរបស់ប្រទេសនេះចាប់តាំងពីខែមករាមកដែលវាបានក្លាយទៅជាវិបត្តិមនុស្សធម៌ធំជាងគេបំផុតនៅលើទ្វីបនេះនៅក្នុងរយៈពេលប៉ុន្មានទសវត្សរ៍ចុងក្រោយ។
លំហូរនៃមនុស្សបានកើនឡើងនាពេលថ្មីៗនៅពេលដែលជនភៀសខ្លួនកំពុងព្យាយាមសម្រុកចូលឆ្លងកាត់តាមផ្លូវទឹកដ៏តូចចង្អៀតរវាងប្រទេសទួរគី និងប្រទេសក្រិកតាមទូកចង្អៀតណែន ខណៈដែលរដូវរងាកៀកនឹងចូលមកដល់។
កោះ Lesbos ដែលស្ថិតនៅភាគខាងជើងសមុទ្រ Aegean បានក្លាយជាច្រកផ្លូវដ៏សំខាន់សម្រាប់ជនអន្តោប្រវេសន៍រាប់ពាន់នាក់ដែលកំពុងចូលទៅតាមព្រំដែននៅខាងក្រៅជាងគេបំផុតរបស់សហភាពអឺរ៉ុប។
គួរបញ្ជាក់ថា នៅឯជំនួបកំពូលមួយកាលពីថ្ងៃអាទិត្យមុន បណ្ដាមេដឹកនាំសហភាពអឺរ៉ុបបានព្រមព្រៀងគ្នា ដើម្បីធ្វើកិច្ចសហប្រតិបត្តិការបន្ថែមទៀតនៅក្នុងការដោះស្រាយវិបត្តិនេះ និងដើម្បីផ្តល់លំនៅឋានជំនួយដោយអង្គការសហប្រជាជាតិសម្រាប់មនុស្ស ១០០ ០០០ នាក់ដែលមានពាក់កណ្ដាលនៅក្នុងប្រទេសក្រិក៕
Reuters
ឆ្មាំសមុទ្រក្រិកជួយសង្គ្រោះជនអន្តោប្រវេសន៍២៤២នាក់នៅពេលទូករបស់ពួកគេលិច
0 Comments