ភ្នំពេញ ៖ លោក ម័រធិន បូស្ទ័ររូដ (Morten Bosterud) ប្រធានក្រុមហ៊ុន Atlasklinikken នៅប្រទេសបារាំង នឹងប្រគល់វត្ថុបុរាណចំនួន២ដុំ និងវត្ថុសិល្បៈចំនួន៩ ដុំ ដល់រាជរដ្ឋាភិបាលកម្ពុជាវិញនៅថ្ងៃទី២០ ខែតុលា ឆ្នាំ២០១៥ ខាងមុខ នេះបើតាមសេចក្តីប្រកាសព័ត៌មាន របស់ក្រសួងការបរទេសកម្ពុជា។
សេចក្តីប្រកាសចុះថ្ងៃទី១៦ ខែតុលា ឆ្នាំ២០១៥ បានឲ្យដឹងថា តាមរយៈស្ថានឯកអគ្គរាជទូតកម្ពុជានៅទីក្រុងប៉ារីស លោក ម័រធិន បូស្ទ័ររូដ (Morten Bosterud) ប្រធានក្រុមហ៊ុន Atlasklinikken របស់ន័រវេស បានប្រគល់វត្ថុបុរាណខ្មែរពីការប្រមូលទុកផ្ទាល់ខ្លួនរបស់លោកជូនរាជរដ្ឋាភិបាលកម្ពុជាវិញ។ វត្ថុដែលប្រគល់ឲ្យវិញនោះរួមមាន ទី១-ព្រះកេសព្រះឥសូរ សម័យអង្គរសតវត្សទី៩ រចនាប័ទ្មព្រះគោ -ព្រះកេសទេព ភេទប្រុស សម័យអង្គរចុងសតវត្សទី១២ និងដើមសតវត្សទី១៣ រចនាប័ទ្មបាយ័ន និងទី២- វត្ថុសិល្បៈចំនួន៩ ដុំផ្សេងទៀត (ពុំមែនជាវត្ថុបុរាណពិតទេ) ដោយផ្អែកលើការធ្វើកោសល្យវិច័យយ៉ាងម៉ត់ចត់ពីអ្នកជំនាញនៃក្រសួងវប្បធម៌ និងវិចិត្រសិល្បៈ។
តាមសេចក្តីប្រកាសបានបញ្ជាក់ថា លោកម័រធិន បូស្ទ័ររូដ នឹងប្រគល់វត្ថុបុរាណខ្មែរទាំង២ និងវត្ថុសិល្បៈចំនួន៩ ដុំនោះ ជូនលោកឧបនាយករដ្ឋមន្ត្រីហោ ណាំហុង រដ្ឋមន្ត្រី ក្រសួងការបរទេស និងសហប្រតិបត្តិការអន្តរជាតិ ដោយមានវត្តមានចូលរួមរបស់លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចត្រសិល្បៈនៃព្រះរាជាណាចក្រកម្ពុជា នៅក្នុងពិធីដែលនឹងប្រារព្ធធ្វើនៅថ្ងៃទី២០ ខែតុលា ឆ្នាំ២០១៥ វេលាម៉ោង១៥ និង៣០ នៅសារមន្ទីរជាតិនាទីក្រុងភ្នំពេញ។
បន្ទាប់ពីពិធីប្រគល់នេះ លោក ម័រធិន បូស្ទ័ររូដ នឹងត្រូវបានបំពាក់គ្រឿងឥស្សរិយយស ព្រះរាជាណាចក្រកម្ពុជា ថ្នាក់មហាសេរីវឌ្ឍន៍ ដោយលោកជំទាវ ភឿង សកុណា នៅទីស្តីការក្រសួងវប្បធម៌និងវិចិត្រសិល្បៈ ដើម្បីជាការលើកទឹកចិត្តដល់ការប្រគល់វត្ថុបុរាណខ្មែរជូនដល់រាជរដ្ឋាភិបាលកម្ពុជាវិញ៕
ប្រធានក្រុមហ៊ុន Atlasklinikken នៅប្រទេសបារាំងនឹងប្រគល់វត្ថុបុរាណ២ដុំនិងវត្ថុសិល្បៈ៩ដុំដល់កម្ពុជាវិញ
0 Comments