ប្រធានាធិបតីនៃសាធារណរដ្ឋ Chechen របស់រុស្ស៊ី លោកRamzan Kadyrov បានមានប្រសាសន៍ថា រដ្ឋឥស្លាមត្រូវបានគេ ” បង្កើតឡើងជាលើកដំបូងដើម្បីប្រឆាំងនឹងប្រទេសរុស្ស៊ី” ដោយលោកបានព្រមានចំពោះការគំរាមកំហែងនោះថា ក្រុមសកម្មប្រយុទ្ធ និងការប៉ះទង្គិចនៅក្នុងប្រទេសស៊ីរីគឺមានបំណងយាយីដល់សន្ដិសុខរបស់ប្រទេសរុស្ស៊ី។
លោក Kadyrov បាននិយាយក្នុងអំឡុងសន្និសីទកាសែតមួយនៅរដ្ឋធានី Grozny ថា “«ប្រសិនបើយើងគិតថា បញ្ហាស៊ីរីនឹងត្រូវបានដោះស្រាយបានយ៉ាងរហ័ស និងមិនប៉ះពាល់ដល់សន្ដិសុខ នៃប្រទេសរបស់យើងទេនោះ ប្រការនេះ វាមិនពិតនោះទេ។ ខ្ញុំប្រាកដក្នុងចិត្ដថា ពេលណាមួយពួកគេនឹងបង្ហាញឲ្យឃើញថា ក្រុម ISIS នេះត្រូវបានបង្កើតឡើងជាចម្បងដើម្បីប្រឆាំងនឹងប្រទេសរុស្ស៊ី”។
មេដឹកនាំសាធារណរដ្ឋ Chechen របស់រុស្ស៊ីក៏បានស្នើដល់សភាសហព័ន្ធរុស្ស៊ីផងដែ ឲ្យមានការដាក់ទោសប្រហារជីវិតចំពោះក្រុមភេរវករ និងបុគ្គល “ដែលជ្រើសរើសបង្ខូចភាពថ្លៃថ្នូរបស់សាសនាមូស្លីម និងបកស្រាយគម្ពីរគូរ៉ាខុស »។
ប្រមុខនៃតំបន់នេះបានលើកឡើងថា ” ការដាក់ទោសប្រហារជីវិតនេះ គួរតែត្រូវអនុវត្ដទៅលើ បុគ្គល ដែលមានចេតនាបង្ខូចភាពថ្លៃថ្នូសាសនាមូស្លីម បុគ្គលធ្វើការបកស្រាយគម្ពីរគូរ៉ាខុស និងក្រុមភេរវករ នានា។ មនុស្សទាំងអម្បាលនេះ សូម្បីតែជាប់ក្នុងពន្ធនាគារទៅហើយ ក៏នៅតែមានបណ្ដាញទាក់ទងគ្នា ហើយពួកទាំងនេះនៅតែបន្ដប្រព្រឹត្ដអំពើដូចខាងលើដដែល”។
លោក Kadyrov បានណែនាំរដ្ឋាភិបាលរុស្ស៊ី កុំឲ្យមានការភ័យខ្លាចចំពោះការថ្កោលទោសរបស់សហគមន៍ពិភពលោកអ្វីឡើយ។ នេះបើតាមទីភ្នាក់ងារសារព័ត៌មានអន្តរជាតិ RIA Novosti បានរាយការណ៍។
«ប្រទេសជាច្រើនបានដាក់ទណ្ឌកម្មប្រឆាំងនឹងយើង។ លោកខាងលិច និងអឺរ៉ុបមិនត្រូវការរដ្ឋដ៏ខ្លាំងក្លានោះទេ។ ពួកគេត្រូវការរដ្ឋ ដែលអាចយកមកត្រួតត្រាបាន។ ខ្ញុំមានជំនឿយ៉ាងជ្រាលជ្រៅថា បើចាំបាច់ ប្រធានាធិបតីនេះនឹងដាក់ជូនទៅសភាសហព័ន្ធរុស្ស៊ី State Duma នូវសេចក្តីព្រាងច្បាប់ស្ដីពីទោសប្រហារជីវិត ហើយអនុប្រធានសភានឹងគាំទ្រគាត់»។
ទោះជាយ៉ាងណា សភាសហព័ន្ធរុស្ស៊ី State Dumma បាននិយាយរួចមកហើយថា វាមិនគួរត្រូវពិចារណាសារត្រឡប់ចំពោះការព្យួរទុកនៃទោសប្រហារជីវិត ដែលរុស្ស៊ីបានអនុវត្ដកាលពីឆ្នាំ ១៩៩៩នោះទេ ពីព្រោះការផ្អាកទោសប្រហារជីវិតនេះ គឺត្រូវបានរកឃើញ និងស្នើដោយសមាជិកភាពក្រុមប្រឹក្សាអឺរ៉ុប។
សមាជិកសភា លោក Raphael Mardanshin បាននិយាយប្រាប់បណ្តាញទូរទស្សន៍ Rossiya ប៉ុស្ដិ៍លេខ ២៤ថា ” នៅពេលបច្ចុប្បន្ននេះ បញ្ហានៃការស្នើឲ្យមានទោសប្រហារជីវិត រួមទាំងការអនុវត្ដទោសប្រហារជីវិតចំពោះអំពើភេរវកម្មនេះ គឺមិនត្រូវបានយកមកពិចារណានៅក្នុងប្រទេសរុស្ស៊ីនោះទេ” ។
កាលពីដើមសប្តាហ៍នេះ សមាជិកសំខាន់មួយរូបនៃកិច្ចប្រជុំគណបក្សកុម្មុយនិស្តនៅក្នុងសភាសហព័ន្ធឌូម៉ា ក៏បានស្នើឡើងនូវទោសប្រហារជីវិតផងដែរ សម្រាប់អនុវត្ដទៅលើក្រុមភេរវករ ដែលជាវិធានការ វិសាមញ្ញ និងជា« វិធានការកំពូលនៃកិច្ចការពារសង្គម”។ លោកបានបន្ថែមថា ទោសប្រហារជីវិតនេះអាចជួយកាត់បន្ថយការគំរាមកំហែងនៃអំពើភេរវកម្ម ដែលអាចកើនឡើងនៅក្នុងទំនាក់ទំនងជាមួយនឹងការចូលរួមយ៉ាងសកម្មរបស់ប្រទេសរុស្ស៊ី នៅក្នុងប្រតិបត្តិការប្រឆាំងនឹងរដ្ឋអ៊ីស្លាម នៅក្នុងប្រទេសស៊ីរី៕
Source: RT
ក្រុមISISត្រូវបានបង្កើតឡើងដើម្បីប្រឆាំងនឹងប្រទេសរុស្ស៊ី
0 Comments