ភ្នំពេញ ៖ គណៈកម្មការរៀបចំពិធីបុណ្យសូត្រស្វាធ្យាយព្រះត្រៃបិដកអន្តរជាតិលើកទី១១ នៅ សាធារណរដ្ឋឥណ្ឌា បានធ្វើការអំពាវនាវឲ្យព្រះសង្ឃគ្រប់ព្រះអង្គ និងពុទ្ធបរិស័ទទាំងអស់នៅទូទាំងប្រទេសចូលរួមចាប់មគ្គផលតាមកម្លាំងសទ្ធាជ្រះថ្លារៀងខ្លួនៗ ដើម្បីទទួលបានបច្ច័យក្នុងការរៀបចំពិធីបុណ្យឲ្យបានកាន់តែប្រសើរស្របតាមគន្លងនៃព្រះពុទ្ធសាសនា ខណៈដែលប្រទេសកម្ពុជាគឺជាម្ចាស់ផ្ទះនៃការរៀបចំកម្មវិធីបុណ្យ ដែលកម្មវិធីនោះគ្រោងនឹងចំណាយថវិកាប្រមាណ២៥ម៉ឺនដុល្លារអាមេរិក។
ការអំពាវនាវនេះត្រូវបានធ្វើឡើងកាលពីរសៀលថ្ងៃទី១៧ ខែតុលា ឆ្នាំ២០១៥ នៅក្នុងពិធីបុណ្យប្រាក់មហាសាមគ្គី ដែលបានធ្វើឡើងនៅក្នុងវត្តបទុមវតី ខណ្ឌដូនពេញ រាជធានីភ្នំពេញ ស្របពេលដែលមានព្រះសង្ឃនិងពុទ្ធបរិស័ទជាច្រើនរយនាក់ និងអង្គនៅទូទាំងប្រទេសបានមកចូលរួមយ៉ាងអធិកអធមនោះ។
ព្រះទេវសត្ថា ពឿយ មេត្តា ប្រធានសមាគមសមណនិស្សិតកម្ពុជា ព្រះចៅអធិការវត្តខ្មែរទាំង ៨នៅសាធារណរដ្ឋឥណ្ឌាមានព្រះថេរដីកាថា ពិធីសូត្រស្វាធ្យាយព្រះត្រៃបិដកអន្តរជាតិលើកទី១១នៅសាធារណរដ្ឋឥណ្ឌាមានរយៈពេល១១ថ្ងៃ គឺនឹងត្រូវរៀបចំឡើងចាប់ពីថ្ងៃទី២ ដល់ថ្ងៃទី១៣ ខែធ្នូ ឆ្នាំ២០១៥ មានព្រះសង្ឃនិងពុទ្ធបរិស័ទ អ្នកកាន់ព្រះពុទ្ធសាសនាថេរវាទចំនួន១៣ប្រទេស ដោយមានសមាជិកចូលរួមជាង២០ម៉ឺនអង្គ/នាក់ ហើយត្រូវការចំណាយទឹកប្រាក់សរុបជាង២៥ម៉ឺនដុល្លារ។ មុន និងរៀបចំពិធីបុណ្យនេះ គណៈសង្ឃនៅក្នុងប្រទេសកម្ពុជាបានធ្វើការរៀបចំកម្មវិធីបុណ្យផ្កាមហាសាមគ្គីមួយនៅថ្ងៃទី១៧ ខែតុលានេះ ដើម្បីឲ្យពុទ្ធបរិស័ទអាចចូលបច្ច័យបាន។ ប៉ុន្តែបើពុំអាចអញ្ជើញមកថ្ងៃនេះ ពុទ្ធ បរិស័ទអាចអញ្ជើញមកវត្តបុទុមវតី កុដិលេខ៣៥ សង្កាត់ចតុមុខ ខណ្ឌដូនពេញ រាជធានីភ្នំពេញ។
ព្រះទេវសត្ថាមានព្រះសង្ឃដីកាអះអាងថា បុណ្យសូត្រស្វាធ្យាយព្រះត្រៃបិដកនេះ ជាបុណ្យដ៏ធំក្នុងព្រះពុទ្ធសាសនា ហើយជាប្រវត្តិសាស្ត្រពុំដែលមាន បើនិយាយជារួមទៅកាលពីព្រះសម្មាសម្ពុទ្ធទ្រង់ព្រះបរិនិពាន្តទៅបាន៣ខែ ប្រារព្ធធ្វើម្តង១០០ឆ្នាំ ប្រារព្ធធ្វើលើកទី២-២១៨ឆ្នាំ ប្រារព្ធធ្វើលើកទី៣-២២០ឆ្នាំប្រារព្វធ្វើលើកទី៤ ហើយ ៤៥០ឆ្នាំទើបប្រារព្វធ្វើលើកទី៥ ហើយរហូតដល់ជាង២០០០ឆ្នាំទើបប្រារព្ធធ្វើក្នុងសម័យនេះ។ សម្រាប់ឆ្នាំ២០១៥នេះ កម្ពុជាធ្វើជាម្ចាស់ផ្ទះ ដែលត្រូវរៀបចំក្នុងដែនដីពុទ្ធភូមិប្រទេសឥណ្ឌា។ បុណ្យនេះទទួលបានអានិសង្សច្រើនណាស់តាមព្រះអង្គសម្តែងពីពពួកហ្វូងមនុស្ស និងទេវតាតាមថែរក្សាបានសេចក្តីសុខសេចក្តីចម្រើន មានជោគមានជ័យ ហើយទៅអនាគតជាតិក្លាយជាស្តេចចក្រពាត់ អាកាសាក់ទេវត្តា៨៤.០០០ពាន់ជាតិ បានទៅជាសាកាក់ទេវរាជ និងតុសិតាទេវរាជ ជាដើម៕
ព្រះសង្ឃអំពាវនាវដល់ព្រះសង្ឃ និងពុទ្ធបរិស័ទជួយឧបត្ថម្ភស្របពេលកម្ពុជានឹងធ្វើជាម្ចាស់ផ្ទះលើការរៀបចំកម្មវិធីបុណ្យសូត្រស្វាធ្យាយព្រះត្រៃបិដកអន្តរជាតិលើកទី១១
0 Comments