បាត់ដំបង ៖ យ៉ាងហោចណាស់ក៏មានក្មេងប្រុសម្នាក់ត្រូវបានស្លាប់ ក្នុងចំណោមអ្នករបួសចំនួន១០នាក់ នៅក្នុងហេតុការណ៍គ្រោះថ្នាក់ចរាចរណ៍មួយ ដែលបានកើតឡើងកាលពីថ្ងៃទី២៩ ខែតុលា ឆ្នាំ២០១៥ វេលាម៉ោង១១និង០២នាទីយប់ ត្រង់ចំណុចផ្លូវបំបែក ស្ថិតក្នុងភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង ខណៈដែលមានរថយន្តចំនួនពីរគ្រឿងបើកបរក្នុងទិសដៅច្រាសគ្នា ហើយមិនព្រមប្រកាន់ស្តាំដូចគ្នា។
លោកអនុសេនីយ៍ឯកមាន ចាន់ នាយផ្នែកសណ្ដាប់ធ្នាប់ នៃអធិការដ្ឋាននគរបាលស្រុកកំរៀងបានបញ្ជាក់ថា នៅមុនពេលកើតហេតុគឺមានរថយន្តមួយគ្រឿងម៉ាកឡង់គ្រីស័រ ពណ៌ខ្មៅ ពាក់ស្លាកលេខ ភ្នំពេញ2G-5777 បើកបរដោយឈ្មោះដួង វណ្ណា ភេទប្រុស អាយុ២៧ឆ្នាំ រស់នៅភូមិដូង ឃុំបឹងរាំង ស្រុកកំរៀង ដោយបានបើកបរយ៉ាងលឿនក្នុងទិសដៅពីកើតទៅលិច។
លោកនាយផ្នែកបានបន្តថា លុះទៅដល់ត្រង់ចំណុចកើតហេតុដែលជាចំណុចផ្លូវបំបែកក៏ស្រាប់តែមានរថយន្តមួយគ្រឿងទៀតម៉ាកលុចស៊ីស ពណ៌ទឹកមាស ពាក់ស្លាកលេខភ្នំពេញ 2M-4809 ដែលបើកបរដោយឈ្មោះ កិ ចំរើន ភេទប្រុស អាយុ២៨ឆ្នាំ រស់នៅភូមិអូរដាលើ ឃុំបឹងរាំង ស្រុកកំរៀងដូចគ្នា ដែលកំពុងបើកបរយ៉ាងលឿនក្នុងទិសដៅ ច្រាសគ្នា ក៏បានប៉ះគ្នាយ៉ាងពេញទំហឹងតែម្តង បណ្ដាលឲ្យក្បាលរថយន្តទាំងសងខាងរួញយ៉ាងដំណំ។ ចំណែកអ្នករួមដំណើរក៏បានស្លាប់ និងរងរបួសរដូករណែលពេញផ្លូវ។
តាមការស្រង់របាយការណ៍ទៅលើអ្នកស្លាប់ និងអ្នករងរបួសគឺ ភាគីរថយន្តម៉ាកឡង់គ្រីស័រ
១. អ្នកបើកបរឈ្មោះ ដួង វណ្ណា របួសស្រាល ២. ដួង ឌឿន ភេទប្រុស អាយុ៥៧ឆ្នាំ រស់នៅភូមិដូងរបួសធ្ងន់ ៣. ដួង សិលា ភេទប្រុស អាយុ១០ឆ្នាំ ត្រូវជាកូន ស្លាប់ ៤. ហេន អូន ភេទប្រុស អាយុ៣២ឆ្នាំ រស់នៅភូមិដូង របួសស្រាល ៥. លឿង តិ ភេទប្រុស អាយុ៤៦ឆ្នាំរស់នៅឃុំស្តៅ របួសធ្ងន់ និង៦.ឈ្មោះ ហួន សិលា ភេទប្រុស អាយុ២៨ឆ្នាំ របួសស្រាល។
ដោយឡែកភាគីរថយន្តលុចស៊ីសគឺ ១. អ្នកបើកបរឈ្មោះ កិ ចំរើន របួសធ្ងន់ ២. ចំរើន វឌ្ឍនា ភេទប្រុស អាយុ៦ឆ្នាំ ត្រូវជាកូនរបួសធ្ងន់ ៣.ណុប នឿត ភេទប្រុស រស់នៅភូមិអូរដាលើ របួសធ្ងន់ ៤. ឈ្មោះឡក់ រស់នៅភូមិដូង របួសធ្ងន់ និង៥. ឈ្មោះ ណុប រស់នៅភូមិដូង របួសស្រាល។ ដោយសរុបលើករណីគ្រោះថ្នាក់ចរាចរណ៍នេះ បណ្តាលឲ្យមានម្នាក់ស្លាប់ និងរបួសធ្ងន់ ស្រាលចំនួន១០នាក់។
ភ្លាមៗនោះដែរជនរងគ្រោះទាំងអស់ត្រូវបានសមត្ថកិច្ចបញ្ជូនទៅកាន់មន្ទីរពេទ្យដើម្បីសង្គ្រោះ។ ចំណែកសពក្មេងប្រុស ក៏ត្រូវក្រុមគ្រួសារ សាច់ញាតិយកទៅធ្វើបុណ្យហើយដែរ រីឯមធ្យោបាយធ្វើដំណើរទាំងពីរគ្រឿងត្រូវបានសមត្ថកិច្ចនាំយកទៅរក្សាទុកនៅអធិការដ្ឋានដើម្បីប្រគល់ទៅឲ្យកម្លាំងការិយាល័យចរាចរណ៍ផ្លូវគោកខេត្តជាអ្នកដោះស្រាយតាមផ្លូវច្បាប់។ ករណីនេះ សមត្ថកិច្ចបានសង្កត់ធ្ងន់ថា គឺជាការបើកបរខ្វះការយោគយល់ និងអធ្យាស្រ័យគ្នាទៅវិញទៅមក ដោយម្នាក់ៗបានបំពានទៅលើគំនូសទ្រូងផ្លូវទាំងអស់គ្នាទើបបង្កឲ្យមានគ្រោះថ្នាក់បែបនេះឡើង៕
ស្លាប់ម្នាក់ របួស១០នាក់ ដោយសារជិះរថយន្តមិនប្រកាន់ស្តាំដូចគ្នា
0 Comments