អ្នកចាត់ការរបស់ក្លិបមាន់ខ្នាយមាស Spursលោក Mauricio Pochettino បានឈ្នះរង្វាន់អ្នកចាត់ការឆ្នើមប្រចាំខែនៅក្របខណ្ឌបាល់ទាត់កំពូលអង់គ្លេស Barclays Premier League ក្រោយពីដឹកនាំក្រុមឈ្នះទាំង៣ប្រកួតអំឡុងខែកញ្ញាកន្លងទៅ។
សូមបញ្ជាក់ថា នេះគឺជាលើកទី២ហើយដែលអតីតខ្សែការពារស្ថិតនៅក្នុងក្រុមជម្រើសជាតិអាហ្សង់ទីនម្នាក់នេះ ឈ្នះរង្វាន់មួយនេះ ក្រោយពីធ្លាប់ពីបានឈ្នះវាម្តងកាលពីខែតុលាឆ្នាំ២០១៣ អំឡុងរជ្ជកាលរបស់លោកជាមួយក្លិប Southampton។
ក្រោយពេលមានរដូវកាលត្រដាបត្រដួល ជាកន្លែងដែលក្រុមមួយនេះខកខានឈ្នះការប្រកួតណាមួយក្នុងចំណោម៤ប្រកួតបើកឆាករដូវកាលដំបូងរបស់ពួកគេនោះ ក្លិបនៅក្រុងឡុងដ៏ភាគខាងជើងមួយនេះ ដណ្តើមបានពិន្ទុអតិបរមាសម្រាប់ការប្រកួតរបស់ខ្លួនកាលពីខែមុន។
ក្រុមមួយនេះ រកបានជ័យជំនះ១-០លើក្រុម Sunderland ក៏ដូចជាក្រុម Crystal Palace មុនពេលផ្តួលក្រុមជើងខ្លាំង Man Cityមិនឲ្យងើបមុខរួចក្នុងលទ្ធផលពិន្ទុ៤-១ នៅក្នុងទឹកដី White Hart Lane ខណៈដែលក្រុមរបស់លោក Pochettino ចាប់ផ្តើមឡើងតារាងជាបន្តបន្ទាប់នោះ។
លោក Pochettino បាននិយាយប្រាប់វេបសាយរបស់ក្លិបថា លោកពិតជាសប្បាយចិត្តខ្លាំងនឹងការទទួលបានរង្វាន់ពោពេញដោយកិត្យានុភាពមួយនេះ ហើយលោកសូមសន្យាថា នឹងប្រឹងប្រែងតទៅទៀត ដើម្បីជួយក្រុមឆ្ពោះទៅរកភាពជោគជ័យរបស់ខ្លួន៕
លោក Mauricio Pochettino ឈ្នះរង្វាន់អ្នកចាត់ការឆ្នើមប្រចាំខែនៅ Premier League
0 Comments